We te̱ muyedi, ongwane̱ bana bo̱ngo̱ o boṅsane̱ malabe̱ bupisane̱ mimbu mabu. Ponda iwo̱, mokwa ma yo̱ki nde kwalea mambo ma njiba ma mombweye̱ babaedi, to̱ bete̱sedi jombwea bedangwedi; nde o be̱n te̱ nde dongo diwo̱ to̱ maba muna eno̱ ná alabe̱. Ongwane̱ pe̱ bana bo̱ngo̱ o so̱ṅtane̱ ná ba si me̱nde̱ po̱so̱be̱ ponda te̱ ba me̱nde̱no̱ le̱ke̱ dia mo̱ń. Bola la nika di me̱nde̱ jeka ná ba bwe ndutu ke̱ ba po̱si bato bape̱pe̱. (1 Tim. 6:18) Biso̱ be̱se̱ je ná di boṅsane̱ malabe̱ ma bwam ma masese̱ Yehova, ma membe̱ pe̱ bonasango asu. (Min. 25:11) E po̱i te̱ ná di kwaleye o patape̱m ońola lambo di po̱yedi biso̱, di si kwalea jombwea biso̱me̱ne̱ buka dime̱ne̱. (Min. 27:2; 2 Kor. 10:18) Jangame̱n nde bonde̱ Yehova, Eyal’ao, na tumba lao.—Bbī. 4:11. w23.04 24-25 § 17-18

Ndolo ńe mweńa jita ná di be̱ peńa na ye̱ne̱. (Mat. 22:37-39) Ndolo di be̱nedino̱ Loba e mongwane̱ biso̱ o benga te̱ dikalo, to̱ e be̱ nde ná nika ńe ná e wanea biso̱ mitakisan. (2 Tim. 1:7, 8) Kana di to̱ndino̱ pe̱ ba ba si maboleye̱ Yehova, di mate̱ dikalo to̱ e be̱ na telefon na maleta. Di si mabo̱lo̱ne̱ dipita ná buńa bō̱ bato ba me̱nde̱ tukwa, ba botea bola nje e te̱nge̱n. (Hes. 18:27, 28) Di to̱ndi pe̱ bonasango asu. Di malee̱le̱ ni ndolo ke̱ di ‘momane̱le̱ na longisane̱ mō̱ na nune̱.’ (1 Tes. 5:11) Kapo̱ ka sonja i mane̱ bwemba mwemba, di momane̱le̱ mō̱ na nune̱. Di si sengise̱ bonasango asu sese na m’boṅsan to̱ buńa, to̱ timbise̱le̱ bobe ońola bobe. (1 Tes. 5:13, 15) Di malee̱le̱ pe̱ ndol’asu ke̱ di mabola bonasango ba madie̱le̱ mwemba edube.—1 Tes. 5:12. w23.06 10 § 6; 11 § 10-11

Mbadi po̱ jeno̱ ná jouse̱ dube̱ lasu ńe nde ná di duteye ońola diko̱ti. Diko̱ti di mabola biso̱ mbaki ná makaki ma Loba ma me̱nde̱ londa. Di dutedi te̱ ońola nje diko̱ti di bolabe̱no̱ na nje nik’e baise̱no̱, di mouse̱ dube̱ lasu ná dikaki la Loba la longe̱ la bwindea o paradisi di me̱nde̱ londa. Ońola nje jeno̱ ná di kwala nika e? Nje diko̱ti di no̱ngo̱ne̱no̱ Yehova e? Yehova a lom Mun’ao ńandolo ńaboso, diko̱m lao la batabata, o wase ná a yabe̱ ka mot’a benama ńe ke̱nge̱nge̱. Ke̱ e o wase, Yesu a lembe̱ pat’a mitakisan ye̱se̱. O sukan, a taki a wo̱ pe̱ kwed’a konjo. E se̱ mususedi munde̱ne̱ Yehova a sawono̱ e! Loba lasu la ndolo a si wusa jese̱le̱ ná Mun’ao a take a wo̱ pe̱, ná di be̱ne̱ longe̱ la bwam nde le isungu. (Yohane 3:16; 1 Pet. 1:18, 19) Kana Yehova a sawono̱ ninka mususedi bonde̱ne̱, a me̱nde̱ pe̱ bola me̱se̱ ná di be̱ne̱ longe̱ la bwindea o was’a peńa. w23.04 27 § 8-9