Awirilikalo: Wagati lo ka ‘baara kɛ sɔbɛ la ani ka bondori kɛ’
1 Hakilijigi wagati ye miirili kɛ wagati ye Jehova ka mɔgɔw fɛ. Koo minw dafara Kirista ka saya sababu fɛ, ani Ala be jigiya min di an ma Yesu ka joli bɔnnen kosɔn, nin ye wagati ye ka miiri u koo la. N’i be miiri kɔsa awirilikalo tile 19nan koo la, mun lo be na i hakili la? Yala i be se k’i hakili jigi nin na wa: I tun ye mɔgɔ minw ye o loon wula fɛ? Nisɔndiya min tun be yen Hakilijigi seli yɔrɔ la Alako ta fan fɛ? Bibulu kalanba min tun kɛra, ani delili minw bɔra dusukun na? N’a sɔrɔ i y’a latigɛ k’i ka waleɲumanlɔnniya bɛɛ yira Jehova ni Yesu la u ka kanuya kosɔn ile ta fan fɛ. O miirili sifa be mun lo kɛ i la?
2 A gwɛnen lo ko Jehova ka mɔgɔw ka waleɲumanlɔnniya tɛ dan kumaw dɔrɔn ma (Kolos. 3:15, 17). Jehova ye labɛn minw kɛ kisili kama, an ye an ka waleɲumanlɔnniya yira a la, an kɛtɔ k’an yɛrɛ di kerecɛnya baara la awirilikalo tɛmɛnen kɔni la. Afiriki tileben n’a cɛmancɛ jamana caaman na, mɔgɔ waa caaman kɛra piyɔniyew kɔrɔsigiw ye. Ɲɛyirali fɛ, Togo jamana na, piyɔniyew kɔrɔsigiw cayaliba kɛra mɔgɔ 1 778. O hakɛ tun ma sɔrɔ ka ye. O cayaliba kura ye fɔlɔ ta dan. O kɛra farankan 21% ye. Sɛnɛgali, piyɔniyew kɔrɔsigiw tun ye mɔgɔ 196. O cayaliba ye fɔlɔ ta dan ni farankan 17% ye. Ka olu ka jijali fara weleweledala tɔɔw ta kan, o nana ni lɛri ni periyodikiw ni viziti kuraw farankan kura ye. An ka nisɔndiya bonyana k’a ye ko Bibulukalan kɛmɛ caaman daminɛna. Ani mɔgɔ cayaliba kura nana Hakilijigi seli la!
3 Tiɲɛn lo, an ka jigiya tɛ se ka tiɲɛ. O be an ɲɔndi ka baara kɛ. Ciden Pol y’o lo sɛbɛ ko: “O de kosɔn an be baara kɛ ka kɛlɛ kɛ, katuguni an ye an jigi da Ala ɲɛnama kan, o min ye mɔgɔ bɛɛ Kisibaga ye, janko dannabagaw ta.” —1 Tim. 4:10, A.B.U. 1987.
4 Jehova ye labɛn min ta ka ɲɛnamaya di, cogo di i bena a yira ko i be lanaya la o la ɲinan ka Hakilijigi wagati la? Jamana caaman na, Masaya weleweledalaw cayaliba filanan sɔrɔla awirilikalo tɛmɛnen na. O ɲɔgɔnna tun ma sɔrɔ ka ye. Yala awirilikalo nata bena fisaya tugun wa? A see be an ye. Nka weleweledala bɛɛ ka kan k’u sen don a la, minw batisera ani minw ma batise fɔlɔ. Mɔgɔ kuraw fana be se k’u ka koow dafa walisa ka dɔ kɛ. O la, n’i be labɛn kɛra walisa ka baara kɛ sɔbɛ la ani ka bondori kɛ awirilikalo nin na, i be se ka tɛmɛ fɛɛrɛ dɔw fɛ ka mɔgɔ wɛrɛw lasu u k’i bila sira. I hakili to mɔgɔ kuraw la, ani minw ma deli baara la.
5 An ka dɔw dɛmɛ u ka segi ka baara kɛ kokura: N’i be dɔw lɔn minw ma bɔ waajuli baara kama kabini kalo kelen wala kalo fila, i be se ka dusu don u la ani k’u weele k’i bila sira waajuli baara la. Ni kɔngeregasiyɔn mɔgɔ dɔ kɛra waajulikɛla sumalen ye, diinan mɔgɔkɔrɔw bena jijaliba kɛ ka taga bɔ a ye, k’a jagwɛlɛya walisa u ka baara daminɛ kokura awirilikalo la.
