I labɛnnin ka to Jehova ka loon kama

1. An ka ɲi ka mun lo kɛ walisa ka kisi Jehova ka loon na?

JEHOVA ka “loon” ye mun lo ye? Bibulu kɔnɔ wagati dɔ lo, o min na Jehova bena kiti tigɛ a juguw kan ani k’a ka mɔgɔw kisi. Galen, Jehova ye kiti tigɛ siya dɔw kan (Ezayi 13:1, 6; Ezek. 13:5; Sof. 1:8). An be Jehova ka “loon” min makɔnɔna, o bena daminɛ tuma min na politiki ɲɛmɔgɔw bena wuli Babilonɛba kama ani a bena ban ni Arimagedɔn kɛlɛ ye. Walisa ka kisi o “loon” na, an ka ɲi k’an yɛrɛ labɛn kabi sisan. Yezu b’an jija ko an k’an yɛrɛ labɛn “tɔɔrɔba” kama. Nka o dɔrɔn tɛ, a ko fana an “labɛnnin ka kan ka to” o loon kama.—Mat. 24:21; Luka 12:40.

2. Tesalonikaw ka bataki fɔlɔ kɔnɔnakumaw be se k’an nafa cogo di?

² Ciden Pol ye bataki fɔlɔ min sɛbɛ Tesalonikaw ma hakili senu barika la, a ye misali caaman fɔ yen walisa ka kerecɛnw dɛmɛ u labɛnnin ka to Jehova ka kitilonba kama. A tun b’a lɔn ko Jehova ka loon tun tɛna se u ka wagati la (2 Tes. 2:1-3). Nka, a y’a balimaw jija u k’u yɛrɛ labɛn i n’a fɔ a bena na sini le. An fana be se k’a ka ladiliw sira tagama. An k’a filɛ a ye min fɔ ka ɲɛsin koo nunu ma: 1) Jehova ka loon bena na cogo di? 2) Jɔnw lo tɛna kisi o loon na? Ani 3) an be se k’an yɛrɛ labɛn cogo di walisa ka kisi?

JEHOVA KA LOON BENA NA COGO DI?

3. Kɔrɔ juman na Jehova ka loon bena na i ko soon be na sufɛ cogo min na? (Jaa lajɛ fana.)

³ “I ko soon be na sufɛ cogo min na.” (1 Tes. 5:2). Pol ye misali saba minw fɔ ka ɲɛsin Jehova ka loon nali koo ma, nin ye u la fɔlɔ ye. Soonw ka teli ka soɲɛni kɛ joona joona ani u b’o kɛ sufɛ le, tuma min na mɔgɔw be sinɔgɔra. Jehova ka loon fana bena na ten le ani a bena bari mɔgɔ caaman na. Koow bena kɛ joona joona cogo min na, o be se ka bari hali kerecɛn sɔbɛw la. Nka an bena kisi, mɔgɔ juguw lo bena halaki.

4. Kɔrɔ juman na Jehova ka loon be i n’a fɔ muso ka tiin?

⁴ “I n’a fɔ muso ka tiin.” (1 Tes. 5:3). Muso kɔnɔman tɛ se k’a lɔn a bena jigi wagati tigitigi min na. Nka, a b’a lɔn ko a bena jigi, siga t’o la. N’a jigituma sera, tiin be cun a kan, a kɔnɔ b’a dimi ani mɔgɔ tɛ se k’o dimi lalɔ. O cogo kelen na, an t’a lɔn Jehova ka loon bena na loon ani lɛri tigitigi min na. Nka, an lanin b’a la ko a bena na ani ko Ala ka kiti bena bari mɔgɔ juguw la. U tɛna se ka kisi.

