An be kodumanw siman tigɛ ka kɛɲɛ n’an ka jijali kɛli ye

¹ Jehova Ala y’a ka kanuya yira hadamadenw na cogo caaman na. Ala ka kanuya min ɲɔgɔn tɛ yen, Yesu y’o yira ka gwɛ. Loon dɔ la, a y’a yira jama lajɛnnen na ko Ala “be a ka tile bɔ mɔgɔ juguw ni mɔgɔ ɲumanw bɛɛ ye. A be sanji di mɔgɔ tilennenw ni mɔgɔ tilenbaliw bɛɛ ma.” (Mat. 5:43-48). Loon wɛrɛ, Yesu y’a yira ko a Facɛ y’a ka kanuya yira cogo kabakoman nin na: a y’a dencɛ kelenpe bangelen di saraka la an ka kisili kama ( Yuh. 3:16). Yesu y’a lamɛnbagaw jija u ka Jehova ka kanuya waleɲuman lɔn. Yala an b’an jija k’o lo kɛ wa?

² N’an b’a fɛ k’an ka waleɲumanlɔn bɛɛ yira ani ka nafa banbaliw sɔrɔ Jehova ka kanuya la, fɔɔ an ka lɔnniya sɔrɔ a koo la ( Yuh. 17:3). An mako be ladili ni ɲɛminɛli la walisa a ka sɔn an ka baara la. Jehova y’a yira ko a b’a janto an na ni kanuya ye, a kɛtɔ ka Bibulu, a ka Kuma senuman di an ma. Ani, a y’a k’a ɔriganisasiyɔn cɛɲumanba sigi sen kan. O ɔriganisasiyɔn fɛ, an be ladiliw ni cikan sɔrɔ (Mat. 24:45-47; 2 Tim. 3:16, 17). Komi an y’an yɛrɛkun di Jehova ma, a b’an kalan a ka siraw koo la. Nka, yala an ka jijali kɛli b’a yira ko an be Jehova ka kanuya waleɲuman lɔn wa? Yala an b’an janto a ka ladiliw la walisa k’an koo diya a ye ani ka tɔnɔ sɔrɔ o la wa? (Esayi 48:17; Yaku. 1:22). Ciden Pol y’a sɛbɛ 1 Kɔrɛntekaw 3:8 la ko: “Min be danni kɛ ani min b’a sɔn, olu ka kan. Ala na u bɛɛ kelen kelen sara ka kɛɲɛ n’u ka baara kɛlenw ye.”

³ Tiɲɛn na, Ala be min waajibiya an ma, an ka kan k’o lo kɛ. Mɔgɔ bɛɛ tɛ ɲɛtaga sɔrɔ Alako ta fan fɛ cogo kelen na. Koo caaman be nɔɔ to an ka ɲɛtaga sɔrɔcogo kan. Ani a man ɲi an k’an yɛrɛ suma ni mɔgɔ wɛrɛ ye, sabu o be se k’an fari faga. Nka an tɔgɔla jijaliw lo kɔrɔtalen be kosɔbɛ. An be se ka mun lo kɛ walisa k’an magwɛrɛ ɔriganisasiyɔn la? Yala an be se ka ɲɛtaga sɔrɔ yɔrɔ dɔw la an kɛtɔ ka sɔn an ka kerecɛnya kunkanbaaraw la wa? An ka kan ka jijali juman kɛ walisa ka dɛmɛ don kɔngeregasiyɔn ka baaraw la cogo fisaman na? Yala ɔriganisasiyɔn ka cikan dɔw be yen, an ka ɲi ka minw sira tagama wa? —1 Tim. 4:16.

⁴ An ka mɔgɔ kantigimanw sen nɔɔ ta: Balima kantigimanw ye Masaya kibaro duman waajuli kɛ saan tankulu caaman kɔnɔ. O mɔgɔ kantigimanw, i n’a fɔ Pol, ka kan ni ladegeli ye (1 Kɔr. 11:1). U sɔnna Ala ka kanuya la. Ani, u ye koduman caaman siman tigɛ sabu u ye baara kɛ sɔbɛ la, ani u ye Bibulu ka ladili sira tagama ni jijali ye. U kɛra baarakɛlaw jɛkulu fitinin kisɛman ye kɔngeregasiyɔn kɔnɔ, ani u tɛ boli u ka kunkanbaara ɲɛ. An be se k’u tɔgɔla baara tɔnɔ ye. —Rom. 1:13; 2 Kɔr. 3:1-3.

