Sa nded’a mulema ońola ‘Pat’a bato ye̱se̱’

PONDA Yesu okwe̱le̱no̱ bokwedi bao ne̱ni langwa myango ma bwam, embi ná bato ba si me̱nde̱ kasa mwe̱ndi ma Janea ponda ye̱se̱. (Lukas 10:3, 5, 6) O dikalo lasu, je ná di bomane̱ bato bō̱ be dibań to̱ be ná ba te̱nge̱ne̱ biso̱. Ye mbale̱ ná yi ńai a malabe̱ ye ná i bola ná e be̱ biso̱ ndutu o tika lee̱le̱ ba di mate̱ye̱no̱ dikalo nded’a mulema.

Moto ńe ndedi a me̱ne̱ ńo̱ngi na mitakisan ma bape̱pe̱, a mawe̱le̱ mo̱me̱ne̱ o epol’abu, e pe̱ be̱be̱ o jongwane̱. Nde, yete̱na di botedi o bo̱lo̱ne̱ ndedi ońola ba bena di mate̱ye̱no̱ dikalo, je pe̱ ná di botea bo̱lo̱ne̱ ko̱d’asu na be̱ lasu la jangwa o te̱ dikalo. O mune̱ mudi, di sai te̱ nded’a mulema, e mabe̱ nde biana je nde o bata mula o eturukaṅ​—ko̱d’asu ńa dikalo e mabenga jońa!​—1 Tes. 5:19.

Ne̱ni jeno̱ ná di sa nded’a mulema to̱ o ponda bola la nika leno̱ ndutu e? Jombweye bato balalo jeno̱ ná jembilane̱​—Yehova, Yesu, na ńamuloloma Paulo.

EMBILANE̱ NDED’A MULEMA ŃA YEHOVA

Ye lokoli la mbu we̱nge̱ dina la Yehova di kwesabe̱no̱ mbindo, nde e o we̱lisane̱ nika. To̱ na nika, a dia te̱ nde “bwam na ba ba si bi masoma, na babobe pe̱.” (Lukas 6: 35) A malee̱le̱ bwam bao tongwea na we̱lisane̱ lao. Yehova a mapula ná ‘pat’a bato ye̱se̱’ yongisabe̱. (1 Tim. 2:3, 4) To̱ná Loba a singe̱no̱ bobe, bato be te̱ nde mo̱ tiki, a si mapula pe̱ to̱ ná ba bo̱lo̱ne̱ malonge̱ mabu.​—2 Pet. 3:9.

Yehova a bi ne̱ni Satan a dimse̱no̱ so̱ṅtane̱ la ba ba si dube̱. (2 Kor. 4:3, 4) Botea o mińa mabu ma mūtu, jita bokwabe̱le̱ belēdi na bedangwedi ba mpoṅ, nika e mabola ná e be̱ babo̱ ndutu o jemea mbale̱. Yehova a le̱le̱m o jongwane̱ yi ńai a bato. Ne̱ni di bino̱ nika e?

Jombweye ne̱ni Yehova a tano̱ e̱ne̱ bato ba Ninive ba kwaṅ. To̱na beboledi babu ba njo, Yehova a kwalane̱ Yona ná: “Nde mba na si bwea Ninive ndedi, mu mundi munde̱ne̱ mwena mu be̱n buka ebwe’a lokoli la bato na mwaba [120 000] bena ba si bi mome̱ to̱ dimo̱se̱” e? (Yona 4:11) Yehova e̱n nde bato ba Ninive ka bō̱ bena ba bo̱bi o mbad’a mudī, na mo̱ a lee̱le̱ babo̱ ndedi, a loma Yona o jome̱le̱ babo̱.

Mulemlem kana Yehova; biso̱ pe̱ di me̱ne̱ ná bato be tiki. Je ná jembilane̱ mo̱ tongwea na be̱ be̱be̱ o keka jongwane̱ to̱ nja nu lambe̱ toi, to̱ ye̱ne̱ne̱ nde biana ba si be̱n ńo̱ngi.