6 An bɛɛ ka kan ka Jehova hakili deli walisa ka fanga sɔrɔ a ka baara la (Luka 11:13). An ka kan ka mun lo kɛ walisa k’o hakili sɔrɔ? An ka Ala ka Kuma senuman kalan (2 Tim. 3:16, 17). “Nii Senu be min fɔ eglisiw ye” an ka kan k’o lamɛn fana, an kɛtɔ ka taga lajɛn looru bɛɛ la lɔgɔkun o lɔgɔkun ( Jira. 3:6). Sisan ye wagati ɲuman dɔ ye ka weleweledala basigibaliw ni sumalenw dɛmɛ. U delila ka Bibulu kalan ani ka taga lajɛn na cogo min na, an k’u dɛmɛ k’o delinankow fisaya (Zab. 50:23). Tuma min na an b’o kɛ, an b’an janto an yɛrɛ ka makow la Alako ta fan fɛ. O bɛɛ n’a ta, fɛɛn wɛrɛ waajibiyalen be yen.
7 Ciden Piɛre y’a ɲɛfɔ ko Ala be a hakili senu di “a kan minɛbagaw ma.” (Kew. 5:32). O kanminɛli kɔrɔ fana ko ka kolo cikan nin ye: “Ka mɔgɔw waaju ani k’a yira u la ka jɛya” ko Kirista sigira ka kɛ Kiritigɛla ye (Kew. 1:8; 10:42). Tiɲɛn lo ko an mako be Ala ka hakili senu la walisa ka fanga sɔrɔ ka waajuli kɛ. Nka Jehova b’an dɛmɛ n’an y’a yira ko an b’a fɛ ka diya ale ye. An kana ɲinɛ abada ko an lo ka kan k’a daminɛ fɔlɔ ka kanminɛli kɛ ni diyanye ye!
8 An ka denmisɛnw dɛmɛ: Bangebagaw, yala aw y’a kɔrɔsi ko aw deenw b’a fɛ ka tiɲɛn kofɔ mɔgɔ wɛrɛw ye wa? Yala u be aw bila sira ka taga waajuli kɛ wa? Yala u tagama cogo ka ɲi wa? N’a be ten, kuun b’a la ka sigasiga wa? Taga kɔngeregasiyɔn ka waajuliko ɲɛnabɔbagaw jɛkulu mɔgɔ dɔ sɛgɛrɛ. A filɛ n’i ka deen ka koow dafara walisa a ka jate weleweledala ye awirilikalo nata la ( A filɛ gafe Notre ministère kɔnɔ, a ɲɛɛw 99-100). I k’a lɔn ko i ka deen be se ka caaman kɛ walisa ka dɔ fara Jehova tandoli kan Hakilijigi seli wagati la. —Mat. 21:15, 16.
9 Kerecɛn denba dɔ tun b’a denmuso fitinin jija tuma bɛɛ walisa a ka Jehova kofɔ mɔgɔ wɛrɛw ye . Salon, o sunguru tun be waajuli kɛra n’a bamuso ye. A ye kitabunin Wajibiya to cɛɛ dɔ fɛ, ka ɲɛfɔli dɔɔni kɛ a kɔnɔnakow kan. O cɛɛ y’a ɲininga ko: “E ye saan joli ye?” A ko: “Wolonfila.” Cɛɛ kabara k’a ye ko sunguru ka ɲɛfɔli gwɛra kosɔbɛ. O y’a sɔrɔ ale tun ye tiɲɛn lɔn a denmisɛnman. Nka a tun m’a ta sɔbɛ la i ko ɲɛnamaya kɛcogo dɔ. Joona, Bibulukalan daminɛ n’o cɛɛ, n’a muso n’a denmuso ye.
10 Denmisɛn caaman ye weleweledalaw ye ka ban. A ka di an ye k’u ye an gɛrɛfɛ waajuli kɛtɔ. O denmisɛnw be se k’u filankuruw jija ani k’u jagwɛlɛya. Nka awirilikalo ye wagati ɲumanba ye fana denbaya kelen kelen bɛɛ fɛ. Wagati lo ka jɛnɲɔgɔnyaw sabati ani ka ɲɛtaga sɔrɔ Alako ta fan fɛ u kɛtɔ ka waajuli kɛ ɲɔgɔn fɛ. Gwa kuntigiw ka kan k’o baara ɲɛminɛ. —Ntal. 24:27.
