Zurunali minw be tiɲɛn seereya kɛ an k’u kofɔ mɔgɔw ye
1 La Tour de Garde annonce le Royaume de Jéhovah ani a tagamaɲɔgɔn Réveillez-vous ! be an ka cidenya baara lɔyɔrɔ fɔlɔ la. U b’an dɛmɛ ka Masaya waajuli kɛ ani ka mɔgɔw kɛ Krista ka kalandenw ye (Mat. 24:14; 28:19, 20). O zurunaliw be kuma bi koow kan. An be ɲagali k’u yira mɔgɔw la tuma o tuma Masaya baara faan caaman kɛtɔ.
2 Saanw tɛmɛtɔ, an y’a ye k’o zurunaliw bonya n’u kɔnɔ koow ani u jɛnsɛn cogo fana yɛlɛmana. O yɛlɛmaniw kɛra walisa u ka diya tugun mɔgɔw ye ani u ka baara kɛ bɛrɛbɛrɛ. O la, Masaya kibaro be mɔgɔ sifa bɛɛ dusu minɛ walisa u ka se ka kisi, ani u ka tiɲɛn tigitigi lɔnniya sɔrɔ.—1 Tim. 2:4.
3 Kabini saan 2006 zanwiyekalo la, an delila koɲuman ka yiracogo sifa caaman kɛ ni Réveillez-vous ! kelen dɔrɔn ye. Sisan an bena o kelen lo kɛ ka La Tour de Garde annonce le Royaume de Jéhovah kelen dɔrɔn yira an ka cidenya baara la. Zurunali kelen-kelen bɛɛ yiracogo modɛliw be sɔrɔ An ka Masaya Cidenyabaara ɲɛɛ laban na. Tuma caaman na, u be yiracogo dɔ ɲɛfɔ min ɲɛsinna zurunali ka barokun fɔlɔ dɔ ma. Nka tuma dɔw la, u fana be kuma barokun wɛrɛw kan minw ka di mɔgɔ caaman ye. N’an b’o barokun lɔn ka ɲɛ, an be se ka baara kɛ bɛrɛbɛrɛ ni yiracogo modɛliw ye. An k’u yɛlɛma k’a fɔ an yɛrɛ kumacogo la ka kɛɲɛ n’an ka kiinw cogoya ye.
4 Hali ni An ka Masaya Cidenyabaara be zurunali kelen-kelen yiracogo fila di, i kana sigasiga ka yiracogo wɛrɛ kɛ min be dan na pewu yɛrɛ. Mun na do? Sabu, barokun wɛrɛ be se ka diya kiin mɔgɔw ye ka tɛmɛ. Walima i be se ka miiri ko i bena sanga sɔrɔ i kɛtɔ ka barokun dɔ yira min diyara kosɔbɛ e ye.
5 Zurunaliw yiracogo labɛn cogo: Fɔlɔ, i y’a latigɛ ka barokun min yira, i k’o lɔn ka ɲɛ. I tɛna se ka zurunali kɔnɔna koow bɛɛ lɔn tuma bɛɛ ka sɔrɔ k’a yira cidenya baara la. Nka, e kɔni y’a latigɛ ka barokun minw yira mɔgɔw la, i ka kan k’u yira ni kɔnɔgwɛ ni dusudiya ye. I bena se k’o kɛ fɔɔ n’i be o barokun kɔnɔna koow lɔn ka ɲɛ.
6 O kɔ, n’i be baro ladon kumaw labɛnna, i ka magaya. I be se ka baro daminɛ ni ɲiningali bɛnnen dɔ ye min ɲɛsinna barokun ma ani min b’a tigi lasun k’a mako don baro la. Tuma bɛɛ i k’i bolo la Ala ka Kuma sebagaya kan ka mɔgɔw dusu minɛ (Heb. 4:12). I ka vɛrise bɛnnen dɔ sugandi min ɲɛsinna i ka barokun ma. A ka fisa a ka kɛ vɛrise ye min be sɔrɔ barokun yɛrɛ kɔnɔ. I k’a filɛ cogo min na i be se k’o vɛrise tugu barokun la.
7 Tɛmɛ sababuw bɛɛ fɛ: Walisa yiracogo ka sanga sɔrɔ tiɲɛn-tiɲɛn na, fɔɔ i ka baara kɛ n’a ye. I ka jɛn ni kafo ye ka zurunaliw jɛnsɛn samedi loon. I k’u yira mɔgɔw la, minw tun sɔnna gafe wɛrɛw la fɔlɔ la. Tuma o tuma i ka zurunaliw kofɔ Bibulu kalandenw ani mɔgɔ wɛrɛw ye, minw be yen i ka viziti kura kɛ tuma la. I be se ka zurunaliw to mɔgɔw ye i be kuma minw fɛ sanni kɛyɔrɔ la, tagama la, ani kɔnɔni kɛtɔ dɔgɔtɔrɔ fɛ. I ka to ka zurunaliw yiracogo fisaya kalo kuru bɛɛ kɔnɔ.
8 La Tour de Garde ni Réveillez-vous ! ɲɔgɔn tɛ yen. U be Jehova tando i ko duniɲa kuru bɛɛ Masaba (Kɛw. 4:24). U be mɔgɔw dusu saalo ni Ala ka Masaya kibaro duman ye ani u b’u jija u ka limaniya Yesu Krista la (Mat. 24:14; Kɛw. 10:43). Ka fara o kan, u b’a yira cogo min na duniɲa ka koow be Bibulu ka ciraya kumaw dafa (Mat. 25:13). I k’i ka kiin mɔgɔw dɛmɛ u ka nafa sɔrɔ o zurunaliw la i kɛtɔ ka u kofɔ u ye sababu bɛnnenw bɛɛ la!
9 N’i sera ka zurunali dɔ di mɔgɔ dɔ ma, wala hali n’i ye baro diiman dɔrɔn lo kɛ n’a ye Alako kan, i ka kuma wala ɲiningali dɔ labɛn min bena a tigi lasun a ka miiri. O be se ka kɛ viziti kura ani Alako baro wɛrɛ sababu ye. N’an be kisɛya ka tiɲɛn sumansi dan, an be se ka la a la ko Jehova bena mɔgɔw dusu yɛlɛ minw b’a fɛ tiɲɛn-tiɲɛn na k’ale lɔn ani ka baara kɛ a ye.—1 Kɔr. 3:6.
[Study Questions]
1. La Tour de Garde ni Réveillez-vous ! kuun ye mun ye?
2. Yɛlɛmani jumanw kɛra La Tour de Garde ni Réveillez-vous ! la ani mun na?
3. An bena baara kɛ ni zurunaliw ye cidenya baara la cogo di?
4. Mun na nafa b’a la ka yiracogo wɛrɛ kɛ min be dan na ni An ka Masaya Cidenyabaara taw ye?
5. Sanni i ka zurunali yiracogo labɛn i ka kan ka mun lo kɛ fɔlɔ?
6. An be se k’an tɔgɔla yiracogo labɛn cogo di?
7. An be se k’an ka zurunaliw yiracogo fisaya tugun cogo di?
8. Mun na La Tour de Garde ni Réveillez-vous ! ɲɔgɔn tɛ yen?
9. An be se ka viziti kura juu sigi cogo di?