EMBILANE̱ NDED’A MULEMA ŃA YESU

Mulemlem ka Sango, Yesu a ta a bwea bato ba ta ńo̱ngi o mudī ndedi. Bibe̱l mo̱ ná: “Niponda e̱nno̱ mamuti, na mo̱ a bwea mo̱ ndedi, ebanja ba ta ba takatakane̱, ba comea ka mido̱ngi mi si be̱n mutatedi.” (Mat. 9:36) Yesu a ta e̱ne̱ o njiba; a ta a bia ná ba bena ba ta ba po̱ sengane̱ mo̱ ba se̱le̱ jokwabe̱le̱ belēdi ba mpoṅ, na ná ba ta ba takisabe̱ na badiedi babu b’ebasi. To̱ná a tano̱ a bia ná jita ba me̱nde̱ jese̱le̱ ná mikidi ma ńai na ńai meke babo̱ o sengane̱ mo̱, Yesu a bengi te̱ nde “lee̱ babo̱ jita la mambo.”​—Marko 4:1-9.

Bato ba bangi te̱ o sengane̱ biso̱, di we̱ ná jombwe o njiba, nde di baise̱ na biso̱me̱ne̱ ońola nje ba bangino̱ sengane̱ biso̱. Ye ná e be̱ ná bō̱ ba si to̱ndi Bibe̱l to̱ ebasi ońola beboledi ba bobe ba ba bena ba makwale̱ ná be nde Kriste̱n. Yen ebe ba langwedi bape̱pe̱ mpoṅ jombwea belēdi basu. Bane̱ pe̱ ba mabanga nde ońolana bato ba dinge̱le̱ babo̱ to̱ belongi babu ba mbia ba mayo̱ye̱ babo̱ ke̱ ba kasi biso̱.

Bape̱pe̱ pe̱ di mabomane̱no̱ o mōnda be nde ná ba banga ońolana ndutu ba kusino̱ i ńo̱si babo̱. Munańango Kim, ńe nde ńamuloloma mō̱ mo̱ ná: “O epas’a mōnda masu ewo̱, jita ba bo̱lo̱ne̱ mabe̱ne̱ mabu me̱se̱ o bila. Ba si be̱n dipita la mbaki ońola kie̱le̱ ni maye̱. Be nde ba malinga, ba si lakisane̱ pe̱ to̱ to̱ moto. Di yo̱ki bomane̱ ponda ye̱se̱ o y’epasi bato ba mate̱nge̱ne̱ biso̱. Ngedi po̱, bato ba bobe ba kwedi mba ońolo ke̱ ne o dikalo.”

Ne̱ni Kim a tikino̱ be̱ne̱ nded’a mulema to̱na mi mitakisan e? Mo̱ ná: “Ne te̱ owas’a mitakisan, na mo̱nge̱le̱ nde kalat’a Minia 19:11, ni makwale̱ ná: ‘Dibie̱ di mabola moto a si wamse̱ linga.’ No̱nge̱le̱ te̱ bete̱medi ba bato ba mōnda masu, nik’e mongwane̱ mba o lee̱le̱ babo̱ nded’a mulema. Nde seto̱ pe̱ to̱ bato be̱se̱ nde ba si makase̱ biso̱. O y’epasi me̱ne̱, di be̱n jita la mape̱pe̱le̱ ma bwam.”

Je ná di baise̱ na biso̱me̱ne̱ ná, ‘Na be̱ te̱ o epol’a ba bena di mate̱ye̱no̱ dikalo, ne̱ni na wusano̱ kasa mwe̱ndi ma Janea e?’ K’eyembilan, nje di wusano̱ bola e be̱ te̱ ná ba langwea nde biso̱ mpo̱ṅ mo̱ na mo̱ jombwea Mboṅ a Yehova e? O yi ńai a bete̱medi, pondapo̱ biso̱ pe̱ di si wusa sengane̱, nde di be̱ne̱ pe̱ ńo̱ngi ná bape̱pe̱ ba lee̱le̱ biso̱ ndedi. Jo̱nge̱le̱ te̱ jome̱le̱ la Yesu ná di boleye bane̱ ka nje te̱ di mapulano̱ ná ba boleye biso̱, nika e matute̱le̱ biso̱ o we̱le̱ biso̱me̱ne̱ o epol’abu to̱ o ponda nika ńeno̱ ndutu o bola.​—Mat. 7:12.

EMBILANE̱ NDED’A MULEMA ŃA PAULO

Ńamuloloma Paulo a lee̱le̱ nded’a mulema nate̱na mo̱me̱ne̱ ońola bate̱nge̱ne̱ mo̱. Ońola nje e? Ońolana a si dimbedi nje ye̱se̱ a bolino̱. A kwali ná: “Mba ńena nu ta muto̱pe̱ dibena na mutakisedi na mot’a njo. Nde na bweabe̱le̱ ndedi, ebanja na ta nde na bola nika ka nu si bi, niponda na si tano̱ na dube̱.” (1 Tim. 1:13) Embi ná Yehova na Yesu ba lee̱le̱ mo̱ ndedi ninde̱ne̱. A ta so̱ a so̱ṅtane̱ ná, ba a tano̱ a te̱ye̱ dikalo be nde ka nje te̱ mo̱ pe̱ a tano̱ kwaṅ.

