KALANSEN 59
N’u b’i kɛlɛla i ka limaniya kosɔn, i be se k’o muɲu
A mɛɛn o mɛɛn, kerecɛn sɔbɛw bɛɛ bena kɔrɔbɔli sɔrɔ, hali tɔɔrɔ yɛrɛ. Yala o ka ɲi ka siranya bila an na wa?
1. N’u b’an kɛlɛla an ka limaniya kosɔn, mun na o man kan ka bari an na?
Bibulu b’a fɔ ka gwɛ ko: “Mɔgɔ minw bɛɛ b’a fɛ ka jɛn ni Yezu Krista ye ka kɛ Alaɲasiranbagaw ye sɔbɛ la, olu bena tɔɔrɔ sɔrɔ.” (2 Timote 3:12). U ye Yezu tɔɔrɔ sabu a tɛ Sutana ka duniɲa nin ta ye. An fana tɛ duniɲa nin ta ye. O kama, ni duniɲa nin ka gofɛrɛnɛmanw ani diinan jɛnkuluw b’an kɛlɛla, o tɛ bari an na.—Zan 15:18, 19.
2. An be se k’an yɛrɛ labɛn cogo di kɔrɔbɔli kama?
Kabini sisan le an ka kan k’an jigi la kosɔbɛ Jehova kan. O kama, wagati kunmabɔ loon o loon walisa k’a deli ani k’a ka Kuma kalan. To ka taga kafo ka lajɛnw na tuma bɛɛ. O koow bena fanga di i ma ka kɔrɔbɔli sifa bɛɛ muɲu ni jagwɛlɛya ye hali n’o bɔra i somɔgɔw lo la. Ciden Pol ye kɔrɔbɔli caaman sɔrɔ. A y’a sɛbɛ ko: “Matigi ye ne dɛmɛbaga ye, ne tena siran foyi ɲa.”—Eburuw 13:6.
N’an be waajuli kɛ tuma bɛɛ, o fana be dɔ fara an ka jagwɛlɛya barika kan. Ka fara o kan, o b’an dɛmɛ k’an jigi la Jehova kan ani ka see sɔrɔ adamaden ɲɛsiran kan (Talenw 29:25). O la, hali ni duniɲa nin ka gofɛrɛnɛmanw nana bali sigi an ka baara kan, a tɛna gwɛlɛya an ma ka waajuli kɛ ni jagwɛlɛya ye.—1 Tesalonikaw 2:2.
3. N’u b’an kɛlɛla an ka limaniya kosɔn, nafa juman lo b’a la k’o muɲu?
Tiɲɛn lo ko n’u b’an kɛlɛla an ka limaniya kosɔn, o tɛ ninsɔndiyako ye. Nka, n’an sera k’o muɲu, o b’an ka limaniya barika bonya kosɔbɛ. N’a b’an ɲɛɛ na ko fanga bɛrɛ t’an na tugun, ani an y’a ye ko Jehova b’an dɛmɛna, o b’a to an b’an magwɛrɛ a la kosɔbɛ (Zaki 1:2-4 kalan). N’an be tɔɔrɔla, o be Jehova dusu kasi. Nka n’a ye ko an be kɔrɔbɔli muɲuna, o b’a ninsɔndiya. Bibulu b’a fɔ ko: “N’u b’i tɔɔrɔla k’a sɔrɔ i ye koɲuman kɛ, i do be o muɲuna Ala kosɔn, o ka ɲi kosɔbɛ.” (1 Piyɛri 2:20). Minw be muɲuli kɛ kantigiya la, Jehova bena olu sara. U bena ɲɛnamaya banbali sɔrɔ Jehova ka duniɲa kura kɔnɔ o min na mɔgɔ si tɛna u kɛlɛ tugun tiɲɛn batoli kosɔn.—Matiyo 24:13.
A ƝINI KA DƆ LƆN TUGUN
An k’a filɛ fɛɛn min kama an be se ka to kantigiya la hali n’u b’an kɛlɛla an ka lannakow kosɔn, ani Jehova bena an sara cogo min na.
4. N’i somɔgɔw b’i kɛlɛla i ka lannakow kosɔn, i be se k’o muɲu
Yezu tun y’an lasɔmi ko n’a sɔrɔ a tɛna diya an somɔgɔ dɔw ye k’a ye ko an be Jehova batora. Matiyo 10:34-36 kalan. O kɔ, a’ ye ɲiningali nin kɛ ani ka baro kɛ o kan:
Ni mɔgɔ dɔ y’a latigɛ ka Jehova bato, a somɔgɔw be se k’o koo ta cogo di?
