Jehova b’an ka deliliw jaabi cogo di?

1-2. N’a sɔrɔ an b’an yɛrɛ ɲininga mun lo la an ka deliliw koo la?

YALA i delila k’i yɛrɛ ɲininga ni Jehova b’i ka deliliw jaabi wa? N’o lo, i kelen tɛ. Balima caaman fana tun b’u yɛrɛ ɲiningara o la, sanko gwɛlɛyaw tuma na. N’an be tɔɔrɔla, a be se ka gwɛlɛya an fana ma k’a lɔn Jehova b’an ka deliliw jaabira cogo minw na.

² An k’a filɛ fɛɛn min kama an be se ka la a la ko Jehova b’a sagokɛlaw ka deliliw jaabi (1 Zan 5:15). An bena ɲiningali nunu jaabi fana: Mun na tuma dɔw la, a be komi Jehova t’an ka deliliw jaabira? Jehova b’an ka deliliw jaabi cogo di bi?

N’A SƆRƆ JEHOVA TƐNA AN KA DELILIW JAABI I KO AN B’A FƐ COGO MIN NA

3. Mun na Jehova b’a fɛ an k’ale deli?

³ Ala ka Kuma b’an hakili sigi ko Jehova b’an kanu kosɔbɛ ani ko an koo ka gwɛlɛ a ma (Aze 2:7; 1 Zan 4:10). O lo kama, a ko an ka dɛmɛ ɲini ale fɛ delili la (1 Piyɛri 5:6, 7). A b’a fɛ k’an dɛmɛ an magwɛrɛnin ka to ale la ani an ka se k’an ka gwɛlɛyaw muɲu.

4. An b’a lɔn cogo di ko Jehova b’a sagokɛlaw ka deliliw jaabi? (Jaa lajɛ fana.)

⁴ An ka teli k’a kalan Bibulu kɔnɔ ko Jehova y’a sagokɛlaw ka deliliw jaabi. Yala i be miirila ɲɛyirali dɔ la wa? An ka kuma masacɛ Dawuda koo la. A ka ɲɛnamaya kuru bɛɛ la, a tun be ni jugu fariman caaman ye ani a tun ka teli ka dɛmɛ ɲini Jehova fɛ delili la. Loon dɔ, a y’a deli ko: “Masaba, ne ka daalili lamɛn, i tulo malɔ ne ka daalili la. E ka kantigiya n’i ka tilenninya kɔsɔn, ne jaabi.” (Zab. 143:1). Jehova ye Dawuda ka deliliw jaabi a kɛtɔ k’a kisi a juguw ma (1 Sam. 19:10, 18-20; 2 Sam. 5:17-25). O la, Dawuda tun lanin b’a la ko “Masaba b’a daalibagaw gɛrɛfɛ.” An fana be se ka la o la.—Zab. 145:18.

5. Galen, yala Jehova tun b’a sagokɛlaw ka deliliw jaabi tuma bɛɛ i ko u tun b’a fɛ cogo min na wa? Misali dɔ fɔ. (Jaa lajɛ fana.)

⁵ N’a sɔrɔ Jehova tɛna an ka deliliw jaabi i ko an b’a fɛ cogo min na. Ciden Pol ka koo b’o lo yira. ‘Ŋɔni dɔ [tun] donna a farikolo la,’ ani a ye Ala deli ko a k’o bɔ. Siɲɛ saba bɛɛ Pol ye delili kɛ tigitigi o gwɛlɛya koo la. Yala Jehova y’a jaabi wa? Ɔnhɔn. Nka a m’o kɛ i ko Pol tun b’a fɛ cogo min na. Sanni Jehova k’o gwɛlɛya bɔ yen, Pol mako tun be dɛmɛ min na ka to kantigiya la, Jehova y’o di a ma.—2 Kor. 12:7-10, Bible senuma.