⁵ Sisan, mɔgɔ kura waa kɛmɛ caaman be boli ka don ɔriganisasiyɔn kɔnɔ saan o saan (Esayi 60:8). Olu fana be baara kɛ ni sɔbɛ ye walisa ka kɛ mɔgɔ kɔgɔnenw ye Alako ta fan fɛ. U be kisɛya min kɛ waajuli baara la, o ka kan ni tandoli ye. U b’a ye ko tɔnɔ b’a la k’u yɛrɛ di sɔbɛ la Jehova ka baara la, sabu u b’a ka duga sɔrɔ. Balima kɔgɔnenw ka ɲɛyirali be mɔgɔ kuraw dɛmɛ k’a faamuya ko sisan tɛ wagati ye ka sumaya, wala ka dɔɔni dɔrɔn kɛ an ka Ala baara la. An ka kɛ weleweledalaw kura ye wala kolɔnbaga ye, yala an be to ka taga ɲɛ Alako ta fan fɛ wa? Yala an be sɔn an ka kerecɛnya kunkanbaaraw la wa? Yala an be tɔnɔ sɔrɔ labɛnw na, minw tara Alako ta fan fɛ wa?

⁶ An be min kalan, an k’o sira tagama: Yakuba y’a sɛbɛ ko an ka kan ka kɛ ‘wale kɛbagaw’ ye. Wagati jan, ka kɔn o ɲɛ, Musa tun y’a fɔ Yahutuw ye ko: “Ne be kuma minw fɔ aw ye, olu ka kan ka to aw dusukunw ni aw hakili la.” ( Yaku. 1:25; Dut. 11:18). O la, lɔnniya dɔrɔn tun t’a labɔ. Yahutuw mako tun b’a la ka Jehova kanminɛ u kɛtɔ ka Sariya kumaw sira tagama. O cikan jɔnjɔn ma yɛlɛma. Siga t’a la, Ala dencɛ Yesu tun y’a lɔn ko a kɔrɔtalen be ka kanminɛli kɛ ( Yuh. 8:28). Matiyu 7:24 la, a y’a fɔ ko: “Mɔgɔ o mɔgɔ be ne ka kuma ninw lamɛn ka u kɛ, o tigi be se ka kɛɲɛ ni mɔgɔ hakilitigi dɔ ye.”

⁷ An be fɛɛn minw kalan tile fila lajɛnbaw la, yala an b’u sira tagama wa? Yala an b’a faamuya ko bi bi nin na, a kɔrɔtalen be kosɔbɛ ka to ɲɛɛ na ani ka koow kɛ k’a dama kɛɲɛ wa? Sitanɛ be wale dogonenw ni jaan minw bila an seen kɔrɔ, yala an b’an yɛrɛ kɔrɔsi u ma wa? Ɔriganisasiyɔn be ladili ni lasɔmini di an ma, ani a be segi u kan ko an ka kan ka saniya Alako ni tagamacogo ta fan fɛ kɔngeregasiyɔn kɔnɔ. Yala an b’o waleɲuman lɔn wa? An be min mɛn, an b’o sira tagama fɔɔ ka se hakɛ juman ma?—Yaku. 1:23-25.

⁸ Waajuli baara saan kura nata kɔnɔ, tile kelen lajɛnba ka kalankun basiginen be kosɔbɛ Bibulu kan. A ko: “A’ ye kolo Ala ye. A’ ye jɔ Sitanɛ ɲɛ ka a kɛlɛ.” ( Yaku. 4:7). Nin ye ladili bɛrɛbɛrɛ ye nin wagati gwɛlɛnw na dɛ! An kɛtɔ ka kolo Ala ka cikanw ye, o be sin ka Sitanɛ lasu k’an kɛlɛ. Sitanɛ be nanbaraw kɛ walisa k’an ka lanaya nagasi. Lajɛnba bena an kalan cogo min na an be se ka lɔ kelen kan o nanbaraw kama (Heb. 2:1). O kɛtɔ, an bena kodumanw siman tigɛ ka kɛɲɛ ni an yɛrɛ ka jijaliw ye.

