Yezu Krista: k’a ta a wololi ma ka taga se a saya ma

Ala ye mɛlɛkɛ Gabiriyɛli ci sunguru ɲumannin dɔ fɛ min tɔgɔ ko Mariyamu. A y’a fɔ a ye ko a bena deen dɔ wolo min bena masaya kɛ fɔɔ abada. O deen, Yezu, wolola wɛɛrɛ dɔ kɔnɔ, yɔrɔ min na sagadɛndɛbagaw nana bɔ a ye. Kɔfɛ, lolo dɔ ye cɛɛ dɔw ɲɛminɛ ka bɔ kɔrɔn fɛ ka taga n’u ye deen yɔrɔ la. An bena a ye mɔgɔ min tun y’o lolo yira u la, ani cogo min na Yezu kisira fagari ma.

O kɔ, an bena Yezu sɔrɔ Alabatosoba kɔnɔ, a be baro kɛra ni sariya karamɔgɔw ye. O wagati la a sii tun ye saan 12 ye. Saan 18 o kɔ, Yezu batisera, ani a y’a daminɛ ka Masaya weleweleda ani ka mɔgɔw kalan. Ala tun y’a ci dugukolo kan k’o baara lo kɛ. Yezu ye cɛɛ 12 sugandi k’u kɛ a ka cidenw ye walisa u k’a dɛmɛ o baara la.

Yezu ye kabako caaman kɛ fana. A ye mɔgɔ waa caaman balo ni jɛgɛ misɛn ani buru kunkurunin damanin dɔrɔn ye. A ye banabagatɔw kɛnɛya ani ka suuw yɛrɛ kunu. A laban, an bena a ye koo caaman minw kɛra Yezu la a ka ɲɛnamaya loon laban na ani a fagara cogo min na. Yezu ye waajuli kɛ saan saba ni tilan kɔnɔ. O la, YƆRƆ 6NAN ka maanaw bɛɛ lajɛnnin kɛra saan 34 ani kalo damanin kɔnɔ.