Ɲɛnamaya tun be kɛ cogo di alijɛnɛ kɔnɔ?

Jehova ye fɛɛn ɲuman caaman di Adama ni Awa ma. Zɛnɛzi 1:28

Jehova ye muso fɔlɔ Awa dan, ani a y’a di Adama ma a ka kɛ a muso ye.​—Zɛnɛzi 2:21, 22.

Jehova tun y’u dan, u hakili n’u farikolo tun dafanin lo. Fiɲɛ si tun tɛ u la.

A y’u bila Edɛn nankɔ kɔnɔ: yɔrɔ cɛɲumanba tun lo. Kɔɔw ni bɛgɛnw tun be o yɔrɔ la ani yiri minw be den.

Jehova tun be kuma u fɛ, a tun be u kalan. N’u tun ye mɛnni kɛ a fɛ, u tun bena to niin na fɔɔ abada alijɛnɛ kɔnɔ dugukolo kan.

Ala tun ko u kana yiriw la kelen deen dumu. Zɛnɛzi 2:16, 17

Mɛlɛkɛ dɔ murutira Ala kama. O mɛlɛkɛ jugu ye Sutana Naafigi lo ye.

Jehova ye yiri dɔ yira Adama ni Awa la Edɛn nankɔ kɔnɔ ani k’a fɔ u ye ko n’u y’a deen dumu, u bena sa.

Sutana tun t’a fɛ Adama ni Awa ka mɛnni kɛ Jehova fɛ. O kama, a tɛmɛna saa dɔ fɛ k’a fɔ Awa ye ko Ala ko u kana yiriden min dumu, n’a y’o dumu, a tɛna sa nka a bena kɛ komi Ala. Ayiwa, o kuma tun ye ngalon lo ye.​—Zɛnɛzi 3:1-5.