Jokwa 8

Longe̱ la Mbia lena Loba a Do̱lisanno̱

Njika epolo mome a be̱nno̱ o ndabo a mbia e? (1)

Ne̱ni mome angame̱nno̱ o no̱ngo̱ munj’ao e? (2)

Njika mbē̱ sango a mboa a be̱nno̱ e? (3)

Njika ebolo muto a be̱nno̱ o ndabo o mbia e? (4)

Nje Loba a mengane̱no̱ bayedi na bana e? (5)

Nje Bibe̱l e makwalano̱ jombwea jabane̱ na kwed’a diba e? (6, 7)

1. Bibe̱l e makwala ná mome nde e mulopo ma ndabo’ao ńa mbia. (1 Korinto 11:3) Mome angame̱ne̱ nde o be̱ne̱ muto mō̱ na mune. Bangame̱ne̱ o bane̱ bupisane̱ mbenda.—1 Timoteo 3:2; Tito 3:1.

2. Mome angame̱ne̱ o to̱ndo̱ munj’ao kana a to̱ndino̱ mo̱me̱ne̱. Angame̱ne̱ bongwa mo̱ kana Yesu a mabongwano̱ bokwedi bao. (Efeso 5:25, 28, 29) A sangame̱ne̱ dipa mo̱ tom to̱ takise̱ mo̱ o to̱ njika mbadi nde. O diwengisan, angame̱ne̱ o lee̱le̱ mo̱ edube na kiye̱ pe̱ mo̱.—Kolose 3:19; 1 Petro 3:7.

3. Sango a mboa angame̱ne̱ bola ebolo na iwiye̱ o bongwa mbo’ao. Angame̱ne̱ sombwea munj’ao na bana bao da, bebo̱tedi na wuma bejedi. Sango a mboa angame̱ne̱ pe̱ londe̱ ńo̱ng’a mudī ńa mbo’ao. (1 Timoteo 5:8) A mano̱ngo̱ mulopo o jongwane̱ mbia mao o jokwa bia Loba na miano Mao.—Ndimbisedi 6:4-9; Efeso 6:4.

4. Muto angame̱ne̱ be̱ mongwaned’a bwam ńa mom’ao. (Bebotedi 2:18) Angame̱ne̱ suwe̱le̱ mom’ao o lee̱ na jongwane̱ bana babu. (Minia 1:8) Yehova a mengane̱ muto ná ombweye ndabo’ao ńa mbia na ndolo. (Minia 31:10, 15, 26, 27; Tito 2:4, 5) Angame̱ne̱ o bola mom’ao edube e londi.—Efeso 5:22, 23, 33.

5. Loba a mengane̱ bana ná ba sengane̱ basango babu. (Efeso 6:1-3) A mengane̱ bayedi ná bokwe̱le̱ na bola bana babu bediedi. E mapula ná bayedi ba tombise̱ ponda na bana babu, bokwe Bibe̱l na babo̱ o bwam ba jombwea ńo̱ng’abu ya mudī na ya mulema. (Ndimbisedi 11:18, 19; Minia 22:6, 15) Bayedi ba sangame̱ne̱ o ko̱kise̱ bana babu na malinga to̱ na njó.—Kolose 3:21.

6. Myambo me te̱ oteten’a babaedi, bangame̱ne̱ o we̱le̱ malea ma Bibe̱l o ebolo. Bibe̱l e mome̱le̱ biso̱ ná di be̱ ndolo, di be̱ pe̱ be̱be̱ o lakise̱. (Kolose 3:12-14) Eyal’a Loba e si matute̱le̱ o jabane̱ ka mbad’a bo̱le̱ la bekwadi besadi. Nde muto ena a no̱ngo̱ bedomsedi ba jese̱le̱ mom’ao yete̱na (1) a mabanga na pamo ńe̱se̱ o bongwa ndabo’ao ńa mbia, (2) e njó o dikala lena ja lao la bwam na longe̱ lao bena ba kusa njo̱m, to̱ so̱ (3) mwekan mao mu si ma bola mo̱ epolo to̱ ewo̱ o jowe̱ Yehova.—1 Korinto 7:12, 13.

7. Babaedi bangame̱ne̱ dubane̱le̱ mō̱ na nune̱. Musonje mwe nde bobe te̱nge̱ne̱ Loba na te̱nge̱ne̱ nu o baino̱. (Bonaheber 13:4) Bupisane̱ Betiledi, to̱ njika pat’a mulatako o’boko nde ye mpo̱m ma njo̱m ni mabwe̱ diba na te̱me̱ wonja o ba nupe̱pe̱. (Mateo 19:6-9; Roma 7:2, 3) Yehova a singe̱ ke̱ moto a mabwa diba esibe̱ njo̱m ńe o Betiledi na ba nupe̱pe̱.—Maleaki 2:14-16.

[Bedinge̱dinge̱ o dipapa 16, 17]

Loba a mengane̱ bayedi ná bokwe̱le̱ bana babu na bola pe̱ babo̱ bediedi

[Edinge̱dinge̱ o dipapa 17]

Sango a mboa ńa ndolo a mombwea mbo’ao o mbad’eyobo na o mbad’a mudī