11 An ka mɔgɔ kuraw dɛmɛ: Mɔgɔ kuraw do, i be Bibulu kalanna ni minw ye? Yala olu fana be se ka dɔ fara an ka jijaliba kan awirilikalo nata la wa? Tuma min na aw ye gafe Dɔnniya tilan 2nan, dakun 22nan, wala tilan 11nan dakun 14nan kalan kɛ, n’a sɔrɔ u y’a yira k’u b’a fɛ k’o lɔnniya fɔ mɔgɔ wɛrɛw ye. Ni gafe kalan be surunyana a laban na, i yɛrɛ labɛn walisa ka baro kɛ kosɔbɛ o koo kan n’a ye tuma min na aw bena gafe tilan 18nan dakun 8nan kalan. O yɔrɔ ko: “I ye min kalan, a dɔ rɔ, i kɔrɔtɔlen bɛ ka o lakali i baramɔgɔw an’i teriw ni mɔgɔ wɛrɛw ye. Laala i b’o kɛ ka ban yɛrɛ i ko Yesu cogo, o min tun bɛ kibaru duman tilan ni mɔgɔ wɛrɛw ye ɲɔgɔnw bɛnw senfɛ (Luka 10:38, 39; Yuh. 4:6-15). Sisan, a ŋaniya ka dɔ fara o kan.” I be kalan kɛra ni minw ye, yala nin be se ka fɔ olu fana koo la wa?
12 Yala i ka kalanden lara Ala ka Kuma na wa? Yala a be Bibulu ka kalanw sira tagama wa? Yala a y’a ka ɲɛnamaya kɛcogo kɛɲɛ ni Ala ka laɲinitaw ye wa? Yala a be na kɔngeregasiyɔn ka lajɛnw na wa? Yala a b’a fɛ ka baara kɛ Jehova Ala ye wa? O tuma, mun na i t’a jija a ka kuma ni diinan mɔgɔkɔrɔw ye? O la, u bena a filɛ n’a ka koow dafara ka kɛ weleweledala ye min ma batise fɔlɔ. O la, a be se ka waajuli kɛ i gɛrɛ fɛ awirilikalo la. (A filɛ gafe Notre ministère kɔnɔ, a ɲɛɛw 98-100). O cogo la, a yɛrɛ bena a lɔn a yɛrɛma ko Jehova ka ɔriganisasiyɔn bena a dɛmɛ ka jijali kɛ walisa ka baara kɛ Jehova ye.
13 Tiɲɛn lo, kalanden dɔw be ɲɛtaga sɔrɔ joona ka tɛmɛ dɔ wɛrɛw kan. O sen fɛ, ka kɛɲɛ ni saan 2000, zuwɛnkalo ka An ka Masaya Cidenyabaara ɲɛɛ 4nan dakunw 5-6 ye, mɔgɔ caaman ye kitabu filanan kalan daminɛ ni kalanden dɔw ye. O ye kalandenw ye minw mako tun be dɛmɛ wɛrɛ la walisa k’u sen don an ka baara la. An tɛ an jigi bɔ a kan abada k’o mɔgɔ kɔnɔgwɛw bena kɛ Kirista ka kalandenw ye “cogo o cogo” (Kew. 26:29). N’a sɔrɔ i be kalan kɛra n’o kalanden sifa dɔ ye kabini wagati jan. Yala Hakilijigi seli nata tɛna kɛ wagati ɲuman ye i ka kalanden fɛ k’a yira ko a be Kirista ka kunmabɔsara waleɲumanlɔn kosɔbɛ wa?
14 An be se k’u dɛmɛ cogo min na k’u sen don a la: Yesu tun be mɔgɔ wɛrɛw dege baara daminɛ cogo la. N’an be ale kɛcogo lajɛ, an be se ka kalan kosɔbɛ walisa ka mɔgɔ kuraw dege. A ma jama ye, ani k’a fɔ a ka cidenw ye k’u k’a daminɛ dɔrɔn ka waajuli kɛ. Fɔlɔ, a y’a yira ka gwɛ ko waajuli baara ye waajibiko ye. Ani a ye u jija ka delili kɛ. O kɔ, a ye fɛɛrɛ saba di u ma walisa u ka basigi o kan: baarakɛɲɔgɔn, baara kɛyɔrɔ, ani cira dɔ (Mat. 9:35-38; 10:5-7; Marka 6:7; Luka 9:2, 6). I be se k’o ɲɔgɔn kɛ fana. N’i be i yɛrɛ ka deen dɛmɛna, walima kalanden kura, walima mɔgɔ min ye waajuli baara dabila kabini wagati dɔ, i ka ɲi ka jijaliba kɛ walisa ka laɲinita ninw dafa.
