DONGO 6

Mbad’a bwam ńa lee̱ ne̱ni we̱le̱ Betiledi o ebolo

Yohane 10:33-36

O PATAPE̱M: O bo̱le̱ te̱ langa epas’a Bibe̱l ewo̱, o si tomba dibokime̱ne̱ o jo̱nge̱le̱ di mabupe̱. Bola ná basengedi bo̱ngo̱ ba so̱ṅtane̱ mulatako mwe oteten a jo̱nge̱le̱ weno̱ teleye̱ na epasi o langino̱.

NE̱NI BOLA NIKA:

Busise̱ byala be mweńa. Ombusa bolanga b’epas’a Bibe̱l, bonde̱ byala bena be mulatako na mom ma jo̱nge̱le̱. We ná o timbise̱le̱ byala, we pe̱ ná o baise̱ myuedi mi me̱nde̱ tute̱le̱ basengedi bo̱ngo̱ o so̱ be byala.

O mabolane̱ te̱ byala bepe̱pe̱ o yikiye̱ belēdi b’epas’a Bibe̱l, wangame̱ye̱ ná o si po̱tise̱ basengedi bo̱ngo̱, ba s’e̱ne̱ pe̱ mulatako mwe oteten a byala be tilabe̱ o Bibe̱l mo̱me̱ne̱ na mom ma jo̱nge̱le̱ weno̱ teleye̱.
Yikiye̱ belēdi. Yete̱na o boli njo̱m ońola nje langa epas’a Bibe̱l o ponda winge̱le̱no̱ mo̱, teleye̱ ne̱ni byala ba mweńa weno̱ busise̱ oten beno̱ mulatako na ni njo̱m o bolino̱.

We te̱ kwalea ońola epas’a Bibe̱l ewo̱, o si kwese̱ Bibe̱l ango̱. Nik’e mongwane̱ basengedi bo̱ngo̱ o je̱ne̱ ná byala bo̱ngo̱ be mulatako n’epasi weno̱ langa.
Lee̱ ne̱ni we̱le̱ Betiledi o ebolo o mbadi ni wam. O si so̱lo̱ o beteledi ba mato̱ti ma titi mweńa mena ma si mongwane̱ o so̱ṅtane̱ mom ma jo̱nge̱le̱. Bupane̱ nje basengedi bo̱ngo̱ ba bino̱ ońola y’ekwali, te̱se̱ njika mo̱nge̱le̱ me mweńa ná basengedi bo̱ngo̱ ba so̱ṅtane̱ be belēdi bwambwam.