Aw Ka ƝIningaliw Jaabiliw

◼ Farati juman b’a la ka baro kɛ ni mɔgɔ dɔ ye ɛntɛrɛnɛti kan an tɛ min lɔn?

Site Web caaman labɛnna mɔgɔw ye walisa u ka ɲɔgɔn lɔn wala u ka lɛtɛrɛw ci ɲɔgɔn ma. O Site caaman be yɔrɔ dɔw labila mɔgɔw ye u ka kunnafoniw di u yɛrɛw kan ani k’u labila jama ye. Mɔgɔw be se k’u tɔgɔla yɔrɔ dɔ labɛn o Site caaman kan, ani k’u yɛrɛw cogoya lakali jama ye: A be se ka kɛ fotow ye wala fɛɛn wɛrɛw ye. O la, mɔgɔw be se ka kaan bɔ u ye n’u bɔra u kala ma o Site kan. O ɲɔgɔnna Site Web ye sanga sɔrɔ kosɔbɛ denmisɛnw fɛ. Ani kafo ka denmisɛn dɔw be tɛmɛ o Sitew fɛ ka jɛnɲɔgɔnya kɛ ni mɔgɔw ye minw b’a fɔ ko olu ye Jehova Seerew ye.

An be minw kunbɛn ɛntɛrɛnɛti kan, u dɔw ka teli k’an lafili u yɛrɛw cogoya kan, u ka jɛnɲɔgɔnya kan ni Jehova ye, ani u ka ŋaniyaw kan (Zab. 26:4). Mɔgɔ dɔ be se k’a fɔ ko ale ye Jehova Seere ye. Nka tiɲɛn na, a be se ka kɛ dannabali ye, mɔgɔ min gwɛnna ka bɔ kafo kɔnɔ, ani hali Seere murutilen dɔ min b’a ɲinina ka Seere wɛrɛw kunna tiɲɛ (Gal. 2:4). Dɔw ka fɔta la, pedofili caaman be tɛmɛ o Site Web ɲɔgɔnnaw fɛ ka denmisɛnw sɔrɔ ka minɛ.

Hali n’an lanen b’a la ko an be baro kɛra ni minw ye ɛntɛrɛnɛti kan, tɔgɔ ɲuman b’u kan kafo kɔnɔ, o baro be se ka yɛlɛma joona ka kɛ koo nɔgɔlenw kan. Koow be ten sabu mɔgɔw ka teli ka malobaliya koow fɔ n’u be kumana ni dɔw ye u ɲɛɛ tɛ minw na. U be se k’a jati ko u be baro min kɛra ɛntɛrɛnɛti kan, o ye u yɛrɛ ka koo ye, ani k’a miiri ko u be koo o koo fɔra, mɔgɔw tɛna o lɔn, u bangebagaw wala diinan mɔgɔkɔrɔw. A fɔ man di, nka Seere dɔw ka denmisɛn dɔw benna o jan kɔnɔ ani u y’u daa don kakalaya kumaw la (Efɛs. 5:3, 4; Kol. 3:8). Dɔ wɛrɛw ye kakalaya tulon-tɔgɔw n’u yɛrɛw ka fotow don o Sitiw kɔnɔ: foto minw be cɛko ni musoko nege don mɔgɔw la. U fana tɛmɛna ɛntɛrɛnɛti fɛ ka videwo dɔnkili nɔgɔlenw labila mɔgɔw ye o Sitiw kan.

Ka kɛɲɛ ni min fɔra ka tɛmɛ, bangebagaw ka kan k’a kɔrɔsi k’a filɛ u denmisɛnw be baara min kɛ ɔridinatɛri kan (Ntal. 29:15). Farati b’a la ka lonan dɔ ladon an ka soo kɔnɔ, wala k’o tigi to yen n’an ka denmisɛnw dɔrɔn ye. O cogo kelen na, farati b’a la an fɛ wala an ka denmisɛnw fɛ ka teriya kɛ ni lonanw ye ɛntɛrɛnɛti kan, hali n’o mɔgɔw b’a fɔ k’olu ye Jehova Seerew ye.—Ntal. 22:3.