A ka di Jehova ye i k’a fɔ “amiina”

AN KA batoli ka di Jehova ye kosɔbɛ. A b’a ‘tulo malɔ an ka kuma na, k’a janto a la.’ An be koo o koo kɛ walisa k’a tando, a mana dɔgɔya cogo o cogo, a b’a janto o la (Mal. 3:16). Ɲɛyirali fɛ, an ka kumaden dɔ lajɛ an be min fɔ siɲɛ caaman ko “amiina.” Kumaden gwɛlɛ tɛ. Nka, yala a nafa ka bon Jehova ɲɛɛ kɔrɔ wa? Ɔnhɔn, a nafa ka bon! Walisa k’o faamu, an k’a filɛ o kumaden kɔrɔ ye min ye. Jehova sagokɛlaw tun be “amiina” fɔ koo minw sen fɛ, an bena o fana lajɛ.

“JAMA BƐƐ BEN’A LAMINƐ KO: ‘AMIINA’”

Julakan na, “amiina” kɔrɔ ko “o ka kɛ ten” wala “o lo jaatika.” A jujɔn bɔra eburukan kumaden dɔ la min kɔrɔ ko “kɛ kantigi ye” wala “kɛ lannamɔgɔ ye.” Tuma dɔw la, o kumaden tun be fɔ ka ɲɛsin kitikow ma. Mɔgɔ tun mana a daa di koo dɔ la, a tun b’a fɔ ko “amiina.” A tun b’o fɔ walisa k’a yira ko a ka kuma ye tiɲɛn ye ani ko a sɔnna a nɔfɛkow bɛɛ ma (Nɔnb. 5:22). Mɔgɔ tun mana a fɔ “amiina” jama cɛma, a ye min fɔ, waajibi tun lo a k’o kɛ.—Neemi 5:13.

Deteronɔmu sapitiri 27nan kɔnɔ, “amiina” fɔra cogo kabakoman na. Israɛldenw donnin kɔ layidu jamana na, u ye ɲɔgɔn lajɛn Ebali ani Garizimu kuluw furancɛ la. U y’o kɛ walisa ka Ala ka sariya kalan lamɛn. U tun man kan k’o sariya lamɛn dɔrɔn, nka u tun ka ɲi k’a yira ko u sɔnna a ma. Koo minw tun bena u sɔrɔ n’u m’o sariya labato, o koow kalantɔ, u tora k’a fɔ “amiina!” (Deter. 27:15-26). Miiri k’a filɛ mɔgɔ waa caaman, cɛɛw, musow ani denmisɛnw y’o fɔ ni kaanba ye cogo min na! (Zozuwe 8:30-35). Siga t’a la, u ye min fɔ o loon na, u ma ɲinɛ o kɔ abada. U y’u ka kuma labato sabu Bibulu b’a fɔ ko: “Isirayɛlidenw tun tora ka Masaba bato Zozuwe ka tile bɛɛ la. Zozuwe sanin kɔ, cɛkɔrɔba minw tun be Masaba ka koo kɛta bɛɛ kala ma, Isirayɛlidenw ye Masaba bato olu ka tile la fana.”—Zozuwe 24:31.

Yezu fana y’a fɔ “amiina” walisa k’a yira ko min fɔra, o ye tiɲɛn ye. Nka, ale m’o fɔ i ko tɔɔw be deli k’a fɔ cogo min na. Yezu tun t’a fɔ “amiina” (julakan na, o bayɛlɛmana ko “tiɲɛn na”) walisa k’a yira ko a sɔnna mɔgɔ dɔ ka fɔta ma. Nka, a tun b’o fɔ walisa ka tiɲɛnkuma dɔw dadon. Tuma dɔw la, a y’o kumaden fɔ ka tugu tugu ɲɔgɔn kɔ ko: “Amiina amiina” (o bayɛlɛmana ko “tiɲɛ tiɲɛ na”) (Mat. 5:18; Zan 1:51). A y’o kɛ walisa k’a yira a lamɛnbagaw la ko a be min fɔra, o ye wulibali ye. Yezu tun be se ka kuma o cogo la sabu sira dira ale lo ma ka Ala ka layiduw bɛɛ dafa.—2 Kor. 1:20; Yir. 3:14.