Ponda iwo̱, Paulo a ta be̱ a te̱nge̱ne̱ belēdi be kwedi ba ngińa. Nje a tano̱ a bola e? Kalat’a Bebolo 17:16 e mabīse̱ ná niponda Paulo a tano̱ o Aten, ‘mudī mao mu lingi oteten, kana e̱nno̱ mu mundi mu londi na njimbidi.’ To̱ na nika, Paulo a bolane̱ nde nje e ta e lingise̱ mo̱ k’eyoto o bola mboṅ a bwam. (Bebolo 17:22, 23) A ta nde a te̱ dikalo bupisane̱ bete̱medi ba pat’a bato ye̱se̱ ná ‘ye̱ke̱i te̱ a sunge dongo.’​—1 Kor. 9:20-23.

Je ná jembilane̱ Paulo tongwea na jemba bedangwedi ba bobe to̱ belēdi ba mpoṅ di madongame̱nno̱ o dikalo, nde di bola ná di be̱ jangwa o langwa “myango ma bwam.” (Yes. 52:7) Munańango mō̱ nu belabe̱ ná Dorote mo̱ ná: “O mōnda masu ma dikalo, jita bokwabe̱le̱ nde ná Loba e njo, a titi pe̱ to̱ mukaised’a bwam. Na yo̱ki so̱ nde se̱le̱ sesa yi ńai a bato ná ba dube̱ Loba, denge̱ na maduta mo̱nge̱le̱ mabu o nje Bibe̱l e makwalano̱ jombwea Yehova ka Loba la ndolo na makaki mao ońola kie̱le̱ ni maye̱.”

BENGA “BUKANE̱ BOBE BWAM”

Kana di mabengano̱ nde so̱lo̱ o “mińa misukan,” di si be̱ mańaka o je̱ne̱ ná bato bō̱ di mate̱ye̱no̱ dikalo “ba me̱nde̱ benga bola bobe.” (2 Tim. 3:1, 13) Nde di s’angame̱n jese̱le̱ ná y’ebe̱yedi e sumwane̱ biso̱ nded’a mulema to̱ bola ná di bo̱lo̱ne̱ muńe̱nge̱ masu. Yehova e ná a bola biso̱ ngińa o “bukane̱ bobe bwam.” (Rom. 12:21) Jesika ńe Paonia mo̱ ná: “Na yo̱ki bomane̱ bato ba si be̱n sibise̱ la ńolo na bena ba mayaṅe̱ pe̱ biso̱ na mwe̱ndi masu. Nika ńe ná e lingisane̱. Na botedi te̱ ekwali na moto, na makane̱ Yehova o mulema, na baise̱ mo̱ ná ongwane̱ mba o je̱ne̱ nu moto kana mo̱ a me̱ne̱no̱ mo̱. Nika e masumwane̱ mba mo̱nge̱le̱ ma bobe nde ńongwane̱ mba o dutea ne̱ni jongwane̱ nu moto.”

Jangame̱n pe̱ dutea ne̱ni jongwane̱ bonasango asu. Jesika mo̱ ná: “Yete̱na mō̱ ńasu a si kasabe̱ o dikalo, na mawe̱ ná na si tika o y’ekwali. O diwengisan na matukwa nde ekwali o to̱pea mambo ma bwam dikalo lasu di mawanano̱ to̱ná bato bō̱ ba si malambe̱ye̱no̱ biso̱ toi.”

Yehova a bi mitakisan di makusano̱ o dikalo. Se̱ muńe̱nge̱ eno̱ ke̱ di membilane̱ nded’ao e! (Lukas 6:36) Nje ye mbale̱ ye nde ná nded’a Yehova e be̱n su. Je ná di be̱ mbaki ná a bi ná te̱ite̱i njika ponda a mawanano̱ su la yen ebe̱yed’a mambo. O tatan, dikalo le musunga jita. (2 Tim. 4:2) Di benge so̱ o londise̱ m’bē̱ masu na ko̱di, name̱ne̱ pe̱ na nded’a mulema ońola ‘pat’a bato ye̱se̱.’