Ońola nje di mabo̱to̱no̱ bwam ke̱ di mala o ndongame̱n asu e?

Mo̱, we̱n o maduta ma nun muna kalati ne̱ni Mboṅ a Yehova i mabo̱to̱no̱ bwam ke̱ i mala o ndongame̱n e? Ońola nje di mano̱ngo̱no̱ ni ponda e?

O lee̱le̱ ná di mabola Loba edube. Ye mbale̱ ná, Loba a si mombwa je̱ne̱ne̱ l’eboko. (1 Samuel 16:7) Nde di mako̱to̱me̱ te̱ o jowe̱ mo̱, ńo̱ng’asu ńe nde ná di bole bonasango asu edube. Di belabe̱ te̱ o mbo’a Sango a ekombo to̱so̱ Kaisa, di si mapo̱so̱ to̱ njika bebo̱tedi ońola edube yangame̱ne̱ mo̱. Ońola nika pe̱ so̱ nde di titino̱ ná di te̱me̱ oboso ba “Mukaised’a wase ńe̱se̱” Yehova Loba, to̱ jingea to̱ ne̱ni nde o ndabo ba mowe̱no̱ mo̱.​—Bebotedi 18:25.

O lee̱le̱ ná di madangwa nde bupisane̱ bete̱sedi ba Bibe̱l. Bibe̱l e mome̱le̱ biso̱ ná di bo̱te “ka babe̱ne̱ mbo̱mbo̱ a iso̱n” na babie̱ “jaleye̱ ńolo.” (1 Timoteo 2:9, 10) Bo̱to̱ “ka babe̱ne̱ mbo̱mbo̱ a iso̱n” nika ńe nde ná, di mabanga bo̱to̱ mbo̱ti i malee̱le̱ ńol’asu ńe̱se̱ o eboko, to̱so̱ mbo̱ti ye ná i so̱njise̱ moto. O bo̱to̱ pe̱ ka nubi “jaleye̱ ńolo” nika pe̱ ńe nde po̱so̱ mbo̱ti ya bwam yena yangame̱ne̱ moto nu mabwe̱ Loba bo̱ngo̱. Nika e si mapula kwala ná jangame̱ne̱ nde bo̱to̱ mulemlem ma mbo̱ti. Je wonja o bo̱to̱ to̱ njika mbo̱ti etum te̱ e masesano̱ Loba. Tongwea na bebo̱tedi basu je ná di bola ná, “belēdi ba Loba, Musunged’asu, be kuse edube” o mambo me̱se̱, be ‘sese pe̱ Loba.’ (Tito 2:10; 1 Petro 2:12) Bebo̱tedi basu ba bwam be ná be lee̱le̱ bane̱ ne̱ni jowe̱ Yehova.

O si bwa bo̱ngo̱, nje o be̱nno̱ ka mbo̱ti, e si meka wa ná wukeye o ndongame̱n asu. Mbo̱t’asu i titi eto̱m o be̱ die̱, to̱so̱ i peti mpesa, ye te̱ bosangi i be̱ne̱ pe̱ je̱ne̱ne̱ la bwam, nika e dongame̱n.

• Ońola nje yeno̱ mweńa ná di bo̱te bwam ke̱ di mowe̱ Loba e?

• Njika bete̱sedi ba Bibe̱l be mongwane̱ biso̱ o po̱so̱ mbad’a bebo̱tedi ba bwam e?