Ala teriw be ɲuman kɛ

Ni teri dɔ b’i fɛ, i be ɲɛbɔ min fɛ ka bonya l’a kan, i b’a ɲini ka kɛ i komi ale. Bibulu ko: “Jehova ka ɲi, a tilennen be.” (Zaburuw 25:8). Walisa an ka kɛ Ala teri ye, an ka kan ka kɛ mɔgɔ ɲumanw ni mɔgɔ tilennenw ye. Bibulu b’a fɔ ko: “Aw ka kɛ Ala ladegebaaw ye i ko den kanulenw, ka tagama kanuya la.” (Efesekaw 5:1, 2). O kɛ cogo dɔw filɛ nin ye:

I ka kɛ mɔgɔ tɔw dɛmɛbaga ye. “An ka ko ɲuman kɛ mɔgɔw bɛɛ ye.”—Galasikaw 6:10.

I ka baara kɛ ni jijali ye. “Min tun bɛ sonyali kɛ, o kana sonyali kɛ tun, nka a ka jija ka baara bɛnnen kɛ ni a yɛrɛ bolow ye.”— Efesekaw 4:28, Alliance biblique universelle 1987.

I saniyalen ka to farikolo ni tagamacogo ta fan fɛ. “An ka an yɛrɛw saniya farisogo nɔgɔlenya ani dusukun nɔgɔlenya bɛɛ la, ka saniyali dafa Ala ɲɛ siran na.”—2 Kɔrɛntekaw 7:1.

I k’i somɔgɔw minɛ ni kanuya ni bonya ye. “Aw bɛɛ kelen kelen ka aw muso kanu i ko aw yɛrɛ kun. Muso fana ka a cɛ bonya. Denmisɛnw, a’ye aw bangebaaw kan minɛ.”— Efesekaw 5:33–6:1.

I ka kanuya yira mɔgɔ tɔw la. “An ka ɲɔgɔn kanu, katuguni kanuya bɔra Ala de la.”—1 Yuhana 4:7.

I ka kolo jamana ka sariyaw ye. “Mɔgɔw bɛɛ ka kolo [gɔfɛrɛnaman] ye . . . Mɔgɔw bɛɛ ka kan ni min ye, a’ye o di u ma. A’ye nisɔngɔ sara nisɔngɔ tigi ye.”—Romɛkaw 13:1, 7.