“JAMA BƐƐ Y’A JAABI KO: ‘AMIINA. [AN] KA MASABA TANU!’”

Israɛldenw fana tun b’a fɔ ko “amiina” n’u tun be Jehova tandora ani n’u tun b’a delila (Neemi 8:6; Zab. 41:14). U tun b’a fɔ “amiina” walisa k’a yira ko min fɔra delili la, u sɔnna o ma. O la, minw bɛɛ tun be yen, olu tun b’u niin don Jehova batoli koo la ani ka ninsɔndiya sɔrɔ o la. O lo kɛra tuma min na masacɛ Dawuda ye Jehova ka layidu tagamasiɲɛ kɛsu ta ka taga n’a ye Zeruzalɛmu. O kɔ, u ye ɲɛnagwɛ dɔ kɛ. O sen fɛ, Dawuda ye delili kɛ n’a dusu bɛɛ ye dɔnkili dɔ la min be sɔrɔ 1 Tilew Kibaru 16:8-36 kɔnɔ. Dawuda ka kumaw ye jama dusu sɔrɔ fɔɔ u “bɛɛ y’a jaabi ko: ‘Amiina. [An] ka Masaba tanu!’” Tiɲɛn na, u bɛɛ y’u kaan kɛ kelen ye ka Jehova jaabi minkɛ, o ye dɔ fara u ka ninsɔndiya kan o loon na.

Kerecɛn fɔlɔw fana tun b’a fɔ “amiina” n’u tun be Jehova tandora. Bibulu sɛbɛbagaw y’a fɔ tuma caaman ko “amiina” u ka lɛtɛrɛw kɔnɔ (Ɔrɔm. 1:25; 16:27; 1 Piyɛri 4:11). Yirali ka kitabu kɔnɔ, a fɔra yɛrɛ ko mɛlɛkɛw be Jehova tando sankolo la ko: “Jaati! Aleluya! Amiina!” (Yir. 19:1, 4). Delili kɛnin kɔ lajɛnw na, kerecɛn fɔlɔw tun be deli k’a fɔ “amiina” (1 Kor. 14:16). Nka, u tun tɛ to k’o fɔ u kunfɛ.

MUN NA A KƆRƆTANIN LO AN K’A FƆ “AMIINA”?

An y’a ye Jehova sagokɛlaw tun be “amiina” fɔ koo minw sen fɛ. An k’a filɛ sisan fɛɛn min kama a kɔrɔtanin lo an ka delili kuncɛ ni “amiina” ye. N’an b’an ka delili kuncɛ ni “amiina” ye, an b’a yira ko an ye min fɔ, an b’o lo fɛ jaatika! Ni delili kɛra jama tɔgɔ la, n’an y’a fɔ “amiina,” an b’a yira ko min fɔra, an sɔnna o ma. An k’a filɛ kuun wɛrɛ minw kama an b’a fɔ “amiina.”

An b’an tulo malɔ ka deliliw lamɛn sabu an ka batoli faan dɔ lo. An b’a yira ko an be Jehova bato n’an b’a fɔ “amiina” delili bannin kɔ. Nka o dɔrɔn tɛ. An b’o yira fana n’an be ni kɛcogo ɲuman ye delili tuma na. Komi an b’a fɛ k’a fɔ “amiina” ni kɔnɔgwɛ ye, o b’a to an b’an tulo malɔ koɲuman ka delili lamɛn.

Delili b’an n’an balimaw ka kelenya sabati. Delili kɛtɔ kafo kɔnɔ, kafodenw bɛɛ be jɛn k’o lamɛn (Kɛw. 1:14; 12:5). N’an jɛnna n’an balimaw ye k’a fɔ “amiina,” o b’an ka kelenya sabati. An y’a fɔ ni kaanba ye wo wala an kaan jukɔrɔ wo, o be se k’a to Jehova b’an ka delili jaabi.

