Koo ɲumanw, minw bena kɛ yanni dɔɔni!

“Yanni dɔɔni, mɔgɔjugu bena tunu. . . . Mɔgɔmajigininw bena jamana nin tigiya kɛ, u bena hɛrɛ dafanin sɔrɔ.”—ZABURUW 37:10, 11.

KIRAYA kuma min be sɔrɔ sanfɛ, a bena diya i ye n’o dafara wa? An lanin b’a la k’o bena diya i ye. Dalilu barikamanw b’a yira k’o bena kɛ yanni dɔɔni.

An tun kɔnna ka kuma kiraya kuma minw koo la, olu b’a yira ka gwɛ ko an be “laban tuma na.” (2 Timote 3:1-5). Ala tɛmɛna a ka hakili senu fɛ ka Bibulu sɛbɛbagaw lasun u k’o koow sɛbɛ walisa ka jigiya di an ma (Ɔrɔmukaw 15:4). O kiraya kumaw be dafara minkɛ, o b’a yira ko gwɛlɛya minw b’an kan bi bi nin na, u bena ban yanni dɔɔni.

Mun lo bena kɛ laban tuma tɛmɛnin kɔ? Ala ka Masaya bena adamadenw bɛɛ mara (Matiyo 6:9). Ɲɛnamaya bena kɛ cogo min na dugukolo kan, a filɛ Bibulu be min fɔ o koo la:

● Kɔngɔ bena ban. “A to suman ka ɲa jamana yɔrɔ bɛɛ, suman tisan ka sɔrɔ kuluw kan.”—Zaburuw 72:16.

● Mɔgɔ tɛna bana tugun. “[Mɔgɔ] si ten’a fɔ ko: ‘Ne man kɛnɛ.’ ”—Ezayi 33:24.

● Dugukolo bena lakuraya. “Nisɔndiya ka sɔrɔ kongokolon la ni dugukolo janin kan. Ɲanagwɛ ka kɛ dugukolo lakolon kan, feeren ka bɔ yen.”—Ezayi 35:1.

Kiraya kuma minw be sɔrɔ Bibulu kɔnɔ, an y’u la damanin dɔrɔn lo lajɛ. U bena dafa yanni dɔɔni. Mun na i t’a ɲini Jehova Seerew fɛ u k’a yira i la fɛɛn min kama u lanin b’a la k’o koo ɲumanw bena kɛ yanni dɔɔni?