⁹ An ka tɔnɔ ɲini kelen na kalan na: Kelen na kalan b’an dɛmɛ ka lanaya barikaman sɔrɔ. A fana be dɔ fara an ka waleɲumanlɔn kan tiɲɛn koo la. A be dɔ fara an ka jigidali kan, ani a be see di an ma walisa an ka kuma ni barika ye. A be ceguya ni hakilitigiya di an ma, ani a b’an dɛmɛ ka jogo kura kɛ an yɛrɛ la (Kolos. 1:9-11). Nka, tɔnɔ tɛ sɔrɔ kalan na n’an ma jijali kɛ ani ka wagati ta a kama. Sira surun tɛ se ka ta ka lɔnniya tigitigi ni hakilimaya bɛrɛbɛrɛ sɔrɔ. An be jijali min kɛ kalan na, an b’o tɔnɔ lo sɔrɔ.—2 Kɔr. 9:6, 7; Gal. 6:7.

¹⁰ An be wagati min labila an yɛrɛ ye lɔgɔkun o lɔgɔkun walisa ka kɔngeregasiyɔn ka lajɛnw labɛn, yala o be labɔri kɛ wa? O cogo la, an b’a yira ko an be hakilimaya domuni waleɲuman lɔn, Jehova be min di an ma jɔncɛ kantigiman hakiliman bolo fɛ. An kɛtɔ ka lajɛnw labɛn koɲuman, o b’an dɛmɛ ka nɔɔrɔ labɛnsira la, min tara walisa ka Ala ka Kuma kalan ani k’a sɛgɛsɛgɛ. Alako cidenyabaara lakɔli ka labɛnsira kɔnɔ, yɔrɔ dɔw dira Bibulu kalangwɛ kɛta kama. Yala an be wagati ta k’o kalangwɛ kɛ lɔgɔkun o lɔgɔkun wa? Walisa k’o vɛrisew kalan ani ka miiri u kan loon o loon, miniti damaninw dɔrɔn be labɔri kɛ. Waajuliko lajɛn b’an hakili jigi fɛɛrɛw la, minw b’a to an ka cidenyabaara be den. Yala an b’o lajɛn labɛn, an kɛtɔ ka miiri cogo min na an bena baara kɛ n’o hakilinataw ye waajuli kɛtɔ wa? Ani yala an b’an jija ka sin ka baara kɛ n’u ye joona wa? An ka ɲi ka labɛn ɲuman kɛ ka gwɛ walisa ka La Tour de Garde ni Kitabukalan labɛn. Yala an b’o lo kɛ wa?

¹¹ An k’an sendon lajɛnkow la: An be tɔnɔ fisaman sɔrɔ lajɛnkow la n’an b’an daa don u koow la. N’an be lajɛnw labɛn, ani o kɔ, n’an b’an jija k’an daa don u koo la, o b’an dɛmɛ ka to ɲɛɛ na lajɛn wagati la. Ka fara o kan, o b’an dɛmɛ ka nafa sɔrɔ tɔɔw ka lakalitaw la. Hali bi, caaman hakili b’a la k’u ye jijaliba yɛrɛ kɛ walisa k’u ka lakalita fɔlɔ di lajɛn na, wala k’u ka cii fɔlɔ dafa Alako cidenyabaara lakɔli la. Hali ni siranya dɔgɔyara, yala an be timinandiya ka sɔbɛ kɛ walisa bɛɛ k’a ye ko an be taga ɲɛ Alako ta fan fɛ wa? (1 Tim. 4:15). An ka lakalitaw be mɔgɔ wɛrɛw nafa, ani k’u jagwɛlɛya. N’an labɛnna koɲuman lajɛnw kama, n’an kɔnna ka barokunw kalan, an ka lakalitaw bena mɔgɔ wɛrɛw jija kanuya ni kɛwale ɲumanw kɛli la.—Heb. 10:23-25.

¹² An ka lakalitaw man kan ka janya ani ka gwɛlɛya. Tuma caaman na, a ka fisa ka lakalita surunw di, minw be sin ka ɲiningaliw jaabi wala ka vɛrisew sira tagama cogo yira ka gwɛ. N’an labɛnna koɲuman, an bena se ka lakalitaw kɛ an yɛrɛ ka kumacogo la. O la, an yɛrɛ, ani mɔgɔ wɛrɛw bena tɔnɔ fisaman sɔrɔ a la. Mun na? Sabu o b’an waajibiya ka miiri an ka jaabili kan, ani ka koow ɲɛfɔ i n’a fɔ an y’u faamuya cogo min na. O be mɔgɔ wɛrɛw dɛmɛ ka hakilinataw faamuya. O fana bena an dɛmɛ k’an hakili jigi o kunnafoniw la loon wɛrɛ.