15 A yira ka gwɛ ko baara kɔrɔtalen lo: A tigi dɛmɛ k’a faamuya koɲuman ko waajuli baara kɔrɔtalen lo. O koo fɔ cogo ɲuman na. Kɔngeregasiyɔn be min kɛra waajuli baara la, i k’o wale dɔw lakali k’a yira a la. Yesu ye miiriya min kofɔ Matiyu 9:36-38 la, i k’a yira k’o miiriya b’i la. O mɔgɔ min bena kɛ weleweledala kura ye, walima min ye sumalen ye, i k’o tigi jija ka delili kɛ. A ka delili kɛ walisa ale yɛrɛ k’a sendon waajuli baara la, ani walisa o baara ka ɲɛtaga sɔrɔ duniɲa kuru bɛɛ kɔnɔ.
16 Fɛɛrɛ caaman minw b’a tigi bolo ka seereya kɛ, a jija ka miiri o kan: A yira a la ko a be se ka jɛn ni Kitabukalan jɛkulu ye ka taga waajuli kɛ soo ni soo. A fɔ a ye ko a ka dɔ fɔ a somɔgɔw n’a lɔnbagaw ye, wala a baarakɛɲɔgɔnw, walima lakɔli filankuruw, lafiya wagati la. N’an be tagama la ni mɔgɔ wɛrɛw ye bolifɛn kelen kɔnɔ, an be se ka baro daminɛ tuma dɔw la an kɛtɔ k’an janto dɔrɔn tagamaɲɔgɔn tɔɔw la. N’an y’a ŋaniya ta, tuma caaman na o kɛcogo be sira di an ma ka seereya ɲuman kɛ. Tiɲɛn lo cogoya caaman b’an bolo k’an ka jigiya tilan ni mɔgɔ wɛrɛw ye “loon o loon.” —Zab. 96:2, 3.
17 O bɛɛ n’a ta, sira mana di weleweledala kura ma, siga t’a la, a ka fisa ile ni ale ka waajuli kɛ ɲɔgɔn fɛ joona soo ni soo. N’i y’a latigɛ ka dɔ fara i ka waajuli baara kan awirilikalo la, a filɛ ni kiin dɔ labilanen be i gɛrɛfɛ. Balimacɛ min be kiinw nimɔrɔ sɛbɛw mara, taga ale filɛ. Ni dɔ be yen, o bena kɛ sababu ye i fɛ k’a baara koɲuman. I bɔtɔ waajuli baara la, wala n’i be tagara lajɛn na wala yɔrɔ wɛrɛ la, i be se k’a kɔrɔsi ko mɔgɔ dɔ be yen a ka soo kɔnɔ. N’a sɔrɔ mɔgɔ si tun tɛ yen o soo kɔnɔ i tɛmɛtɔ fɔlɔ, walima mɔgɔ dɔ tun y’a mako don i ka baro la. Mun na i tɛ taga bɔ a tigi ye n’i wagati bɛnnen lo? O cogo la, a bena kɛ i ɲɛɛ na ko i be cidenyabaara kɛra k’a dafa, ani i bena nisɔndiya sɔrɔ o la.
18 Cira dɔ labɛn min bena mɔgɔw ɲɛnatigɛ: K’a ɲini ka Masaya kibaro duman fɔ, o ye koo dɔ ye. Nka k’a ye ko a fɔko ka nɔgɔ, o ye koo wɛrɛ ye, janko ni waajulikɛla kura lo wala n’a tigi mɛɛnna ka bɔ o baara kama. Ka wagati ta ka mɔgɔ kuraw walima sumalenw dɛmɛ u k’u yɛrɛ labɛn, o tɛ wagati tiɲɛni ye. Waajulibaara lajɛnw ani lajɛn minw be kɛ ka kɔn waajuli ɲɛ, u be hakilinata nafamanw di an ma. Nka foyi tɛ i tɔgɔla labɛn lasa.
