A bena sinsin Bibulu lo kan!
1 Saan 1919, ɔkutɔburukalo tile fɔlɔ la, zurunali L’Âge d’Or nimɔrɔ fɔlɔ bɔra. A sɔrɔla ka kɛ waajulikɛminan nafamanba ye. Mun na do? Katugu, a tun labɛnna foroba mɔgɔw lo kama. La Tour de Garde tun tɛ jati o cogo kelen na. Kabini saan caaman, u tun b’a jati ko ale labɛnna “sagakulunin” lo kama fɔlɔ (Luka 12:32). Masaya weleweledalaw dusu diyara kosɔbɛ zurunali kura L’Âge d’Or koo la. O kama, saan caaman kɔnɔ, o zurunali jɛnsɛnni ye La Tour de Garde ta dan pewu.
2 Zurunali L’Âge d’Or tun sɛbɛra walisa k’a yira mɔgɔw la ko hadamadenw ka kunkow fɛɛrɛ bɛrɛbɛrɛ ye Kirista ka saan waa kelen Masaya lo ye. O kelenpe lo be se ka hɛɛrɛ dafalen lase hadamadenw ma. Saanw tɛmɛtɔ o kɔ, yɛlɛmani dɔw kɛra L’Âge d’Or koo la walisa k’a makɛɲɛ ka bɛn ni a wagati ka koow ye. Saan 1937 na, a tɔgɔ yɛlɛmana ka kɛ Consolation ye. Saan 1946 na, a kɛra Réveillez-vous ! ye fɔɔ ka na se bi ma.
3 Kabini a daminɛ na saan 1919 na, seereyaba sera ka di mɔgɔw ma o zurunali sababu fɛ (Mat. 24:14). Nka komi kɔrɔtɔ be an ka wagati ka koow la, a be komi an ka ɲi ka hakili sɔrɔ ka yɛlɛmani dɔw kɛ Réveillez-vous ! koo la.
4 Réveillez-vous ! kalan ka di mɔgɔ miliyɔn caaman ye sabu a be baro duman kɛ koo sifaw bɛɛ kan minw tɛ diinan koow ye. Mɔgɔ minw be na Hakilijigi seli la saan o saan, siga t’a la, u caamanba be Réveillez-vous ! kalan tuma o tuma. Nka ni mɔgɔ dɔ b’a fɛ ka dogoyɔrɔ sɔrɔ “Matigi ka diminya don” na, o tigi man kan ka dan dɔrɔn an ka gafew kalan ma tuma o tuma. Fɔɔ a ka dɔ wɛrɛ kɛ.—Sofoni 2:3; Jira. 14:6, 7.
5 O kama, k’a daminɛ saan 2006, zanwiyekalo la, Réveillez-vous ! bena to ka sinsin Ala ka Masaya kan ka tɛmɛ fɔlɔ kan. A bena to k’a kalanbagaw jagwɛlɛya sɔbɛ la u ka Bibulu sɛgɛsɛgɛ walisa ka fɛɛrɛ sɔrɔ u ka kunkow la. A fana bena to k’a yira ka gwɛ Bibulu be min fɔ bi tile ka koow kan. O cogo la, Réveillez-vous ! kalanbagaw bena faamuyali fisaman sɔrɔ bi koow kɔrɔ kan. N’a sɔrɔ o bena u lasun u k’a ɲini ka dɔ fara u ka lɔnniya kan Bibulu koo la.—Zak. 8:23.