¹³ An ka danni kɛ caaman waajuli baara la: An ka kerecɛnya cidenyabaara ye nafolo ye (2 Kɔr. 4:7). Yala an b’a jati o cogo la wa? Waajuli be nɛɛma di an ma k’an ka lanaya kofɔ mɔgɔ wɛrɛw ye. Yesu y’a fɔ ko “Mɔgɔ dusukun falen be min na, a daa be o de fɔ.” (Luka 6:45). An b’an tɔgɔla jijali minw kɛ walisa ka waajuli kɛ k’a dafa, o be kodumanw caaman lase an ma. Dɔ be fara an ka tiɲɛn faamuyali kan, ani an ka hakili diya kan ka baara kɛ ni Bibulu ye. An be ɲagali ka tiɲɛn lase mɔgɔ wɛrɛw ma, ani k’u dɛmɛ ka lɔnniya sɔrɔ u Danbagaba koo la. An be lɔ i ko seerew, min b’a yira ko Ala ka kuntigiya n’a ka masabaya dagalen be. An dubara sabu an b’a lɔn ko an koo ka di Jehova ye, katugu an dilanna ale jaa la, ani an b’a sago kɛ.—Mat. 5:48.

¹⁴ An be jijali minw kɛ Jehova ka batoli kɔnɔ, n’an b’u sɛgɛsɛgɛ tuma o tuma, an ka baara tɛna nagasi abada. O kɔrɔ ko di? An tɛna Ala sago kɛ ni dusukun tilannen ye. Walima an tɛna an yɛrɛ di cogo fitininman na. An ka kan ka baara kɛ Jehova ye n’an dusukun bɛɛ ye. Bibulu b’a waajibiya an ma ko an k’an yɛrɛkun bɛɛ di a ka baara la (Kolos. 3:23, 24). Tiɲɛn lo, bɛɛ ka cogoya tɛ kelen ye. Ani Jehova t’a ɲini an fɛ an k’an seko dama tɛmɛ. Nka an seko ye min ye, Jehova b’a ɲini an fɛ an k’o kɛ! (Mat. 22:37). Hadamaden jurumutɔ fari koo ka di a ye kojugu. O kama, a ka ɲi an k’an yɛrɛ sɛgɛsɛgɛ tuma dɔw la. An k’a filɛ, an be se k’an ka baara yɔrɔ minw fisaya ka di Ala ma. Yala o ye an delinanko ye wa?

¹⁵ An ka kan ka jantoli kɛ walisa an ɲɛnakow n’an negew kana an bali k’an yɛrɛ di bɛrɛbɛrɛ Jehova ka baara la. Diyanye koow, lafiya wagatiw ni ɲɛnagwɛ koow ka kan ka to u nɔɔ na. Ka fara o kan, an ka kan ka kɔrɔsili kɛ janko baloɲini baara kana wagati bɛɛ ta. Yesu ka ladili min be sɔrɔ Matiyu 6:22, 23 la, n’an b’o sira tagama, siga t’a la, an bena se ka dɔ fara an ka jijaliw kan Alako ta fan fɛ. O la, an bena kodumanw siman tigɛ ka kɛɲɛ n’o ye.

¹⁶ An ka to ka baara kɛ sɔbɛ la ka jogo kura don an yɛrɛ la. O la, an bena sɔn an ka kunkanbaaraw la. Ladiliw ni miiriya minw dira an ma kɔngeregasiyɔn ka lajɛnw na, lajɛnbaw la, ani gafew kɔnɔ, an bena u sira tagama. An kelen kelen bɛɛ ka timinandiya kalan kɛli la. An k’an sendon bɛrɛbɛrɛ lajɛnkow la. Baaraba min dira an ma ka mɔgɔw kɛ kalandenw ye, an k’an seko kɛ o la. An k’o bɛɛ kɛ ka kɛɲɛ n’an seko bɛɛ ye. N’an b’a yira o cogo la ko an be Ala ka kanuya waleɲuman lɔn, siga t’a la, an bena koduman caamanba siman tigɛ bi Alako ta fan fɛ. Ka fara o kan, an ka jigiya bena sabati ɲɛnamaya banbali koo la Jehova ka duniɲa kura kɔnɔ.