19 I be se ka mɔgɔ kuraw dɛmɛ cogo di k’u yɛrɛ labɛn waajuli baara kama? A daminɛ ni periyodikiw yiracogo ye: Yiracogo minw ka nɔgɔ ani u ka surun! A ɲini u fɛ u ka miiri kibaro dɔ la, min be se ka kiin na mɔgɔw ɲɛnatigɛ. O kɔ, hakilinata dɔ ɲini periyodiki laban dɔ kɔnɔ ka bɛn n’o kibaro ye. A’ ye periyodiki yiracogo ladege ɲɔgɔn fɛ. O kɔ, a’ ye baara kɛ n’o yiracogo ye joona waajuli la.
20 An ka farankan nata yiriwa: Salon, hakilijigi seli kafodenw tun ka ca ni mɔgɔ miliyɔn 14,8 ye. Weleweledala minw ye waajuli kɛ ka rapɔɔri di, u tun ka ca ni miliyɔn wɔɔrɔ ye dɔɔni. O kɔrɔ ko mɔgɔ miliyɔn 8,8 ɲɔgɔn ye u mako don sɔbɛ la, ani u nana o dan na lajɛn na. O sen fɛ, u ye ɲɛfɔli sɔrɔ Bibulu ka kalan kunbabaw la kelen kan. U sɔrɔla ka an dɔw lɔn. N’a sɔrɔ o ye nɔɔ ɲuman to u kan. U caaman be an tɔgɔ ɲuman fɔ. U be dɛmɛ don an ka duniɲa bɛɛ baara la. Mɔgɔ wɛrɛw mana an kɔrɔfɔ, u be an lafasa. Sini farankan be se ka bɔ o mɔgɔw caaman cɛ. An be se ka mun kɛ k’u dɛmɛ ka ɲɛtaga sɔrɔ?
21 Mɔgɔ kura caaman minw be na Hakilijigi seli, an dɔ lo y’u weele ka na. Tuma caaman na, o kɔrɔ ko u be mɔgɔ dɔ lɔn lamɛnnikɛjama cɛma. N’i dɔ ye weeleli jaabi ka na o seli la, kunkanbaara lo an fɛ k’a ladon koɲuman. Ani, an k’a dɛmɛ ka nafa sɔrɔ bɛrɛbɛrɛ seli koow la. Komi mɔgɔw bena caya boon kɔnɔ, a’ y’a dɛmɛ ka sigiyɔrɔ sɔrɔ. Bibulu dɔ singa a ma, ani a weele ka dɔnkili la n’i ye i ka dɔnkili gafe kɔnɔ. Ɲiningali o ɲiningali b’a fɛ, i k’a jaabi. N’i be i janto a la ni dusu diya ye, o be se ka dɔ fara a ka makodon kan. Tiɲɛn na, o ye an bɛɛ ka kunkanbaara ye: n’an ye mɔgɔ kura dɔ ye, an tɛ min lɔn, an k’a bisimila ni dusu diya ye. Ani, an ka baro dɔɔni kɛ n’a ye walisa k’a ɲɔgɔn lɔn.
22 Hakilijigi seli be se ka nɔɔ bɛrɛ to mɔgɔ kan n’a tigi tagara yen. A kɛtɔ ka na lajɛn na, n’a sɔrɔ o b’a yira ko a be fɛɛn dɔ ɲinina, a ma min sɔrɔ yɔrɔ wɛrɛ. Ani a b’a miiri ko fɛɛn dɔ b’an fɛ, min ka kan ka sɛgɛsɛgɛ koɲuman. Ɲɛfɔli min kɛra kunmabɔsara labɛn cɛɲumanba kan, o be se ka kɛ a tigi ɲɛɛ na i ko yiraliba, n’o y’a sɔrɔ a tigi tɛ foyi lɔn Jehova ka kanuya banbali kan. Joona, a tigi be se k’a ye ko an be dan na: Mɔgɔ kɔnɔgwɛw, terimanw, kanuya b’an na, ani an be mɔgɔ bonya. An ka lajɛn boon bɔlen tɛ legiliziw ma hali dɔɔni. O yɔrɔw la, n’a sɔrɔ a y’a kɔrɔsi ko jaaw be yen, ani landa nafantanw be kɛ. Siga si t’a la, mɔgɔ kuraw bena a kɔrɔsi ko mɔgɔ sifa caaman be yen lamɛnnikɛjama cɛma, ani wari deli tɛ kɛ mɔgɔ fɛ. O koow be se k’u jija ka kɔsegi ka na.
