Ala sagonata ye mun lo ye an koo la?

N’I BE zurunaliw kalan, n’i be telewisɔn filɛ wala n’i be arajo lamɛn, i b’a ye ko kojugukɛ, marifakɛlɛ ani benkannikow ka ca. N’a sɔrɔ bana wala i ka mɔgɔ sɔbɛ dɔ ka saya b’i tɔɔrɔla.

I k’i yɛrɛ ɲininga ko:

• Yala Ala tun b’a fɛ nin lo ka kɛ ne ni n’ somɔgɔw la wa?

• Ne be se ka dɛmɛ sɔrɔ min ka n’ ka kunkow ɲɛnabɔ?

• Yala hɛɛrɛ bena kɛ dugukolo kan loon dɔ wa?

Bibulu b’o ɲiningaliw jaabi ani o jaabiliw be mɔgɔ wasa.

BIBULU B’A FƆ KO ALA BENA YƐLƐMANI KABAKOMANW KƐ DUGUKOLO KAN.

• Mɔgɔ tɛna tɔɔrɔ tugun, mɔgɔ tɛna kɔrɔ wala ka sa tugun.​—Yirali 21:4

• “Senkelenninw bena pan i ko mankalanin.”—Ezayi 35:6

• “Fiɲɛntɔw ɲaa bena yɛlɛ.”​—Ezayi 35:5

• Suuw bena kunu.​—Zan 5:28, 29

• Mɔgɔ si tɛna bana.​—Ezayi 33:24

• Bɛɛ bena dumunifɛn caaman sɔrɔ.​—Zaburuw 72:16

  

A ƝINI KA NAFA SƆRƆ BIBULU KA KALAN NA

I ye min kalan gafe nin ɲɛɛ 4 ani ɲɛɛ 5 kan, kana a miiri ko o ye siko gwansan dama lo ye. Ala ye layidu ta ko a bena o yɛlɛmaniw kɛ dugukolo kan yanni dɔɔni. A bena o kɛ cogo min na, Bibulu b’o ɲɛfɔ.

Nka Bibulu tɛ dan o dɔrɔn ma. An ka ɲi ka koo minw lɔn walisa ka ɲɛnamaya kɛ hɛɛrɛ la kabini sisan yɛrɛ, Bibulu b’o ɲɛfɔ an ye fana. Miiri dɔɔni i yɛrɛ ka haminankow la, i n’a fɔ wariko, denbayako, kɛnɛyako, wala i ka mɔgɔ sɔbɛ dɔ sayako. Bibulu be se k’i dɛmɛ k’o gwɛlɛyaw ɲɛnabɔ. A fana be se ka ɲiningali nunu jaabi k’i dusu saalo:

• Mun na tɔɔrɔ b’an kan?

• An be se k’an ka gwɛlɛyaw ɲɛnabɔ cogo di?

• An ka denbaya be se ka hɛɛrɛ sɔrɔ cogo di?

• Mun lo be kɛ saya kɔ?

• An ka mɔgɔ sɔbɛ minw sara, an bena u ye tugun wa?

• Mun na an be se ka la a la ko Ala bena a ka layiduw bɛɛ dafa?

Komi i be gafe nin kalanna, o b’a yira ko i b’a fɛ k’a lɔn Bibulu be min fɔ. Gafe nin bena i dɛmɛ. Ɲiningali dɔw sɛbɛra ka ɲɛsin dakunw ma. U bena i dɛmɛ ka Bibulu faamu ka ɲɛ. A diyara mɔgɔ miliyɔn caaman ye ka baro kɛ ni Jehova Seerew ye Bibulu kan. An jigi b’a la ko a bena diya e fana ye k’o kɛ. I be jijali min kɛra ka lɔnniya sɔrɔ Bibulu kɔnɔ, an be Ala deli a k’i duga o kosɔn!