KALANSEN 30
I ka mɔgɔ sɔbɛ minw sara, u be se ka kunu!
N’an ka mɔgɔ dɔ banna, o b’an dusu kasi kosɔbɛ. O lo kama, Bibulu b’a fɔ ko saya ye an jugu ye (1 Korɛntikaw 15:26). Kalansen 27nan na, an y’a ye ko Jehova bena saya ban. Nka mɔgɔ caaman minw sara ka ban do? Jehova ye layidu ta ko a bena mɔgɔ miliyari caaman lakunu ka bɔ saya la walisa u ka ɲɛnamaya kɛ fɔɔ abada. Kalansen nin na, i bena kunnafoni wɛrɛw sɔrɔ o layidu kabakoman koo la. Jehova bena suuw kunu. O be se ka kɛ tiɲɛn tiɲɛn na wa? U bena kunu walisa ka ɲɛnamaya kɛ sankolo la wala dugukolo kan?
1. An ka mɔgɔ sɔbɛ minw banna, Jehova b’a fɛ ka mun lo kɛ u ye?
Mɔgɔ minw sara, u ɲɛnafin be Jehova la. A b’a fɛ sɔbɛ la k’u lakunu. Cɛɛ limaniyanin Zɔbu tun lanin b’a la kosɔbɛ ko n’a sara, Ala tɛna ɲinɛ a kɔ. A y’a fɔ Ala ye ko: “I bena weeleli kɛ, ne fana bena i jaabi [ka n’ to kaburu kɔnɔ].”—Zɔbu 14:13-15, NW.
2. An b’a lɔn cogo di ko suuw be se ka kunu?
Tuma min na Yezu tun be dugukolo kan, Ala ye see di a ma ka suuw kunu. Yezu ye saan 12 sungurunin dɔ suu kunu. A ye firiyamuso dɔ dencɛ suu kunu fana (Mariki 5:41, 42; Luka 7:12-15). Kɔfɛ, a tericɛ Lazari sara. Hali k’a sɔrɔ u tun ye Lazari suu don kabi tile naani, Yezu y’a suu kunu. Yezu ye Ala deli ani a y’a fɔ ni kaanba ye dɔrɔn ko: “Lazari, wili ka bɔ.” “Lazari min tun sara, a kununna ka bɔ kaburu la,” a ɲɛnaman tun lo! (Zan 11:43, 44). Miiri k’a filɛ Lazari somɔgɔw n’a teriw ninsɔndiyara cogo min na!
3. I ka mɔgɔ sɔbɛ minw sara, jigiya juman be yen u koo la?
Bibulu b’a fɔ ko: ‘Suuw bɛna kunu.’ (Kɛwaliw 24:15, Biblu Ala ta Kuma). Yezu tun ye mɔgɔ minw kunu ka bɔ saya la, u ninsɔndiyara ka kɛ ɲɛnamaya la tugun yan dugukolo kan. U tun ma taga sankolo la u sanin kɔ (Zan 3:13). O cogo kelen na, yanni dɔɔni, Yezu bena mɔgɔ miliyari caaman lakunu ka bɔ saya la walisa u ka ɲɛnamaya kɛ fɔɔ abada alijɛnɛ kɔnɔ dugukolo kan. A y’a fɔ ko Ala ye mɔgɔ sanin minw koo mara a hakili la, a bena olu bɛɛ lakunu ka bɔ saya la, hali ni mɔgɔw ɲinɛna u kɔ.—Zan 5:28, 29.
A ƝINI KA DƆ LƆN TUGUN
An ka dalilu wɛrɛw lajɛ Bibulu kɔnɔ minw b’a yira ko suuw be se ka kunu ani ko u bena kunu tiɲɛn tiɲɛn na. An k’a filɛ fana cogo min na sukununi koo be se k’an dusu saalo ani k’an jigi tugu.