23 Hakilijigi seli tɛmɛnen kɔ, an ka teliya ka dɛmɛ lase mɔgɔ kuraw ma. N’i tun ye o mɔgɔ kura dɔw weele ka na, i kunkanbaara lo k’u dɛmɛ. Lajɛn wɛrɛ minw be kɛ Masaya Boon na, u kofɔ u ye sanni u ka segi ka taga soo. Forobakalan nata kuun fɔ u ye. Kɔngeregasiyɔn ka Kitabukalan min ka surun u la, o kɛyɔrɔ n’a tuma fɔ u ye. Kɔfɛ, gafe Créateur di u ma (n’a gafe labilanen tɛ yen, gafe wɛrɛ di). Ani, a yira u la ko awirilikalo tile 30nan lɔgɔkun ka kalan kuun ye ko “I be se ka min lɔn Danbaga koo la kitabu dɔ sababu fɛ” (Ce qu’un livre peut vous apprendre sur le Créateur). A ɲɛfɔ a ye kuun min na kɔngeregasiyɔn bɛɛ be labɛn kɛra walisa ka taga lajɛnba nata la sanni dɔɔni an sigida la.
24 Labɛn kɛ walisa ka taga bɔ u ye teriya la u ka soo. La a la ko kitabunin Wajibiya ani gafe Dɔnniya b’u fɛ. O sɛbɛw bena u dɛmɛ ka Bibulu ka kalan kunbabaw lɔn. N’u ma Bibulu kalan daminɛ fɔlɔ, a kofɔ u ye. A fɔ u ye k’u ka kitabunin Les Témoins de Jéhovah kalan (wala Unis pour faire la volonté de Dieu, ni fɔlɔ nin labilanen tɛ). O kitabuninw b’a yira ka gwɛ cogo min na an be baara kɛ an ka ɔriganisasiyɔn kɔnɔ. U weele ka an ka kasɛti videwow filɛ, i n’a fɔ: Toute la communauté de nos frères (wala Unis grâce à l’enseignement divin ni fɔlɔ labilanen tɛ). Labɛn kɛ walisa u ka kɔngeregasiyɔn mɔgɔ wɛrɛw lɔn. Kalo nataw la, kana kɔ di u ma. To ka taga bɔ u ye. U weele ka na lajɛnw na ni sirikɔnsikiripsiyɔn kɔrɔsibaga nana, wala ni tile fila wala tile kelen lajɛnba sera. Cogoya bɛɛ di u ma walisa u k’a yira ko “ɲɛnamaya banbali latigɛra u ye”! —Kew. 13:48.
25 Diinan mɔgɔkɔrɔw be se ka min kɛ: An bena jijaliba min kɛ waajuli la awirilikalo, walisa o baara ka ɲɛ, a fanba be bɔ diinan mɔgɔkɔrɔw la. Yala i ye Kitabukalan ɲɛminɛbaga ye wa? Jateminɛ kɛ koo dɔw kan walisa k’i ka jɛkulu mɔgɔ kelen kelen bɛɛ dɛmɛ k’a sen don o baaraba la. I ka jɛkulu kɔnɔ, yala denmisɛnw, mɔgɔ kuraw, weleweledala basigibaliw wala sumalen dɔw be yen wa? Sɛgɛsɛgɛri kɛ k’a filɛ ni bangebagaw, piyɔniyew, wala weleweledala wɛrɛw ye ŋaniya ta k’u dɛmɛ. Ile yɛrɛ be se ka dɛmɛ fɛɛn o fɛɛn lase, na n’a ye. Awirilikalo tɛmɛnen, balimamuso dɔ ye lɛri 50 kɛ waajuli baara la k’a masɔrɔ a tun ye weleweledala basigibali ye kabini saan fila. Mun lo y’a lasu ka koow yɛlɛma? A ko diinan mɔgɔkɔrɔw ka dɛmɛ lo y’ale sabati.