5. Kɔrɔ juman na tɔɔrɔba bena kɛ i n’a fɔ dugugwɛda yeelen?

⁵ I n’a fɔ dugugwɛda yeelen. Pol ka misali sabanan na, a kumana tugun soonw koo la minw be soɲani kɛ sufɛ. Nka sisan, a be komi Pol ye Jehova ka loon suma ni dugugwɛda yeelen ye (1 Tes. 5:4). Minw be soɲɛni kɛ sufɛ, u bolo degunnin be se ka to fɔɔ wagati be tɛmɛ u ɲina ma. Dugugwɛda yeelen be se ka bari u la ani k’a to bɛɛ b’u ye. O cogo kelen na, minw be to ka dibidibikow kɛ i n’a fɔ soonw, tɔɔrɔba wagati la, u ka kɛwale juguw bena bɔ kɛnɛ kan. An t’a fɛ ka kɛ i n’a fɔ olu. Walisa an labɛnnin ka to, koo minw man di Jehova ye, an t’a fɛ k’olu kɛ. Nka, an b’an jija ka “ɲumanya, tilenninya, ani tiɲɛko” lo kɛ (Efɛz. 5:8-12). O kɔ, Pol ye misali fila fɔ ka ɲɛsin mɔgɔw ma minw tɛna kisi.

JƆNW LO TƐNA KISI JEHOVA KA LOON NA?

6. Kɔrɔ juman na mɔgɔw fanba ye sinɔgɔbagatɔw ye? (1 Tesalonikaw 5:6, 7).

⁶ Minw be ‘sinɔgɔra’ (1 Tesalonikaw 5:6, 7 kalan). Minw tɛna kisi Jehova ka loon na, Pol ye olu suma ni sinɔgɔbagatɔw ye. Koo minw be kɛra u gɛrɛfɛ ani wagati min be tɛmɛna, u t’o kala ma. O kama, u t’a faamu koo kɔrɔtaninba minw be kɛra ani u ka ɲi ka min kɛ. Bi, mɔgɔw fanba be sinɔgɔra Alako ta fan fɛ (Ɔrɔm. 11:8). Koo minw b’a yira ko an be laban loonw lo la ani ko tɔɔrɔba wagati surunyana, u lanin t’o la. Yɛlɛmaniba minw be kɛra duniɲa kɔnɔ, o b’a to dɔw b’u mako don Masaya kibaro diiman na. Nka, u fanba be tila ka sinɔgɔ tugun Alako ta fan fɛ sanni ka to ɲɛɛ na. Hali minw lanin b’a la ko Ala ka kitilon bena na, olu fɛ o tɛ sisan koo ye (2 Piyɛri 3:3, 4). Nka, an b’a lɔn ko a kɔrɔtanin lo an ka to ɲɛɛ na loon o loon.

7. Ala bena mɔgɔ minw halaki, kɔrɔ juman na olu be i ko dɔrɔtɔw?

⁷ “Dɔrɔtɔw.” Ala bena mɔgɔ minw halaki, Pol ye olu suma ni dɔrɔtɔw ye. Dɔrɔtɔw ka suma u ka koow la ani u tɛ desizɔn ɲumanw ta. O cogo kelen na, mɔgɔ juguw tɛ koow kɛ ka kɛɲɛ ni Ala ka lasɔmini kumaw ye. U b’a latigɛ ka ɲɛnamaya kɛ cogo dɔ la min bena a to u be halaki. Nka, a ɲinina kerecɛnw fɛ ko u kana kɛ i ko dɔrɔtɔw, nka u hakili siginin ka to (1 Tes. 5:6). Bibulu sɛgɛsɛgɛrikɛla dɔ ko mɔgɔ min hakili siginin lo, “o tigi ɲɛma lɔnin lo ani a sirannin tɛ. O la, a be miiri koɲuman ani ka desizɔn ɲumanw ta.” Mun na an ɲɛma lɔnin ani an hakili siginin ka ɲi ka to? O la, an tɛna an seen don politikikow ani duniɲa ka koow la. Ni Jehova ka loon be surunyana kosɔbɛ, u bena to ka a gwan an kun an ka to k’an seen don o koow la. Nka, an bena koow ta cogo min na, an man ɲi ka hami o la. Ala ka hakili senu bena an dɛmɛ an hakili siginin ka to ani an ka miiri koɲuman walisa ka desizɔn ɲumanw ta.—Luka 12:11, 12.

