Walisa i k’i teri mara, fɔɔ i ka kɛ a teri ye

Teriya basigilen be kanuya lo kan. I ka kanuya bena barika sɔrɔ Jehova ta fan fɛ i kɛtɔ ka lɔnniya sɔrɔ ka taga ale koo la. I ka kanuya be bonyana Ala ta fan fɛ minkɛ, a nege bena bonya fana i la ka baara kɛ ale ye. O lo bena i ɲɔndi ka kɛ Yesu ka kalanden dɔ ye (Matiyu 28:19). I kɛtɔ ka jɛn ni Jehova Seerew denbaya hɛɛrɛman ye, i be se ka Ala ka teriya nɛnɛ ka lɔn fɔɔ abada. I ka kan ka mun kɛ?

I ka kan k’i ka kanuya yira Ala la i kɛtɔ ka kolo a ka sariyaw ye. “Ka Ala kanu o ye nin de ye, an ka a ka ci fɔlenw mara. A ka ciw man gwɛlɛ.”—1 Yuhana 5:3.

I be min kalan, i k’o sira tagama. Yesu ye ntalen dɔ la min b’o ɲɛyira. Cɛ hakilitigi dɔ y ’a ka boon lɔ farakolo kan. Cɛ hakilintan dɔ y ’a ka boon lɔ cɛncɛn kan. Sanfɔɲɔba cira tuma min na, boon min lɔra farakolo kan o ma karikari ka ben. Nka boon min lɔra cɛncɛn kan o benko juguyara kɔsɔbɛ. Yesu y ’a fɔ ko mɔgɔ minw b’ale ka kalan lamɛn k’a sira tagama, u bɔlen be cɛ hakilitigi fɛ min ye lɔri kɛ farakolo kan. Nka minw b’ale ka kalan lamɛn n’u t’a sira tagama, olu bɔlen be cɛ hakilintan fɛ min ye lɔri kɛ cɛncɛn kan. E b’a fɛ ka bɔ o cɛw la juman fɛ?— Matiyu 7:24-27.

Yɛrɛkundili. O kɔrɔ ko i b’i magwɛrɛ Jehova la delili kɔnɔ k’a fɔ a ye k’i b’a fɛ k’a sago kɛ fɔɔ abada. Ala sago kɛli b’a yira kɛnɛ kan k’i ye Yesu Kirista ka kalanden dɔ ye.—Matiyu 11:29.

Batiseli. “I ka batise ani i k’i ka jurumuw ko ka bɔ i la i kɛtɔ k’a tɔgɔ mawele.”—Kɛwalew 22:16, NW.

I k’i yɛrɛ di ka dafa Ala ka baara la. “Aw be koo o koo kɛ, a’y ’o baara kɛ n’a dusu bɛɛ ye, i n’a fɔ aw b’a kɛra Jehova ye, aw t’a kɛra mɔgɔ ye.”—Kolosekaw 3:23, NW.