Myuedi ma balangedi
Ne̱ni jangame̱nno̱ so̱ṅtane̱ byala bena be maso̱be̱ o kalat’a Myenge 12:8 e?
Myemba mi dinge̱le̱ y’epas’a Bibe̱l mi malee̱ ná mu mwemba mu makwalea nde ońola bato.
Kalat’a Myenge 12:2-5 e makwala ná “bajemea ba nińo̱ngo̱ oteten a bonabato.” Ombusa nika di malanga o Myenge 12:6-8 ná:
“Kana batakedi ba matusabe̱no̱,
batuedi pe̱ ba sunjume̱ye̱,
na mapula te̱me̱ omo̱ń tatan; nika nde Yehova a kwalino̱.
Na mongwane̱ pe̱ nu nu mapulise̱ jongwane̱.
Byala ba Yehova be nde byala ba ke̱nge̱nge̱,
be nde ka silba ni ńamwabe̱le̱ o diyo̱, o weya, ni sangisabe̱ ngedi samba.
Wa, a Yehova, o matata bate̱m na sim;
O malingea biso̱ te̱nge̱ne̱ nin ńo̱ṅo̱n bebe be̱se̱.”
Myemba 6 mi malee̱ nje Loba a kwalino̱ jombwea “batakedi.” A me̱nde̱ sunga babo̱.
Myemba 7 mi mabata ná “byala ba Yehova be nde byala ba ke̱nge̱nge̱,” be nde “ka silba ni ńamwabe̱le̱.” Be byala be malee̱ nde nje kriste̱n i masengano̱ ońola Eyal’a Yehova.—Mye. 18:31; 119:140.
O Bibe̱l iwo̱, Myenge 12:8 mi tukwabe̱ nde ná: “O matata mo̱.” Kana mwemba mu se̱le̱ mu matubano̱ “byala ba Yehova,” bato bō̱ ba mo̱nge̱le̱ ná nik’e mapula nde kwala ná Loba a “matata” byala bao. Di bi pe̱ ná Loba a tati Bibe̱l to̱ná bate̱nge̱ne̱ mo̱ ba po̱ngino̱ miwe̱n jita o ńo̱ngise̱ Bibe̱l to̱ ńamse̱ mo̱.—Yes. 40:8; 1 Pet. 1:25.
Nde, Yehova a matata pe̱ bato bena myemba 6 mi makwaleano̱, a me̱nde̱ pe̱ benga jongwane̱ na sunga “batakedi” na ba bena ba ‘matusabe̱.’—Hiob 36:15; Mye. 6:5; 31:2, 3; 54:9; 145:20.
Nje so̱ Yehova a matatano̱ o myemba 8 e, bato nga byala bao e?
Di langi te̱ mu mwenge mwe̱se̱, di maso̱ṅtane̱ ná bato nde a matatano̱.
O byingedi ba Myenge 12, David a kwali ná baboledi ba Yehova ba jemea ba nińo̱ngo̱ oteten a bonabato. Ombusa nika, di maso̱ byala be malee̱ ná Yehova a me̱nde̱ te̱me̱ te̱nge̱ne̱ bato ba mabolane̱ eyem’abu o mbad’a bobe. Mu mwenge mu mabola biso̱ mbaki ná je ná di lakisane̱ ná Loba a me̱nde̱ bola lambo ońola baboledi bao ebanja byala bao be ná ke̱nge̱nge̱.
Nik’e mapula so̱ kwala ná bato bena Yehova a me̱nde̱no̱ tata o myemba 8 be nde batakedi bena bato ba bobe ba matuse̱no̱.
Ońola nje so̱ Bibe̱l iwo̱ i tukono̱ nde mu mwemba o nin mbadi: “O matata mo̱” e?
Ońolana eyala ná “mo̱” e maso̱be̱ o kalat’a Betiledi ba Bonahebe̱r beno̱ ná ba lakisane̱. Nde Betukwedi ba Musamba ba Grikia mo̱ be tuko nde mu mwemba ná: “A me̱nde̱ tata biso̱,” “A me̱nde̱ lingea biso̱.” Nik’e mombwea so̱ nde bajemea bena ba matusabe̱ ba matakisabe̱ pe̱. Babo̱ nde ba me̱nde̱ tatabe̱ “te̱nge̱ne̱ nin ńo̱ṅo̱n,” nika ńe nde bato ba bobe bena ba mato̱nde̱ oteten a bonabato. (Mye. 12:8, 9) O betukwedi bō̱ ba Betiledi ba Bonahebe̱r na eyem’a Bonaaram, mwemba 8 mu tukwabe̱ ná: “Wa, A SANGO, o me̱nde̱ tata bate̱m ná sim; o me̱nde̱ tata babo̱ te̱nge̱ne̱ nin ńo̱ṅo̱n a bobe bebe be̱se̱. Babobe ba mayo̱mbo̱ wuma ye̱se̱, ka mulondodi mu mańo̱ maya ma bana ba bato.” Nik’e mabata bamse̱ ná seto̱ byala ba Loba nde Myenge 12:8 mi makwaleano̱.
Je so̱ ná di kwala ná mu mwemba mu mabola nde “bajemea” dipita, ná Loba a me̱nde̱ bola lambo ońol’abu.