AN BE SE K’AN YƐRƐ LABƐN COGO DI JEHOVA KA LOON KAMA?

8. Ka kɛɲɛ ni 1 Tesalonikaw 5:8 ye, jogo minw be se k’an dɛmɛ ka to ɲɛɛ na ani an hakili siginin ka to, Pol ye olu suma ni mun lo ye? (Jaa lajɛ fana.)

⁸ “Nigɛkunbɛnnan [wala nɛgɛdeleke, NW]” ani “nigɛfugulan” don. Pol y’an suma ni sɔrɔdasiw ye, kɛlɛkɛfani be minw kaan na ani u labɛnnin lo kɛlɛ kama (1 Tesalonikaw 5:8 kalan). Kɛlɛ tuma na, sɔrɔdasiw labɛnnin ka ɲi ka to tuma bɛɛ. An fana labɛnnin bena to Jehova ka loon kama, n’an be limaniya ni kanuya nɛgɛdeleke don ani ka jigiya nɛgɛfugulan biri. O jogow be se k’an dɛmɛ kosɔbɛ.

9. An ka limaniya b’an latanga cogo di?

⁹ Nɛgɛdeleke be sɔrɔdasi dusukun latanga. Limaniya ni kanuya fana b’an dusukun latanga Alako ta fan fɛ. O jogow b’an dɛmɛ an ka to ka Ala sago kɛ ani ka tugu Yezu kɔ. Limaniya b’a to an be la a la ko n’an be Jehova ɲini n’an dusu bɛɛ ye, a bena an duga (Eburuw 11:6). Limaniya b’an lasun ka kantigiya kɛ an Kuntigi Yezu ye, hali ni gwɛlɛyaw b’an kan. An be se k’an ka limaniya barika bonya walisa ka gwɛlɛyaw muɲu, an kɛtɔ ka kerecɛn dɔw ladegi. U tora kantigiya la kɔrɔbɔli ani wariko gwɛlɛya bɛɛ n’a ta. Minw y’a latigɛ ka ɲɛnamaya kɛ cogo nɔgɔman na walisa ka Ala ka Masaya ɲini fɔlɔ, an be se k’olu ladegi. O la, an bena an yɛrɛ tanga bololafɛnw ani wari kanuya ma.b

10. An be Ala n’an mɔgɔɲɔgɔnw kanu minkɛ, o b’an dɛmɛ cogo di ka muɲuli kɛ?

¹⁰ A kɔrɔtanin lo kosɔbɛ an ka kɛ ni kanuya ye walisa ka to ɲɛɛ na ani an hakili siginin ka to (Mat. 22:37-39). An be ni kanuya min ye Ala koo la, o b’an dɛmɛ ka gwɛlɛya sifa bɛɛ muɲu waajuli la (2 Tim. 1:7, 8). Hali minw tɛ Jehova Seerew ye, an be olu fana kanu. O lo kama an be to ka waajuli kɛ an ka kiinw kɔnɔ. An b’o kɛ, hali telefɔni ni lɛtɛrɛw sababu fɛ. An jigi b’a la ko loon dɔ an ka kiinmɔgɔw sɔɔn bena yɛlɛma ani u bena a daminɛ ka koo tilennin kɛ.—Ezek. 18:27, 28.