6. Tuma dɔw la, mun na a be se ka kɛ an ɲɛɛ na ko Jehova t’an ka deliliw jaabira?

⁶ Tuma dɔw la, n’a sɔrɔ Jehova tɛ an fana ka deliliw jaabi i ko an b’a fɛ cogo min na. An ka la a la ko Jehova b’a lɔn tigitigi a be se k’an dɛmɛ cogo fisaman min na. “An be fɛɛn minw daali, walima ka miiri minw la, Ala . . . be se k’o d’an ma, hali ka tɛmɛ o kan yɛrɛ.” (Efɛz. 3:20). O kama, a be se k’an ka deliliw jaabi wagati ani cogo dɔ la, an yɛrɛ tun tɛ miirila min na.

7. An be min deli Jehova fɛ, mun na tuma dɔw la an ka ɲi ka yɛlɛmani don o la? Misali dɔ fɔ.

⁷ Tuma dɔw la an be fɛɛn dɔ deli Jehova fɛ ani o kɔ an b’a faamu ka gwɛ a sago ye min ye o koo la. O la, an ka ɲi k’an ka delili yɛlɛma. An ka balimacɛ Martin Poetzinger ka koo lajɛ. Dɔɔni a furunin kɔ, u y’a don kaso la Naziw ka fanga baarakɛyɔrɔ dɔ la. A daminɛ na, a ye Jehova deli a k’a to ale be bɔ kaso la walisa ka se k’a janto a muso la ani k’a ka waajuli baara daminɛ kokura. Nka lɔgɔkun fila o kɔ, foyi tun t’a yira ko Jehova tun bena a kɛ u b’a bɔ o yɔrɔ la o wagati la. O kama, a y’a daminɛ ka delili kɛ ko: “Jehova, sabari k’a yira n’ na i b’a fɛ n’ ka min kɛ.” O kɔ, balima minw tun be n’a ye o fanga baarakɛyɔrɔ la, a y’a daminɛ ka miiri k’a filɛ gwɛlɛya min b’u kan. U caaman tun be hamina kosɔbɛ u muso n’u deenw koo la. Balimacɛ Poetzinger ye delili kɛ ko: “Jehova, i ye baara kura min kalifa n’ ma, n’ b’i fo o kosɔn. N’ dɛmɛ n’ ka n’ balimaw barika bonya ani k’u jija.” Saan kɔnɔntɔn minw tugura o kɔ, a tora k’o lo kɛ jaatika o fanga baarakɛyɔrɔ la!

8. An ka ɲi ka koo kɔrɔtanin juman lo to an hakili la n’an be delili kɛra?

⁸ An ka ɲi k’a to an hakili la ko Jehova be ni sagonata dɔ ye ani ko a bena o dafa a ka wagati latigɛnin na. Misali la, gwɛlɛya minw b’a to an be tɔɔrɔ kosɔbɛ bi, a sagonata ye k’olu bɛɛ ban pewu! U dɔw ye balawokow, banaw ani saya ye. Jehova bena a sagonata dafa a ka Masaya sababu fɛ (Dan. 2:44; Yir. 21:3, 4). Nka yanni o cɛ, a b’a tora Sutana ka duniɲa nin mara b (Zan 12:31; Yir. 12:9). Ni Jehova ye duniɲa ka gwɛlɛyaw bɛɛ ɲɛnabɔ sisan, a bena kɛ komi Sutana be duniɲa nin marala ka ɲɛ. O la, hali n’an ka ɲi ka kɔnɔni kɛ Jehova k’a ka layidu dɔw dafa, o kɔrɔ tɛ ko a b’an to an kelen na. Jehova b’an dɛmɛ cogo minw na, an k’u damanin lajɛ.

