Kanbelew ni sunguruw: A’ y’aw kɔnɔkow fɔ aw bangebagaw ye

Mun na i ka ɲi k’i kɔnɔ gwɛ k’i kɔnɔkow fɔ i bangebagaw ye? (Talenw 23:26). Sabu Jehova b’a ɲini u fɛ u k’u janto i la ani k’i ɲɛminɛ (Zab. 127:3, 4). A bena gwɛlɛya u ma k’i dɛmɛ n’i b’i kɔnɔkow an’i ka haminankow bɛɛ dogo u la. Ani fana, olu ye hakilitigiya min sɔrɔ u ka ɲɛnamaya kɔnɔ, i tɛna se ka nafa sɔrɔ o la. Yala koo jugu lo ka koo dɔw mara i kɔnɔ n’i t’u fɔ u ye wa? Ayi, koo jugu tɛ. Nka i janto o kana i kɛ filankafo ye.—Talenw 3:32.

I be se ka kuma i bangebagaw fɛ cogo di? Kuma u fɛ wagati dɔ la min bɛnnin be ele ni olu ma. N’a ka gwɛlɛ i ma ka kuma u fɛ, i be se k’i dusukunnakow sɛbɛ lɛtɛrɛ dɔ kɔnɔ ani k’a di u ma. Nka, n’i bangebagaw b’a fɛ ka kuma n’i ye koo dɔ la i t’a fɛ ka baro kɛ min kan do? A to i hakili la k’u b’a fɛ k’i dɛmɛ le. I bangebagaw jati i teriw ye. Kana u ta i juguw ye. N’i b’i jija k’i kɔnɔ gwɛ ka kuma i bangebagaw fɛ, o bena i nafa i ka ɲɛnamaya kuru bɛɛ la, o kɔrɔ, fɔɔ abada!—Talenw 4:10-12.

VIDEWO NIN FILƐ: N’ KA KANBELEYA WALA SUNGURUYA TUMA NA: N’ BE SE KA KUMA N’ BANGEBAGAW FƐ COGO DI? O KƆ, ƝININGALI NUNU JAABI:

• 

  Esther ani Partik sɔnna mun lo la u yɛrɛ koo la?

• 

  I be kalan juman lo sɔrɔ ka bɔ Yezu ka koo la?

• 

  I bangebagaw y’a yira i la cogo di k’u b’u janto i la?

• 

  Bibulu ka sariyakolo jumanw lo be se k’i dɛmɛ ka kuma i bangebagaw fɛ?