11. An be an balimaw kanu minkɛ, o b’an dɛmɛ cogo di? (1 Tesalonikaw 5:11).

¹¹ An b’an kerecɛnɲɔgɔnw fana kanu. An b’o kanuya yira, an kɛtɔ “ka ɲɔgɔn jigi tugu, ani ka ɲɔgɔn dɛmɛ.” (1 Tesalonikaw 5:11 kalan). An be ɲɔgɔn jija i ko sɔrɔdasi minw be ɲɔgɔn gɛrɛfɛ kɛlɛ la. Tiɲɛn lo ko sɔrɔdasi dɔ be se k’a sɔrɔdasiɲɔgɔn mandimi kɛlɛ la. Nka, a tɛna tugu k’o kɛ abada. An fana tɛna tugu ka don an balima dɔ gasi la wala ka juguman sara ni juguman ye (1 Tes. 5:13, 15). An b’an ka kanuya yira fana an kɛtɔ ka bonya la balimaw kan minw b’an ɲɛminɛ kafo kɔnɔ (1 Tes. 5:12). Tuma min na Pol y’a ka bataki fɔlɔ ci Tesalonikaw ka kafo ma, o kafo tun sigira a ma saan kelen yɛrɛ bɔ. A be komi o kafo ɲɛminɛbagaw tun tɛ bɛrɛ lɔn ani u tun be fili dɔw kɛ. O bɛɛ n’a ta, u tun ka kan ni bonya ye. Ni tɔɔrɔba wagati be surunyana kosɔbɛ, n’a sɔrɔ tuma dɔw la an tɛna se ka cikanw sɔrɔ ka bɔ an ka sigiyɔrɔsoba wala Betɛli la. O wagati la, an mako bena kɛ a la kosɔbɛ ka diinan mɔgɔkɔrɔw ka cikanw labato ka tɛmɛ sisan kan. O la, a kɔrɔtanin lo an ka diinan mɔgɔkɔrɔw kanu ani ka bonya la u kan kabini sisan. Koow mana kɛ cogo o cogo, an ka ɲi k’an hakili sigi ani an kana sinsin u ka filiw kan. Nka, an ka ɲi ka sinsin min kan, o ye ko Jehova be tɛmɛ Krista lo fɛ k’o cɛɛ kantigiw ɲɛminɛ.

12. An ka jigiya b’an ka miiriya latanga cogo di?

¹² Nɛgɛfugulan be sɔrɔdasi kuun latanga. An ka kisili jigiya fana be an ka miiriya latanga. An be ni jigiya barikaman ye minkɛ, an b’a lɔn ko duniɲa nin be fɛɛn o fɛɛn di an ma, nafa t’u si la (Filip. 3:8). O jigiya b’a to an tɛ siran ani an hakili siginin be to. Balimacɛ Wallace n’a muso Laurinda y’o lo kɔrɔsi k’u to u ka cidenya baara la Afiriki. Lɔgɔkun saba kɔnɔ, u kelen kelen bɛɛ bangebaga dɔ banna. COVID-19 fɔɲɔbana kosɔn, u ma se ka kɔsegi u faso la walisa ka wagati kɛ n’u somɔgɔw ye. Wallace y’a sɛbɛ ko: “Sukununi jigiya y’a to n’ tɛ miiri u la i ko u tun be cogo min na u ka loon labanw na duniɲa nin kɔnɔ. Nka, u bena kɛ cogo min na u suu kununin kɔ duniɲa kura kɔnɔ, n’ be miiri o lo la. Ni n’ dusu tiɲɛna wala ni n’ bangebaga ɲɛnafin be n’ na, o jigiya be n’ hakili sigi.”

13. An be se ka hakili senu sɔrɔ cogo di?

¹³ “Kana Nin Saninman ta tasuma faga.” (1 Tes. 5:19, Biblu Ala ta Kuma). Pol ko hakili senu be i ko tasuma an dusukun na. Ni hakili senu b’an fɛ, an kisɛyanin lo, an dusu ka di ka koo ɲuman kɛ ani an be fanga sɔrɔ ka baara kɛ Jehova ye (Ɔrɔm. 12:11). An be se ka hakili senu sɔrɔ cogo di? An be se k’a deli Ala fɛ, ka Ala ka Kuma kalan, o min sɛbɛra hakili senu sababu fɛ ani ka jɛn ni Ala ka ɔriganisasiyɔn ye, a ka hakili senu be o min ɲɛminɛ. O bena a to an be kɛ ni “Ni Senu den ye.”—Gal. 5:22, 23, Bible senuma.