JEHOVA B’AN KA DELILIW JAABI COGO MINW NA BI

9. N’an ka ɲi ka desizɔnw ta, Jehova be se k’an dɛmɛ cogo di? Misali dɔ fɔ.

⁹ A be hakilitigiya di an ma. Jehova ye layidu ta ko a bena hakilitigiya di an ma walisa an ka se ka desizɔn ɲumanw ta. Hakilitigiya min be bɔ Jehova yɔrɔ, an mako b’o la sanko n’an ka ɲi ka desizɔnw ta minw bena nɔɔ to an ka ɲɛnamaya tɔɔ bɛɛ kan. O desizɔn dɔ ye n’an b’a latigɛra n’an bena furu wala n’an tɛna furu (Zaki 1:5). An ka Maria ka koo lajɛ.c Balimamuso dɔ lo ani a furunin tɛ. A ninsɔn tun ka di kudayi piyɔniye baara la tuma min na a ye balimacɛ dɔ kunbɛn. A ko: “An ka teriya tora ka sabati minkɛ, an koo tora ka diya ɲɔgɔn ye. N’ tun b’a lɔn ko n’ ka ɲi ka desizɔn dɔ ta. N’ ye delili kɛ kosɔbɛ wagatijan kɔnɔ o koo la. N’ mako tun be Jehova ka dɛmɛ na. Nka, n’ tun b’a lɔn fana ko ale lo tɛna desizɔn ta n’ nɔɔ na.” A y’a ye ko Jehova y’a ka deliliw jaabi a kɛtɔ ka hakilitigiya di a ma. Cogo di do? Maria ye sɛgɛsɛgɛri kɛ an ka gafew kɔnɔ ani a ye barokun tigitigi dɔw sɔrɔ minw y’a dɛmɛ k’a ka ɲiningaliw jaabiliw sɔrɔ. A y’a bamuso ka ladili ɲumanw lamɛn fana o min ye Jehova sagokɛla kantigi dɔ ye. O ladiliw ye Maria dɛmɛ k’a dusukunnakow sɛgɛsɛgɛ. A laban, a ye desizɔn ɲuman ta.

10. Ka kɛɲɛ ni Filipikaw 4:13 ye, Jehova bena mun lo kɛ k’a sagokɛlaw dɛmɛ? Misali dɔ fɔ. (Jaa lajɛ fana.)

¹⁰ A be fanga di an ma an ka se ka muɲuli kɛ. I ko a ye ciden Pol dɛmɛ cogo min na, Jehova bena fanga di an fana ma walisa an ka se ka gwɛlɛyaw muɲu (Filipikaw 4:13 kalan).d An k’a filɛ Jehova ye balimacɛ Benjamin dɛmɛ cogo min na gwɛlɛyaw tuma na. Benjamin y’a ka kanbele tuma fanba kɛ kalifayɔrɔw la n’a somɔgɔw ye Afiriki. A ko: “N’ tun be Jehova deli tuma o tuma a ka fanga di n’ ma walisa n’ k’a sago kɛ. A ye n’ ka deliliw jaabi. A ye hakilisigi di n’ ma, ka n’ jaa gwɛlɛya walisa n’ ka to ka waajuli kɛ ani n’ mako tun be gafe minw na walisa n’ magwɛrɛnin ka to a la, a y’o fana di n’ ma.” Benjamin y’a fɔ fana ko: “N’ ye balimaw ka maanaw kalan ani n’ y’a faamu Jehova y’u dɛmɛ cogo min na ka muɲuli kɛ. O ye n’ dɛmɛ n’ cɛsirinin tora kosɔbɛ ka to kantigiya la.”

11-12. Jehova be se ka tɛmɛ an balimaw fɛ cogo di k’an ka deliliw jaabi? (Jaa lajɛ fana.)

