Kamalenw ni sunguruw: A’ ye Ala ka Kuma kalan!
1 Denmisɛnya ye gwɛlɛyaw wagati ye. O wagati la, koo kɔrɔtalenw ka kan ka latigɛ. Kerecɛn kamalen ni sunguruw, degun be aw caaman kan loon o loon walisa aw ka Ala ka sariyaw tiɲɛ tagamacogo ta fan fɛ. Sanni aw k’a tɔgɔla koow latigɛ kalan, baara ni furu ta fan fɛ, o ka kan k’a sɔrɔ aw ye laɲinitaw latigɛ Alakow ta fan fɛ ka ban. O cogo dɔrɔn na, aw be se ka koo wɛrɛw latigɛ minw bena aw ka ɲɛnamaya bila sira ɲuman kan. N’a’ ye laɲinita tigitigiw latigɛ Alako ta fan fɛ, o lo bena aw dɛmɛ ka hakili sɔrɔ ka koow kɛ ani ka sanga sɔrɔ u la. Ni aw be Ala ka Kuma kalan ka miiri a kan tuma o tuma, o bena aw lasun aw ka ɲɛnamaya kɛ ka kɛɲɛ n’a ka ladiliw ye. Ani, aw ka jijali sɔbɛw bena ɲɛ.—Jos. 1:8; Zab. 1:2, 3.
2 Aw bena nafa juman sɔrɔ o la? Sitanɛ ka duniɲa be mɔgɔw lasun tuma o tuma u ka koo jugu kɛ (1 Yuh. 2:15, 16). N’a sɔrɔ aw be kalanɲɔgɔn dɔw wala aw filankuru dɔw lɔn, kunkow ye minw sɔrɔ sabu u sɔnna u tagamaɲɔgɔnw k’u don koo la. Ni aw be sɔn Bibulu ka ladili la, o bena fanga di aw ma tagamacogo ni Alako ta fan fɛ walisa aw ka ban jurumu kɛli la. Ka fara o kan, o ladili be se ka aw dɛmɛ aw ka boli Sitanɛ ka jan dogonenw ɲɛ (2 Kɔr. 2:11; Heb. 5:14). Ala sira tagamani bena hɛɛrɛ lakika lase aw ma: Aw bena wasa aw ka ɲɛnamaya kɛcogo la. —Zab. 119:1, 9, 11.
3 Ala ka Kuma ka miiriyaw ka fisa ni hadamadenw ka hakilitigiya ye sabu u sanga tɛ ben ka ye (Zab. 119:98-100). Ka Bibulu ka miiriyaw lɔn, ka miiri Jehova ka sagonataw kan, minw yirala an na, ani ka delili kɛ ni kɔnɔgwɛ ye, o be se ka aw dɛmɛ ka jɛnɲɔgɔnya teriman sigi aw ni Bibulu tigi, Jehova Ala cɛ: Ale ka hakilitigiya ka bon, daan t’a la. A ye layidu ta ko: “Ne na hakilitigiya di i ma. I ka kan ka sira min taama, ne na o jira i la. Ne na i kalan ne ɲɛsiran ko la, ka ne ɲɛ jɔlen to i kan.”—Zab. 32:8.
4 A’ ye wagati latigɛ a kalan kama: Kerecɛn sunguru dɔ y’a laɲini ka Bibulu kuru bɛɛ kalan, ani a tilara a kalan na saan kelen kɔnɔ. A ye nafa juman sɔrɔ o la? A hakili b’a la ko: “Ne ye koo caamanba lɔn Jehova koo la: O koow ye ne magwɛrɛ a la, ani u y’a nege don ne la ne ka siran a ɲɛ n’ ka ɲɛnamaya bɛɛ kɔnɔ.” ( Yaku. 4:8). Yala aw ye Bibulu kuru bɛɛ kalan wa? N’aw m’o kɛ, mun na aw t’a laɲini k’o kɛ? Siga t’a la, Jehova bena aw ka jijaliw kɛli duga, ani aw bena nafaba sɔrɔ a la.