14. An ka ɲi k’an yɛrɛ tanga mun lo ma n’an b’a fɛ ka to ka Ala ka hakili senu sɔrɔ? (Jaa lajɛ fana.)

¹⁴ Ni Ala y’a ka hakili senu di an ma, an ka ɲi k’an janto kosɔbɛ an kana o “Nin Saninman ta tasuma faga.” Minw be banba ka kɛ ni miiriya ni kɛwale ɲumanw ye tuma bɛɛ, Ala b’a ka hakili senu di olu dɔrɔn lo ma. A tɛna to k’a ka hakili senu di an ma n’an be koo juguw miiri ani ka kɛwale juguw kɛ (1 Tes. 4:7, 8). Walisa ka to ka hakili senu sɔrɔ, an man ɲi ka “kirayakuma lɔgɔbɔ.” (1 Tes. 5:20). O “kirayakuma” ɲɛsinna Ala ka kumaw lo ma a ye minw lase an ma a ka hakili senu barika la. U dɔw ɲɛsinna Jehova ka loon ma ani u b’a yira ko o loon surunyana kosɔbɛ. An t’a miiri ko Jehova ka loon wala Arimagedɔn tɛna na an sɔrɔ sii la. Nka, an b’a yira ko an lanin b’a la k’o loon bena se yanni dɔɔni, an kɛtɔ ka “siran Ala ɲa” ani k’an jija an “taamacogo ka ɲa” loon o loon.—2 Piyɛri 3:11, 12.

“AW KA KOO BƐƐ SƐGƐSƐGƐ”

15. An b’an yɛrɛ tanga cogo di ngalon kumaw ani jinaw ka lafilikow ma? (1 Tesalonikaw 5:21).

¹⁵ Yanni dɔɔni, Ala juguw bena a fɔ ko: “Hɛrɛ ni jigisigi be yen.” (1 Tes. 5:3). Jinaw ka mɔgɔ lafilikow bena fa dugukolo kan ani u bena mɔgɔ caaman lafili (Yir. 16:13, 14). Nka, o koow tɛna an lafili n’an be “koo bɛɛ sɛgɛsɛgɛ.” (1 Tesalonikaw 5:21 kalan). Gɛrɛkikan kumaden min bayɛlɛmana ko “sɛgɛsɛgɛ,” o ɲɛsinna sanu wala warigwɛ sɛgɛsɛgɛri lo ma walisa k’a lɔn n’a yɛrɛ yɛrɛ lo. O la, an be min mɛn wala an be min kalan, an ka ɲi k’o sɛgɛsɛgɛ k’a filɛ ni tiɲɛn lo. O tun kɔrɔtanin lo Tesalonikaw fɛ, ani o bena kɛ koo kɔrɔtanin ye an fɛ yɛrɛ le, sanko n’an be surunyana kosɔbɛ tɔɔrɔba wagati ma. Sanni an ka la fɔtaw bɛɛ la, an be baara kɛ n’an hakili ye k’u suma ni Bibulu ani Jehova ka ɔriganisasiyɔn ka fɔtaw ye. O la, jinaw ka lafiliko si tɛna an kunnatiɲɛ.—Talenw 14:15; 1 Tim. 4:1.

16. An be ni jigiya sɔbɛ juman lo ye ani an cɛsirinin lo ka mun lo kɛ?

¹⁶ An b’a lɔn ko Jehova sagokɛlaw jamakulu bena kisi tɔɔrɔba wagati la. Nka, an t’a lɔn min bena an kelen kelen sɔrɔ sini ma (Zaki 4:14). N’a sɔrɔ an bena kisi tɔɔrɔba wagati la, wala o wagati bena na a sɔrɔ an sara. A mana kɛ min o min ye, an bena ɲɛnamaya banbali sɔrɔ n’an tora kantigiya la. Kerecɛn mɔlenw bena kɛ ni Krista ye sankolo la. Ani saga dɔ wɛrɛ mɔgɔw bena ɲɛnamaya kɛ alijɛnɛ kɔnɔ dugukolo kan. An kelen kelen bɛɛ ka to ka miiri an ka jigiya ɲuman koo la ani an labɛnnin ka to Jehova ka loon kama!