¹¹ A be tɛmɛ an balimaw fɛ. Yezu ka suu laban na, a ye Jehova deli kosɔbɛ. A ko a kana a to mɔgɔw k’ale jalaki ko a ye Ala tɔgɔtiɲɛbaga ye. Sanni Jehova k’o kɛ, a y’a dɛmɛ a kɛtɔ ka mɛlɛkɛ dɔ ci walisa k’a barika bonya (Luka 22:42, 43). Jehova be se k’an fana dɛmɛ a kɛtɔ k’a to balima dɔ b’an weele telefɔni na wala ka na bɔ an ye walisa k’an jija. An bɛɛ be se ka sababuw ɲini ka “kumaɲuman” dɔ fɔ an kerecɛnɲɔgɔnw ye.—Talenw 12:25.

¹² An ka balimamuso Miriam ka koo lajɛ. Lɔgɔkun damanin a cɛɛ sanin kɔ, Miriam tun b’a ka soo a kelen, a dusu tun tiɲɛni lo ani a jigi tigɛninba tun lo. A tun b’a la ka kasi dɔrɔn ani a mako tun b’a la ka kuma ni mɔgɔ dɔ ye. A ko: “Fanga tun tɛ n’ na ka mɔgɔ dɔ weele. O kama, n’ ye Jehova deli. Ka n’ to kasi ni delili la, n’ ka telefɔni sonera. Diinan mɔgɔkɔrɔ dɔ tun lo min ye n’ teri sɔbɛ dɔ ye.” O diinan mɔgɔkɔrɔ n’a muso ye Miriam dusu saalo. A lanin b’a la ko Jehova lo ye o balimacɛ lasun a y’ale weele.

13. Wale dɔ lakali min b’a yira ko hali minw tɛ Jehova sagokɛlaw ye, a be se ka tɛmɛ u fɛ k’an ka deliliw jaabi.

¹³ Minw tɛ Jehova sagokɛlaw ye, a be se ka tɛmɛ u fɛ (Talenw 21:1). Tuma dɔw la, Jehova be a sagokɛlaw ka deliliw jaabi a kɛtɔ ka dannabaliw lasun u k’u dɛmɛ. Misali la, a ye masacɛ Aritasɛrisɛsi lasun a ye sira di Neemi ma a ka kɔsegi Zeruzalɛmu walisa ka dɛmɛ don ka o dugu lɔ kokura (Neemi 2:3-6). Bi fana, n’an mako be dɛmɛ na, hali minw tɛ a batobagaw ye, a be se k’olu lasun u k’an dɛmɛ.

14. Mun lo diyara i ye Soo Hing ka koo la? (Jaa lajɛ fana.)

¹⁴ Balimamuso Soo Hing b’a jati ko Jehova tɛmɛna dɔgɔtɔrɔcɛ dɔ fɛ k’ale dɛmɛ. Hakiliɲagami bana caaman tun be a dencɛ tɔɔrɔla. Tuma min na u dencɛ ye aksidan jugu dɔ kɛ, ale n’a cɛɛ ye u ka baara to yen walisa k’u janto a la. O kama, wariko gwɛlɛya tun b’u kan. Soo Hing ko ale tun be komi lenburu, u ye min bisi k’a jii bɛɛ bɔ a la. A y’a dusukunnakow bɛɛ fɔ Jehova ye ani a ye dɛmɛ ɲini a fɛ. Dɔgɔtɔrɔcɛ min tun b’a dencɛ furakɛra, ale ye fɛɛrɛ dɔ ɲini walisa ka balimamuso n’a ka denbayamɔgɔw dɛmɛ. O y’a to u sera ka gofɛrɛnɛman ka dɛmɛ ani siyɔrɔ ɲuman sɔrɔ. O kɔ, Soo Hing ko: “An y’a ye Jehova y’an dɛmɛ cogo min na. Tiɲɛn na, a be ‘daaliliw mɛn.’”—Zab. 65:3.