26 Diinan mɔgɔkɔrɔw ni kɔrɔsigi cidenw ka bɛn ka koow kɛ walisa kiinw, periyodikiw ni gafew labilanenw ka sɔrɔ kalo nataw kama. Yala lajɛn dɔ wɛrɛw be se ka labɛn ka fara waajuli baara kama wa? N’o be se ka kɛ, a’ y’o labɛnw kofɔ. Ka tɛmɛ o bɛɛ kan, foroba delili kɔnɔ wala aw tɔgɔla delili kɔnɔ, a’ ye Jehova deli a ka Masaya baaraba duga kalo nin na. —Rom. 15:30, 31; 2 Tes. 3:1.
27 Awirilikalo tɛmɛnen, kɔngeregasiyɔn dɔ kɔnɔ, diinan mɔgɔkɔrɔw ye bɛɛ jija u ka dɔ fara u ka waajuli baara kan. Lɔgɔkun o lɔgɔkun ka lajɛnw na, u ye weleweledalaw jija u k’u yɛrɛ sɛgɛsɛgɛ k’a filɛ deli kɔnɔ n’u tɛ se ka kɛ piyɔniyew kɔrɔsigiw ye. U ka kalan kɔnɔ, diinan mɔgɔkɔrɔw ni kɔrɔsigi cidenw tun be tɛmɛ fɛɛrɛ kelen kelen bɛɛ fɛ ka dusu don mɔgɔw la walisa awirilikalo ka kɛ dan na kalo ye. O sen fɛ, weleweledala kɛmɛ o kɛmɛ hakɛ kan, 58 kɛra piyɔniyew kɔrɔsigiw ye o kalo la! Diinan mɔgɔkɔrɔw ni kɔrɔsigi cidenw bɛɛ seen tun b’a la fana.
28 Ɲagali min be sɔrɔ o baaraba kɛli la: N’an be “baara kɛ ka bondori kɛ” waajuli baara la, dugaw juman be sɔrɔ o la (1 Tim. 4:10)? U ka kɔngeregasiyɔn ye baara kisɛman min kɛ awirilikalo tɛmɛnen na, diinan mɔgɔkɔrɔw (minw kofɔra ka tɛmɛ) y’a sɛbɛ ko: “Tuma caaman na, balimaw b’a fɔ ko kanuya ni jɛnɲɔgɔnya ye barika sɔrɔ u ni ɲɔgɔn cɛ kabini u y’a daminɛ ka dɔ fara u ka waajuli baara kan.”
29 Balimacɛ kamalen dɔ tun b’a fɛ sɔbɛ la k’a sen don awirilikalo baaraba nin na. Nka a tun ye namara ye. A ye labɛn ɲuman kɛ. Ka fara o kan, a bamuso ni kɔngeregasiyɔn ka balimaw y’a dɛmɛ. O sababu la, a ɲagalila ka se ka piyɔniye kɔrɔsigi baara nafaman kɛ. A ka fɛta ye mun ye o kan? A ko: “Ne ka ɲɛnamaya kɔnɔ, siɲɛ fɔlɔ tun lo ne fɛ ka n yɛrɛ ye i ko kɛnɛbagatɔ.”
30 Mɔgɔ minw b’a jate ko nɛɛmaba lo u fɛ ka Ala ka Masaya kofɔ, siga si t’a la, Jehova be u duga kosɔbɛ (Zab. 145:11, 12). Tuma min na an be an ka Matigi saya hakilijigi seli kɛ, an b’a faamu ko mɔgɔ minw masirilen be Ala la, olu ka duga nataw bena caya ka tɛmɛ nin kan tugun. Ciden Pol tun be ɲɛnamaya banbali sara makɔnɔna n’a sɔbɛ bɛɛ ye. O bɛɛ n’a ta, a tun b’a lɔn ko a man kan ka sigi ka kɔnɔni kɛ dɔrɔn. A y’a sɛbɛ ko: “O le kɔsɔn ne bɛ baara kɛ, ani ne bɛ bondori kɛ n’a ka fanga ye, o min bɛ baara kɛra ne kɔnɔ kosɛbɛ.” (Kolos. 1:29, ABBF, 1999). Jehova tɛmɛna Yesu fɛ ka sebagaya di Pol ma walisa a ka kisili baara kɛ. A be se ka o ɲɔgɔn kɛ an fana ye bi. Awirilikalo nata la, yala i yɛrɛ bena a kɛ k’a filɛ wa?
[Box on page 3]
Ile be se ka jɔn jija
ka waajuli kɛ awirilikalo la?
I ka deen wa?
Bibulu kalanden dɔ wa?
Weleweledala dɔ,
min sumana wa?