‘Nin Kibaru Duman waajuli bena kɛ’!

1. An b’a lɔn cogo di ko foyi si tɛ se ka waajuli baara lalɔ?

¹ Foyi si tɛ se ka Jehova bali a k’a sago dafa (Es. 14:24). Hali n’a tun be komi kiritigɛla Jedeɔn n’a ka cɛɛ 300 tun tɛna se Madiyankaw ka kɛlɛbolo mɔgɔ 135 000 kɔrɔ, Jehova y’a fɔ a ye ko: “I ka taa ni o ye ka Israɛl bɔnsɔn tila ka bɔ Madiyankaw bolo, yala i m’a dɔn ko ne ye i ci wa?” (Kirit. 6:14). Jehova be dɛmɛ donna baara juman lo la bi? Yesu y’a fɔ ko: “Nin Kibaru Duman waajuli na kɛ diɲɛ yɔrɔw bɛɛ la sankolo masaya ko la.” (Mat. 24:14). Mɔgɔ si tɛ se ka nin baara bali a ka kɛ ka dafa!

2. Mun na an be se k’a miiri ko Jehova bena an kelen-kelen dɛmɛ waajuli la?

² Jehova be an kelen-kelen dɛmɛ: Hali n’an lanen b’a la ko Jehova bena a to a ka Seerew jɛnkululaman ka sanga sɔrɔ, yala an be se ka la a la ko a be an kelen-kelen fana dɛmɛ wa? Tuma min na Pol mako tun be dɛmɛ na, a y’a ye ko Jehova y’o di a ma ka tɛmɛ a Dencɛ Yesu fɛ (2 Tim. 4:17). O cogo kelen na, an be se ka la a la ko an kelen-kelen be jijali minw kɛra walisa k’a sago kɛ, Jehova bena o duga.—1 Yuh. 5:14.

3. Jehova b’an dɛmɛ koo jumanw na?

³ Yala i ka loon o loon baaraw b’a to i tɛ ni fanga bɛrɛ ye waajuli kama wa? “A bɛ se di mɔgɔ barika bannen ma.” (Es. 40:29-31). Yala mɔgɔw be i kɛlɛ wala u be i kɔrɔbɔ wa? “I ka i hamina kow bɛɛ da Matigi kan, ale na i mara.” (Zab. 55:23). Yala kuma ka gwɛlɛ i ma tuma dɔw la wa? “I ka taa sa, ne na i da dɛmɛ.” (Ekis. 4:11, 12). Yala kɛnɛyako b’a to i tɛ se ka caaman kɛ cidenya baara la wa? I be jijali minw bɛɛ kɛra u mana kɛ fitinin cogo o cogo, u nafa ka bon Jehova ɲɛɛ kɔrɔ ani a be se ka tɛmɛ o fɛ ka mɔgɔ dɔ dɛmɛ.—1 Kɔr. 3:6, 9.

4. N’an lanen be Jehova la, o bena nɔɔ juman to an kan?

⁴ Jehova “bolo mɔɔnɔbɔlen don, jɔn na a bolo lakuru?” (Es. 14:27). An lanen b’a la ko Jehova be an ka cidenya baara duga. O kama, an kana waajuli dabila, an ka to ka ‘kuma ni ja gɛlɛya ye, an jigi dalen Matigi kan.’—Kɛw. 14:3.