LIMANIYA B’A TO AN B’A ƝINI K’AN KA DELILIW JAABICOGO LƆN ANI KA SƆN O MA

15. Mun lo ye balimamuso dɔ dɛmɛ k’a faamu ko Jehova tun b’a ka deliliw jaabira?

¹⁵ Tuma caaman na, an sankolola Faa t’an ka deliliw jaabi cogo kabakoman na. Nka a b’u jaabi cogo min na, an mako b’o lo la tigitigi walisa ka to kantigiya la. O la, a ɲini k’a lɔn a b’i ka deliliw jaabi cogo min na. Balimamuso Yoko tun b’a miiri ko Jehova tɛ ale ka deliliw jaabi. O kɔ, a tun be fɛɛn minw deli Jehova fɛ, a y’a daminɛ k’u sɛbɛ. Wagati damanin o kɔ, a y’a ka karne filɛ ani a y’a faamu ko Jehova y’a ka deliliw fanba jaabi, hali ale yɛrɛ tun ɲinɛna minw kɔ. Jehova b’an ka deliliw jaabi cogo min na, tuma kelen kelen a ka ɲi an ka wagati ta ka miiri o la.—Zab. 66:19, 20.

16. Delili koo la, an be se k’a yira cogo di ko an limaniyanin lo? (Eburuw 11:6).

¹⁶ An b’a yira ko an limaniyanin lo n’an be Jehova deli. Nka, o dɔrɔn tɛ. A mana an ka deliliw jaabi cogo o cogo, an ka ɲi k’a yira fana ko an sɔnna o ma (Eburuw 11:6 kalan). An ka Mike n’a muso Chrissy ka koo lajɛ. U tun b’a fɛ ka baara kɛ Betɛli la. Mike ko: “Ne ni n’ muso ye demandiw dafa saan caaman kɔnɔ ani an ye delili kɛ siɲɛ caaman na o laɲinita koo la. Nka, u m’an weele ka ye.” Ale n’a muso lanin b’a la tuma bɛɛ ko Jehova b’a lɔn a be se ka tɛmɛ an fɛ cogo fisaman min na k’a ka baara kɛ. U tora k’u seko bɛɛ kɛ Jehova ka baara la. U tun ye kudayi piyɔniyew ye yɔrɔ min na weleweledalaw man ca ani u tun be dɛmɛ don Masaya Boonw n’a ɲɔgɔnnaw lɔli baara la. Bi bi nin na, u be kafokulu kɔrɔsili baara la. Mike ko: “Jehova m’an ka deliliw jaabi tuma bɛɛ i ko an tun b’a fɛ cogo min na. Nka a y’u jaabi. Ani a y’o kɛ cogo fisaman dɔ la, an yɛrɛ tun ma miiri min na.”

17-18. Ka kɛɲɛ ni Zaburuw 86:6, 7 ye, an be se ka la mun lo la?

¹⁷ Zaburuw 86:6, 7 kalan. Zaburu sɛbɛbaga Dawuda tun lanin b’a la ko Jehova b’ale ka deliliw lamɛn ani a b’u jaabi. Ele fana be se ka la a la ko Jehova b’i ka deliliw lamɛn ani a b’u jaabi. An ye ɲɛyirali minw lajɛ barokun nin na, u b’an hakili sigi ko an mako be hakilitigiya ni fanga min na walisa ka muɲuli kɛ, Jehova b’o di an ma. A be se ka tɛmɛ an balimaw fɛ k’an dɛmɛ cogo dɔ la. Minw tɛ a sago kɛra fɔlɔ, a yɛrɛ be se ka tɛmɛ olu fɛ.

¹⁸ Hali ni Jehova t’an ka deliliw jaabi tuma bɛɛ i ko an b’a fɛ cogo min na, an lanin b’a la ko a bena u jaabi. An mako be min na, a bena o lo di an ma jaatika ani a bena o kɛ wagati bɛnnin na. O la, to ka Jehova deli ani la a la ko a bena i ka delili jaabi. La a la fana ko a bena a janto i la sisan ani ko duniɲa kura nata kɔnɔ, a bena “nimanfɛnw bɛɛ wasa.”—Zab. 145:16.