KALANSEN 14

Ala b’a fɛ an k’ale bato cogo juman na?

Édition imprimée

I ko an y’a ye kalansen tɛmɛnin na cogo min na, Ala tɛ sɔn diinanw bɛɛ la. Nka, an be se k’an Danbaga bato cogo dɔ la min ka di a ye. Batoli sifa, wala diinan sifa juman lo ka di Ala ye? (Zaki 1:27). An k’a filɛ Bibulu be min fɔ o koo la.

1. An ka batolikow ka ɲi ka basigi mun lo kan?

An ka batolikow ka ɲi ka basigi Bibulu lo kan. Yezu y’a fɔ Ala ye ko: “I ka kuma le ye tiɲɛ ye.” (Zan 17:17). Bibulu ye Ala ka Kuma senuman lo ye. Nka, tiɲɛn kuma minw be sɔrɔ a kɔnɔ, diinan dɔw y’u to yen ani u be tugu adamadenw ka kalanw n’u ka landakow kɔ. Minw be “ban Ala ka sariya la,” u koo man di Jehova ye (Mariki 7:9 kalan). Nka, n’an be Bibulu kalan ani k’a ka ladiliw sira tagama, o ka di Ala ye.

2. An ka ɲi ka Jehova bato cogo di?

Jehova kelenpe lo ka kan ni batoli ye sabu ale lo ye an Danbaga ye (Yirali 4:11). O kɔrɔ ko an ka kan k’a kanu ani k’ale kelenpe dɔrɔn lo bato. An man kan ka tɛmɛ jaaw wala joow fɛ k’a bato.—Ezayi 42:8 kalan.

Walisa an ka batoli ka diya Jehova ye, a ka kan ka kɛ batoli “saniyanin” ye, o kɔrɔ batoli senuman (Ɔrɔmukaw 12:1). O kɔrɔ ko an ka kan k’a ka sariyaw sira tagama. Misali la, minw be Jehova kanu, u b’a ka sariyaw sira tagama furu koo la. Ani, u tɛ sɔn delinanko jugu dɔw ma i n’a fɔ ka sigarɛti min, ka siramugu mugan, ka dɔrɔgi ta wala ka dɔrɔ min k’a dama tɛmɛ.a

3. Mun na an ka ɲi ka Jehova bato n’a sagokɛla wɛrɛw ye?

An be lajɛn minw kɛ lɔgɔkun o lɔgɔkun, u be sababu di an ma ka Jehova “tando . . . jamalajɛnyɔrɔw ra.” (Zaburuw 111:1, 2, Biblu Ala ta Kuma). An b’o kɛ cogo minw na, u la dɔ ye ka tandoli dɔnkili la a ye (Zaburuw 104:33 kalan). Jehova b’a fɛ an ka taga lajɛnw na sabu a b’an kanu ani a b’a lɔn ko lajɛnw bena an dɛmɛ ka ɲɛnamaya kɛ hɛɛrɛ la fɔɔ abada. Lajɛnw na, an be tɔɔw jija, ani olu fana b’an jija.

A ƝINI KA DƆ LƆN TUGUN

An k’a filɛ fɛɛn min kama Jehova t’a fɛ an ka tɛmɛ jaaw fɛ k’ale bato. Ani an k’a filɛ cogo jɔnjɔn minw na an be se ka Ala tando.

4. An man kan ka tɛmɛ jaaw fɛ ka Ala bato

An b’a lɔn cogo di ko o man di Ala ye? A’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:

VIDEWO: Ala b’a fɛ an ka tɛmɛ jaaw fɛ k’ale bato wa? (3:26)

Jaa fɔlɔ: Cɛɛ dɔ be delili kɛra dumuni tasaw ni jaa dɔ ɲɛfɛ. Jaa 2nan: Sapele be cɛɛ dɔ bolo, a be delili kɛra Mariyamu senu ɲɛfɛ.

Galen, Ala sagokɛla dɔw y’a ɲini ka tɛmɛ jaa dɔ fɛ walisa ka Ala bato. Mun lo kɛra o kosɔn?

A be dɔw ɲɛɛ na k’u magwɛrɛnin lo Ala la n’u be tɛmɛ jaaw fɛ k’a bato. Nka, kɔni o yɛrɛ lo t’a to Ala b’a yɔrɔ janya u la dɛ? Ɛkizɔdi 20:4-6 ani Zaburuw 106:35, 36 kalan. O kɔ, a’ ye ɲiningali nunu kɛ ani ka baro kɛ u kan:

Mɔgɔw ka teli ka tɛmɛ jaaw wala fɛɛn jumanw lo fɛ ka Ala bato?
Jehova be mun lo miiri o koo la?
Ele do, e be mun lo miiri o koo la?

5. N’an be Jehova kelenpe bato, o bena an hɔɔrɔnya ka bɔ ngalon lannakow la

N’an be Jehova bato cogo bɛnnin na, o be se k’an hɔɔrɔnya ka bɔ ngalon lannakow la. Cogo di do? A’ ye VIDEWO filɛ.

VIDEWO: Tiɲɛn lɔnniya y’a hɔɔrɔnya (5:16)

Zaburuw 91:14 kalan. O kɔ, a’ ye ɲiningali nin kɛ ani ka baro kɛ o kan:

N’an be Jehova kelenpe dɔrɔn lo bato, o b’a yira ko an b’a kanu. A y’a daa di ko a bena mun lo kɛ an ye o kosɔn?

6. An be Jehova bato kafo ka lajɛnw na

Kafo ka lajɛnw be sababu di an ma ka lakalitaw kɛ ani ka dɔnkiliw la. O cogo la, an be Jehova tando ani an be ɲɔgɔn jija. Zaburuw 22:23 kalan. O kɔ, a’ ye ɲiningali nunu kɛ ani ka baro kɛ u kan:

I ye lakalita minw mɛn kafo ka lajɛnw na, u diyara i ye wa?
A bena diya i ka lakalita dɔ labɛn ani k’a kɛ wa?

Jaaw: Ala ka ɲi ka bato cogo bɛnnin min na, muso dɔ b’a yɛrɛ degira o la. Jaa fɔlɔ: A be dɔnkili lara Ala ye kafo ka lajɛn dɔ la. Jaa 2nan: A be lakalita dɔ kɛra kafo ka lajɛn na. Jaa 3nan: A be videwo dɔ yirala muso dɔ n’a denmuso la, o videwo basiginin be Bibulu kan.

7. An be min kalan, n’an b’o kofɔ mɔgɔ wɛrɛw ye, o ka di Jehova ye

Sababu caaman b’an fɛ ka Bibulu ka tiɲɛnkalanw kofɔ mɔgɔw ye. Zaburuw 9:2 ani 34:2 kalan. O kɔ, a’ ye ɲiningali nin kɛ ani ka baro kɛ o kan:

I ye mun lo kalan Bibulu kɔnɔ i b’a fɛ ka min fɔ mɔgɔ wɛrɛ ye?

NI MƆGƆ DƆ Y’A FƆ I YE KO: “Mɔgɔ tɛ se k’a koo diya Ala ye.”

E be mun lo miiri?

MIIRIYA JƆNJƆN

Walisa an ka batoli ka diya Ala ye, fɔɔ an k’ale kelenpe lo bato ani k’a tando kafo ka lajɛnw na. An be min kalanna a koo la, an k’o kofɔ fana tɔɔw ye.