4. Yezu y’a yira ko see b’a ye ka suuw kunu
Yezu ye min kɛ a tericɛ Lazari ye, an ka kunnafoni wɛrɛw lajɛ o koo la. Zan 11:14, 38-44 kalan. O kɔ, a’ ye ɲiningali nunu kɛ ani ka baro kɛ u kan:
Mun lo b’a yira ko Lazari tun sara tiɲɛn tiɲɛn na?—Vɛrise 39 lajɛ.
Lazari sanin kɔ, n’a tun tagara sankolo la, yala Yezu tun ben’a kɛ a be kɔsegi ka na dugukolo kan wa?
5. Mɔgɔ miliyari caaman suuw bena kunu!
Zaburuw 37:29 kalan. O kɔ, a’ ye ɲiningali nin kɛ ani ka baro kɛ o kan:
Suu minw bena kunu, u bena ɲɛnamaya kɛ min?
Jehova sagokɛla minw sara, Yezu tɛna olu dɔrɔn lo kunu. Kɛwaliw 24:15 kalan. O kɔ, a’ ye ɲiningali nin kɛ ani ka baro kɛ o kan:
A bena diya i ye ka jɔn lo ye a kununi kɔ ka bɔ saya la?
A ka nɔgɔ Yezu ma ka suu kunu i ko a ka nɔgɔ facɛman dɔ ma k’a dencɛ kunu ka bɔ sinɔgɔ la cogo min na.
6. Sukununi koo be se ka mɔgɔ dusu saalo ani ka jigiya di an ma
Minw dusu kasinin lo u ka mɔgɔ dɔ saya kosɔn, Zayirus denmuso sukununi koo ye u caaman dusu saalo ani k’u jija. O maana ye tiɲɛnko lo ye. A’ y’o kalan Luka 8:40-42, 49-56 la.
Sanni Yezu ka Zayirus denmuso suu kunu, a y’a fɔ Zayirus ye ko: “Kana siran, la Ala la dɔrɔn.” (Vɛrise 50 lajɛ). Sukununi jigiya be se k’i dɛmɛ cogo di . . .
n’i ka mɔgɔ sɔbɛ dɔ sara?
n’i niin be farati la?
A’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:
Sukununi jigiya ye Felisiti wolobagaw dusu saalo ani k’u jija cogo di?
NI MƆGƆ DƆ Y’A FƆ I YE KO: “Ni mɔgɔ sara, a be taga sankolo la.”
E be mun lo miiri?
I bena vɛrise jumanw lo kalan k’a yira ko suuw fanba bena kunu ka ɲɛnamaya kɛ dugukolo kan?
MIIRIYA JƆNJƆN
Bibulu b’a fɔ ko mɔgɔ miliyari caaman suuw bena kunu. Jehova b’a fɛ u ka ɲɛnamaya kɛ kokura, ani a ye see di Yezu ma a k’u lakunu.
I ye mun lo faamu?
An b’a lɔn cogo di ko minw sara, u ɲɛnafin be Jehova ni Yezu la ani ko u bena u lakunu?
Mɔgɔ miliyari caaman suu minw bena kunu, u bena ɲɛnamaya kɛ min: sankolo la wala dugukolo kan? Mun na i ko ten?
I ka mɔgɔ sɔbɛ minw sara, mun na i lanin b’a la k’u be se ka kunu?
NUNU LAJƐ FANA
Ladili dɔw, minw be se k’i dɛmɛ n’i ka mɔgɔ dɔ banna.
“Quand on perd quelqu’un qu’on aime” (Saan 2018 ka Réveillez-vous ! No 3)
N’an dusu kasinin lo sabu an ka mɔgɔ dɔ banna, Bibulu ka sariyakolow be se k’an dɛmɛ tiɲɛn tiɲɛn na wa?
Denmisɛnw be se k’u ka mɔgɔ sɔbɛ saya koo muɲu cogo di?
Suu dɔw bena kunu ka taga sankolo la wa? Ala tɛna mɔgɔ sifa jumanw lo suuw kunu?