I ka kɛ Ala teri ye fɔɔ abada!

A be wagati ta ka teri sɔrɔ, a fana be wagati ta ka teri mara. I be jijali min kɛ ka kɛ ani ka to Ala teri ye, i bena duga caaman sɔrɔ o la. Minw lara Yesu la, a y ’a fɔ u ye ko: “Tiɲɛ na aw hɔrɔnya.” ( Yuhana 8:32). O kɔrɔ ye mun ye?

I be se ka hɔɔrɔnya diya bɔ sisan. I be se ka hɔɔrɔnya ka bɔ nkalon diinan ni Sitanɛ ka nkalon kuma jɛnsɛnnenw na. I be se ka hɔɔrɔnya ka bɔ jigitigɛ la, o min ye mɔgɔ miliyɔn caaman ka ɲɛnamaya fa sabu u tɛ Jehova lɔn (Romɛkaw 8:22). Ala teriw hɔɔrɔnyara ka bɔ hali “saya ɲɛ siran” na.—Heburuw 2:14, 15.

I be se ka hɔɔrɔnya diya bɔ Ala ka duniɲa kura kɔnɔ. I be se ka hɔɔrɔnya min diya bɔ sini nata la, o ye kabako ye dɛ! Alijana kɔnɔ dugukolo kan, mɔgɔw bena hɔɔrɔnya ka bɔ kɛlɛ, banaw, ni kojugukɛ la. Ka hɔɔrɔnya ka bɔ fantanya ni kɔngɔ la. Ka hɔɔrɔnya ka bɔ kɔrɔya ni saya la. Ka hɔɔrɔnya ka bɔ siranya, nintɔɔrɔ, ni tilenbaliya la. Bibulu b’a fɔ Ala koo la ko: “I be i tɛgɛ da yɛlɛ ka fɛn ɲɛnamaw bɛɛ wasa u sago la fɛnw la.”—Zaburuw 145:16.

Ala teriw bena ɲɛnamaya kɛ fɔɔ abada. Ɲɛnamaya banbali ye nilifɛn nafaman ye, Ala bena min di mɔgɔ bɛɛ ma, minw kɔni b’a ɲini k’a ka teriya sɔrɔ (Romɛkaw 6:23). I miiri k’a filɛ ɲɛnamaya banbali kɔrɔ be se ka kɛ min ye e fɛ.

I bena wagati sɔrɔ ka koo caaman kɛ. I be ta’a sɔrɔ a bena diya i ye ka fɔlifɛn dɔ fɔcogo dege. Wala a dɔ ra i b’a fɛ ka jaaw ɲɛgɛncogo kalan wala ka kɛ yirilɛsɛla ye. I be ta’a sɔrɔ, a bena diya i ye ka lɔnniya sɔrɔ dantanfɛnw wala yiriw koo la. Wala a fana be se ka kɛ k’i b’a fɛ ka tagama ka jamana ni mɔgɔ sifayaw filɛ. Nin koow bɛɛ bena se ka kɛ ɲɛnamaya banbali sɔrɔli sababu fɛ!

I bena wagati sɔrɔ ka teriya kɛ ni mɔgɔ caaman ye. Ka ɲɛnamaya banbali kɛ, o lo ben’a to mɔgɔ ka se ka mɔgɔ wɛrɛ caaman lɔn, o minw kɛra Ala teriw ye. I ben’a sɔrɔ k’u ka hakilidiyaw n’u ka jogo cɛɲiw lɔn, ani u bena kɛ i teriw ye fana. I bena u kanu, ani u bena i kanu (1 Kɔrɛntekaw 13:8). Ka ɲɛnamaya sɔrɔ daan tɛ min na, o bena wagati di i ma ka teriya sigi ni bɛɛ kelen kelen ye dugukolo kan! Ka tɛmɛ o bɛɛ kan, teriya min be e ni Jehova cɛ o bena barika sɔrɔ ka taga ɲɛ sankɛmɛkuluw tɛmɛtɔ. I ka kɛ Ala teri ye fɔɔ abada!