6 Réveillez-vous ! bena to ka kuma koo wɛrɛw fana kan, minw ɲɛsinna mɔgɔw bɛɛ ma. Nka, a bena sinsin Bibulu lo kan ka tɛmɛ fɔlɔ kan (1 Tes. 2:13). Komi La Tour de Garde be baro kɛ ka dunya Bibulukow kan, ani komi Réveillez-vous ! ka barokun caaman bena to ka basigi Bibulu kan ka tɛmɛ fɔlɔ kan, a be komi kun t’a la ka to ka Réveillez-vous ! nimɔrɔ fila bɔ kalo o kalo. O kama, k’a daminɛ saan 2006, zanwiyekalo la, Réveillez-vous ! nimɔrɔ kelen dɔrɔn lo bena to ka bɔ kalo o kalo. O sababu fɛ, an ka gafew labɛnko n’u bayɛlɛmali n’u taransipɔriko bena nɔgɔya kosɔbɛ.
7 Réveillez-vous ! be bɔ kaan minw na, o yɛlɛmani bena ɲɛsin o kaan 40% ma. O kaan caamanba na, Réveillez-vous ! nimɔrɔ kelen dɔrɔn lo be bɔ ka ban kalo o kalo, wala kalo saba saba. Yɛlɛmani si tɛna don La Tour de Garde bɔko la.
8 Weleweledalaw be se ka kalo kelen kelen ka Réveillez-vous ! fara La Tour de Garde dɔ kan k’u yira mɔgɔw la. Minw be Réveillez-vous ! lo yira mɔgɔw la, u be se ka baara kɛ ni zurunali yiracogo kelen dɔrɔn ye kalo kuru bɛɛ kɔnɔ n’u ma yiracogo yɛlɛma kalo cɛmancɛ la i n’a fɔ an b’a kɛra cogo min na sisan.
9 Kabini a nimɔrɔ fɔlɔ bɔtuma na saan 1919 na, o zurunali weelela ko L’Âge d’Or, Consolation, ani Réveillez-vous ! sisan. A kɛra sababuba ye baaraba kɛra waajulibaara la. An be delili kɛ k’o zurunali kɔnɔnako kuraw mana na bɔ, Jehova bena to k’a jɛnsɛnni baara duga. An fana be Jehova delili a ka “siyaw bɛɛ ni bɔnsɔnw bɛɛ ni mɔgɔ sifaw bɛɛ ni kanw bɛɛ” mɔgɔ caaman wɛrɛw dɛmɛ u k’u ɲɛɛ yɛlɛma Ala ka Masaya fan fɛ k’a jati i ko u ka jigiya kelenpe.—Jira. 7:9.
[Study Questions]
1. A daminɛ na, La Tour de Garde tun sɛbɛra jɔn lo kama fɔlɔ? Zurunali L’Âge d’Or do?
2. L’Âge d’Or be weele cogo di bi? Ani, a ka laɲinita kɛra mun ye kabini a daminɛ na?
3. Réveillez-vous ! sɔrɔla ka kɛ sababuba ye ciraya kuma juman be dafara?
4. (a) Ni mɔgɔ dɔ b’a fɛ ka dogoyɔrɔ sɔrɔ “Matigi ka diminya don” na, a ka kan ka mun lo kɛ? (b) Ka kɛɲɛ ni Jirali 14:6, 7 ye, mɛlɛkɛ min be panna san fɛ fiɲɛ la, a be mɔgɔw bɛɛ weele u ka mun kɛ?
5. (a) K’a daminɛ ni saan 2006, zanwiyekalo ye, Réveillez-vous ! bena to ka sinsin mun lo kan kosɔbɛ? (b) N’a sɔrɔ, o bena mɔgɔ caaman lasun u ka mun kɛ? O be ciraya kuma juman dafa?
6, 7. (a) Cogo juman na Réveillez-vous ! bena mɔgɔ caaman dɛmɛ u ka 1 Tesalonikekaw 2:13 sira tagama? (b) Réveillez-vous ! nimɔrɔ joli bena to ka bɔ kalo o kalo? Ani, o yɛlɛmani bena ɲɛsin kaan joli lo ma?
8. Cogo juman na weleweledalaw bena se ka baara kɛ ni Réveillez-vous ! ni La Tour de Garde ye?
9. Réveillez-vous ! bena to ka baara juman kɛ?