Walisa k’o lɔn, a’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:
N’i somɔgɔ wala i teri dɔ y’a ɲini k’i bali ka Jehova bato, i bena mun lo kɛ do?
Zaburuw 27:10 ani Mariki 10:29, 30 kalan. Vɛrise kelen kelen bɛɛ kalannin kɔ, a’ ye ɲiningali nin kɛ ani ka baro kɛ o kan:
O layidu be se k’i dɛmɛ cogo di n’i somɔgɔ wala i teri dɔ y’a ɲini k’i bali ka Jehova bato?
5. Kɔrɔbɔli bɛɛ n’a ta, to ka Jehova bato
Ni tɔɔw b’a ɲinina k’an bali ka Jehova bato, fɔɔ an k’an jaa gwɛlɛya le. A’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:
Mun lo diyara i ye videwo nin na min y’i jija kosɔbɛ?
Kɛwaliw 5:27-29 ani Eburuw 10:24, 25 kalan. Vɛrise kelen kelen bɛɛ kalannin kɔ, a’ ye ɲiningali nin kɛ ani ka baro kɛ o kan:
Mun na a kɔrɔtanin lo an ka to ka Jehova bato hali ni bali sigira an ka waajuli baara n’an ka lajɛnw kan?
6. Jehova bena i dɛmɛ ka muɲuli kɛ
Kɔrɔbɔli bɛɛ n’a ta, Jehova Seere caaman tora kantigiya la Jehova ye, u sanda wala u bɔyɔrɔ mana kɛ min o min ye. Mun lo y’u dɛmɛ? Walisa k’o lɔn, a’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:
Mun lo y’o balimaw dɛmɛ u sera ka muɲuli kɛ?
Ɔrɔmukaw 8:35, 37-39 ani Filipikaw 4:13 kalan. Vɛrise kelen kelen bɛɛ kalannin kɔ, a’ ye ɲiningali nin kɛ ani ka baro kɛ o kan:
O vɛrisew b’i hakili sigi cogo di ko i be se ka gwɛlɛya sifa bɛɛ muɲu?
Matiyo 5:10-12 kalan. O kɔ, a’ ye ɲiningali nin kɛ ani ka baro kɛ o kan:
Kɔrɔbɔli bɛɛ n’a ta, mun na i ninsɔndiyanin be se ka to?
Kɔrɔbɔli bɛɛ n’a ta, Jehova Seere miliyɔn caaman be baara kɛra Jehova ye kantigiya la. Ele fana be se k’o kɛ!
NI MƆGƆ DƆ Y’A FƆ I YE KO: “Ne kɔni tɛ se ka kɔrɔbɔli muɲu dɛ!”
Vɛrise jumanw lo be se k’a tigi hakili sigi?
MIIRIYA JƆNJƆN
Kɔrɔbɔli bɛɛ n’a ta, an be jijali min kɛ walisa ka baara kɛ Jehova ye, a b’o jati fɛɛnba ye. A ka dɛmɛ barika la, an be se ka kɔrɔbɔli muɲu!
I ye mun lo faamu?
N’u be kerecɛnw kɛlɛ u ka lannakow kosɔn, mun na o man kan ka bari u la?
I be se ka mun lo kɛ kabini sisan walisa k’i yɛrɛ labɛn kɔrɔbɔli kama?
Mun lo be se k’a to i be la a la ko i be se ka baara kɛ Jehova ye gwɛlɛya sifa bɛɛ n’a ta?
NUNU LAJƐ FANA
U ye balimacɛ kanbele dɔ don kaso la a ka limaniya kosɔn. A b’a ɲɛfɔ Jehova y’a dɛmɛ cogo min na ka muɲuli kɛ.
A filɛ fɛɛn min ye cɛɛ dɔ n’a muso dɛmɛ ka baara kɛ Jehova ye saan caaman kɔnɔ, kɔrɔbɔli bɛɛ n’a ta.
A filɛ i be se k’i jaa gwɛlɛya cogo min na ka kɔrɔbɔli muɲu.
“I yɛrɛ labɛn kabi sisan kɔrɔbɔli kama” (Saan 2019, zuwekalo ka Kɔrɔsili Sangaso)
N’an somɔgɔw b’an kɛlɛla an ka lannakow kosɔn, an ka ɲi k’o koo ta cogo di? Ani an be se ka mun lo kɛ walisa k’o muɲu?