Mɛlɛkɛ dɔ nana bɔ Mariyamu ye

MUSO cɛɲumanba nin ye Mariyamu lo ye. Israɛlden dɔ lo min tun siginin be Nazarɛti dugu kɔnɔ. Ala y’a lɔn ko mɔgɔ ɲuman lo. O lo kama a y’a ka mɛlɛkɛ Gabiriyɛli ci ka na kuma a fɛ. I b’a lɔn Gabiriyɛli nana min fɔ Mariyamu ye wa? An k’o lajɛ.

Gabiriyɛli y’a fɔ a ye ko: ‘Ne be i fo Mariyamu! I ye nɛɛma sɔrɔ Jehova fɛ.’ Mariyamu tun ma o mɔgɔ ye ka ye. O kuma nin ye Mariyamu hakili ɲagami sabu a m’a kɔrɔ faamu. Nka, Gabiriyɛli sinna k’a hakili sigi.

A ko: ‘Kana siran Mariyamu, bari i koo diyara Jehova ye kosɔbɛ. O kama, a bena kabakoba dɔ kɛ i ye. Yanni dɔɔni i bena deen dɔ wolo, i k’a tɔgɔ la ko Yezu.’

Mɛlɛkɛ Gabiriyɛli tora k’a ɲɛfɔ ko: ‘O deen bena kɛ mɔgɔba ye, a bena weele Ala kɔrɔtalenba dencɛ. Jehova bena a kɛ masacɛ ye i n’a fɔ Dawuda. Nka, Yezu bena kɛ masacɛ ye fɔɔ abada ani a ka masaya tɛna ban fewu!’

Mariyamu ye mɛlɛkɛ ɲininga ko: ‘Ne yɛrɛ ma furu fɔlɔ. Ne bena se ka kɔnɔ ta cogo di k’a sɔrɔ ne ma cɛɛ lɔn fɔlɔ?’

Mɛlɛkɛ y’a jaabi ko: ‘Ala ka sebagaya bena kɛ i kan. O kama, i bena deen min wolo, a bena weele ko Ala Dencɛ.’ A y’a fɔ Mariyamu ye tugun ko: ‘I hakili to i balimamuso Elizabɛti koo la. Mɔgɔw tun b’a fɔ ko a kɔrɔla kojugu deen wolo ma. Nka, yanni dɔɔni, a bena dencɛ wolo. O la, i k’a lɔn ko Ala tɛ dɛsɛ foyi la.’

Mariyamu sinna k’a fɔ ko: ‘Ne ye Jehova ka jɔnmuso ye! I y’a fɔ cogo min na, Ala k’a kɛ ne ye ten.’ O kɔ, mɛlɛkɛ tagara.

Mariyamu teliyara ka taga bɔ Elizabɛti fɛ. Elizabɛti ye Mariyamu kaan mɛn tuma min na, deen lamagara a kɔnɔ ninsɔndiya fɛ. Elizabɛti fara Ala ka hakili senu na ani a y’a fɔ Mariyamu ye ko: “I ye nɛɛma sɔrɔ Ala fɛ ka tɛmɛ musow bɛɛ kan.” Mariyamu tora Elizabɛti fɛ ka kalo saba ɲɔgɔn kɛ, o kɔ, a kɔsegira Nazarɛti.

Mariyamu maminɛnin tun be cɛɛ dɔ ye min tɔgɔ ko Yusufu. Nka, a y’a mɛn tuma min na ko Mariyamu kɔnɔman lo, a y’a ɲini ka ban a la. O la, Ala ka mɛlɛkɛ y’a fɔ a ye ko: ‘Kana siran ka Mariyamu furu bari Ala lo ye dencɛ di a ma.’ O cogo la, Yusufu ni Mariyamu furula ɲɔgɔn ma, nka u ye kɔnɔni kɛ fɔɔ Mariyamu nana jigi Yezu la.