Bibe̱l e makwalea ońola bito jita ba ta ba to̱ndo̱ na bolea pe̱ Yehova. Ba ta “babie̱ jaleye̱ mańolo” na “mbale̱ o mambo me̱se̱.” (1 Tim. 3:11) Nde bonańango be pe̱ ná ba so̱ o myemba bonańango bou beno̱ ná bembilane̱. A beso̱mbe̱ ba bonańango, mo̱ lo bi bonańango bō̱ bou leno̱ ná lembilane̱ e? Bińo̱ maka bede̱mo babu ba bwam, lo duteye pe̱ ne̱ni lee̱le̱ mo̱. Ede̱mo a mweńa ewo̱ kriste̱n ńou ńangame̱nno̱ be̱ne̱ ye nde sibise̱ la ńolo. Muto a sibise̱ te̱ ńolo, a me̱nde̱ be̱ne̱ mulatako ma bwam na Yehova na bane̱ pe̱. K’eyembilan, muto nu to̱ndi Yehova a mapo̱so̱ na sibise̱ la ńolo o sue̱le̱ bete̱sedi ba doi la byanedi Sango ao ńe o mo̱ń a bolino̱. (1 Kor. 11:3) Be bete̱sedi be mweńa jita o mwemba na o mbia. w23.12 18-19 § 3-5.

Yehova a mabaise̱ mome ná a to̱nde munj’ao, a londise̱ pe̱ ńo̱ng’ao y’eyobo, ya mulema, na ya mudī. Bede̱mo ka be̱ne̱ la so̱ṅtane̱, bola la bito edube, na be̱ la moto beno̱ ná ba lakisane̱, be me̱nde̱ jongwane̱ wa ponda o me̱nde̱no̱ ba. Ombusa diba, we ná o timba sango a bana. Njika belēdi weno̱ ná o busane̱ o eyembilan a Yehova jombwea be̱ la sango a bana ńa bwam e? (Efe. 6:4) Yehova a langwedi Mun’ao Yesu o ntelele ná a to̱ndi mo̱, a do̱lisan pe̱ mo̱. (Mat. 3:17) Ponda o mabe̱ne̱no̱ bana, o si dimbea o bola babo̱ mbaki ponda ye̱se̱ ná o to̱ndi babo̱. Sesa babo̱ eyeka ońola mambo ma bwam ba mabolano̱. Basango ba bana ba membilane̱ Yehova ba mongwane̱ bana babu o timba kriste̱n you. O me̱nde̱ be̱ sango a bana ńa bwam yete̱na botea tatan o mombwea belongi ba mbia mo̱ngo̱ na ba mwemba na ndolo, na ke̱ o malangwea babo̱ ná o to̱ndi babo̱, be pe̱ wa tiki.—Yohane 15:9. w23.12 28-29 § 17-18

To̱ná di maboleano̱ Yehova na jemea, di malembe̱ ndut’a longe̱ na maboa ka bato ba benama be̱se̱. Je pe̱ ná di lembe̱ mitakisan mi mawe̱ na bato ba singe̱ baboledi ba Loba. To̱ná Yehova a si mekano̱ ná mambo ma ndutu ma ko̱ye̱ biso̱, a kakane̱ o jongwane̱ biso̱. (Yes. 41:10) Na jongwane̱ lao, je ná di benga be̱ muńe̱nge̱, di no̱ngo̱ bedomsedi ba bwam, di benga pe̱ bolea mo̱ na jemea to̱ owas’a bete̱medi ba ngińa. Yehova a kakane̱ o bola biso̱ nje Bibe̱l e mabele̱no̱ ná “musango ma Loba.” (Fil. 4:6, 7) Mu musango mwe nde pī di be̱nno̱ ońola mulatako masu ma bwam na mo̱. Mu musango “mu buki dibie̱ le̱se̱” nika ńe nde nje ye̱se̱ jeno̱ ná di we̱le̱ jo̱nge̱le̱. Mo̱ e mápo̱ye̱ wa ná ombusa wa kane̱ Yehova na iwiye̱, o senge pī ninde̱ne̱ oteten ango̱ e? Nika nde ńe “musango ma Loba.” w24.01 20 § 2; 21 § 4