Aw Ka ƝIningaliw Jaabiliw

◼ An ka kan k’an janto mun lo la n’an be ni mɔgɔ dɔ ye cidenya baara la, min tɛ an cɛɲɔgɔn wala an muso-ɲɔgɔn ye?

Joo b’an fɛ k’a miiri ko an balimaw b’a fɛ ka kɛ ni tagama-cogo ɲuman-ɲuman ye. Nka an be duniɲa min kɔnɔ, a nɔgɔlen be, kakalaya koow tɛ basi ye mɔgɔ caaman fɛ ani tagamacogo ɲuman sɔrɔ man di. O kama, hali ni ŋaniya ɲuman b’an na cogo o cogo, an ka kan ka kɔrɔsili kɛ tuma bɛɛ walisa an kana jalaki wala an seen kana kɛ koo bɛnbali dɔ la. O kɔrɔ ko an ka kan ka kɔrɔsili kɛ n’an be cidenya baara la fana.

Waajuli kɛtɔ an be mɔgɔ dɔw kunbɛn minw tɛ an cɛɲɔgɔn wala an musoɲɔgɔn ye. U b’a kɛ komi u b’u mako don sɔbɛ la tiɲɛn koo la. N’an kelen dɔrɔn lo n’a tigi ye ani mɔgɔ wɛrɛ si tɛ yen a ka soo kɔnɔ, tuma caaman na a ka fisa an ka seereya di a ma bonda la sanni an ka don boon kɔnɔ. N’a tigi y’a mako don, an be se ka labɛn kɛ ka segi ka na ni weleweledala wɛrɛ ye wala tuma min na a tigi ka somɔgɔ dɔ be yen fana. N’o tɛ se ka kɛ, an ka hakili sɔrɔ k’o viziti di weleweledala dɔ ma min ye o tigi cɛɲɔgɔn wala a musoɲɔgɔn ye. O kelen lo fana n’an be bibulukalan kɛ ni mɔgɔ dɔ ye min tɛ an cɛɲɔgɔn wala an musoɲɔgɔn ye.—Mat. 10:16.

An ka kan ka kɔrɔsili kɛ n’an be mɔgɔ dɔ sugandi ka kɛ an ka baarakɛɲɔgɔn ye cidenya baara la. Hali ni balimacɛ ni balimamuso dɔw be se ka cidenya baara kɛ ɲɔgɔn fɛ tuma dɔw la, a ka fisa u ka jɛn ni jɛnkulu ye. Koow sira fɛ, ni mɔgɔ dɔ tɛ an cɛɲɔgɔn wala an musoɲɔgɔn ye ani an furuɲɔgɔnma fana tɛ, hakilitigiya tɛ ka wagati kɛ n’o tigi dɔrɔn ye hali n’an be cidenya baara la. O kama, balimacɛ min be mɔgɔw tilan-tilanna, a ka kan ka hakili sɔrɔ n’a be weleweledalaw bilara ɲɔgɔn fɛ, hali denmisɛnw fana#.

N’an be koow kɛ ni hakili ye tuma bɛɛ, an tɛna “kunnatiɲɛni sababu di” an yɛrɛ ma wala mɔgɔ wɛrɛw ma.—2 Kɔr. 6:3.

# Barokun nin b’an ladi ko an ka kɔrɔsili kɛ n’an be cidenya baara la ni weleweledala dɔ ye min tɛ an cɛɲɔgɔn wala an musoɲɔgɔn ye. Daliluw b’a yira ko an bɛɛ ka kan ka hakili sɔrɔ o koo la. O kɔrɔ tɛ ko kɔrɔsibaga tagamakɛlaw wala balima wɛrɛw yɛrɛ tɛ se ka baara kɛ ni balimamusow ye cidenya baara la. Nka o kɔrɔ ko hakilitigiya tɛ ni balimacɛ dɔ be to ka cidenya baara kɛ tuma o tuma ni balimamuso kelen ye min tɛ a ka somɔgɔ ye.