Balimamuso dɔ y’a kuun biri delili lamɛntɔ telefɔni na lajɛn dɔ la — An be Jehova tando n’an b’a fɔ “amiina”

An be Jehova tando. An be koo o koo kɛ an ka batoli la, Jehova b’o bɛɛ kɔrɔsi (Luka 21:2, 3). A b’an ka ŋaniya n’an ka miiriya lɔn. Hali n’an be lajɛnw lamɛnna telefɔni lo fɛ, an ka la a la ko n’an y’a fɔ ko “amiina,” Jehova b’o kɔrɔsi. N’an y’a fɔ “amiina,” an b’an kaan fara tɔɔw ta kan ka Jehova tando.

N’a sɔrɔ an b’a jati ko nafa bɛrɛ t’a la k’a fɔ “amiina.” Nka, o kumaden kɔrɔ ka bon. Bibulu sɛgɛsɛgɛ gafe dɔ y’a fɔ ko Ala sagokɛlaw be se k’a yira o kumaden kelen fɛ “k’u lanin be Ala la, a koo ka di u ye kosɔbɛ ani ko jigiya sɔbɛ b’u la.” O la, an be “amiina” o “amiina” fɔ, o ka diya Jehova ye.—Zab. 19:15.

YALA AN KA ƝI K’A FƆ TUMA BƐƐ KO “AMIINA” WA?

“Amiina” ye kumaden ye min kɔrɔtanin lo. O la, mɔgɔ min be delili kɛra, n’a filila a ka kumaw na do? Yala an ka ɲi ka ban k’a fɔ ko “amiina” wa? Ayi, waajibi tɛ. Jehova b’a lɔn ko an bɛɛ be fili kumaw na tuma dɔw la ani a t’o jati. O kama, ni balima dɔ be delili kɛra, a b’a ɲinina ka miiriya min fɔ, an ka sinsin o kan sanni ka sinsin kumadenw kan. O la, an bena a ye ko an be se k’a fɔ ko “amiina.”

Nka mɔgɔ min be delili kɛra, ni Jehova sagokɛla tɛ, an man ɲi k’a fɔ ni kaanba ye wala an kaan jukɔrɔ ko “amiina.” N’an y’an yɛrɛ sɔrɔ jama cɛma ani o delili ɲɔgɔn be kɛra, an ka ɲi ka mun lo kɛ do? Ɲɛyirali fɛ, koo minw tɛ diinanko ye, an be se ka taga o dɔ la ani u b’a ɲini dɔ fɛ a ka delili kɛ. Wala n’a sɔrɔ an somɔgɔ dɔw tɛ Jehova Seerew ye ani sotigi dannabali b’a latigɛ ka delili kɛ bɛɛ tɔgɔ la. An ka ɲi ka mun lo kɛ do?

O koo ɲɔgɔn na, an be se k’an daa je ani ka koow kɛ ni bonya ye. An tɛna a fɔ “amiina” ani an tɛna tɔɔw bolo minɛ delili tuma na. N’o tɛ, an bena a yira ko an b’an niin donna o delili la. An be se k’a latigɛ k’an yɛrɛla delili kɛ an daa jukɔrɔ. N’an y’o kɛ, an ka “amiina” fɔ an daa jukɔrɔ fana. N’o tɛ, u bena a miiri ko an y’an daa don u ka delili la. Ni mɔgɔw wulila ka lɔ, an yɛrɛ lo ka ɲi k’a latigɛ n’an bena wuli wala n’an tɛna wuli. Ka wuli ka lɔ wala k’an kuun biri, o tɛ batoli ye. Ka kɛɲɛ ni koow cogoya ye, kerecɛn kelen kelen bɛɛ lo ka ɲi k’a latigɛ min ka fisa ale ma. O koo ɲɔgɔn na, kerecɛn mana min o min latigɛ, mɔgɔ si man ɲi k’a kɔrɔfɔ o kosɔn.

An ye koo minw fɔ ka tɛmɛ, u b’an dɛmɛ k’a faamu fɛɛn min kama “amiina” kɔrɔtanin lo Jehova fɛ.