N’ latanganin lo sabu n’ be n’ jigi la Jehova kan

N’ YE JEHOVA LƆN ANI N’ YE N’ JIGI LA A KAN

N’ wolola saan 1948 dugu dennin dɔ la Nizeriya worodugu ni tileben cɛ. O wagati la, n’ facɛfitini Moustapha ani n’ kɔrɔcɛ Wahabi batizera ka kɛ Jehova Seerew ye. N’ saan kɔnɔntɔn, n’ facɛ banna. N’ dusu tun kasinin lo yɛrɛ le! Wahabi y’a fɔ n’ ye ko an be se k’an facɛ ye tugun sukununi tuma na. O dususalo kumaw ye n’ lasun ka bibulukalan kɛ ani n’ batizera saan 1963. N’ kɔrɔcɛ fila ani n’ dɔgɔcɛ fana batizera.

Saan 1965, n’ tagara n’ kɔrɔcɛ Wilson fɛ Lagɔsi dugu la. N’ ninsɔn diyara ka jɛnɲɔgɔnya kɛ ni kudayi piyɔniyew ye Igbobi kafo kɔnɔ. U ka ninsɔndiya n’u ka kisɛya ye n’ jija ani saan 1968 zanwiyekalo la, ne fana kɛra piyɔniye ye.

Betɛli balimacɛ dɔ min tɔgɔ ko Albert Olugbebi, ale ye lajɛn kɛrɛnkɛrɛnnin dɔ kɛ ni kanbelew ni sunguruw ye. O lajɛn na, a y’a fɔ ko u mako be dan na piyɔniyew la Nizeriya saheli fan fɛ. Balimacɛ Olugbebi tun be kumana ni dusudiya ye cogo min na, n’ bele hakili b’o la. A ko: “Aw ye kanbelew ni sunguruw ye ani aw be se k’aw ka wagati n’aw fanga kɛ ka baara kɛ Jehova ye. Baara caaman be yen ka kɛ o yɔrɔ la!” N’ tun b’a fɛ ka kira Ezayi ladegi n’ kɛtɔ ka n’ yɛrɛ di ka baara kɛ Jehova ye. O kama, n’ ye demandi dɔ dafa.—Ezayi 6:8.

Saan 1968 mɛkalo la, u ko n’ ka kɛ dan na piyɔniye ye Kano dugu la, Nizeriya saheli fan fɛ. O kɛra Biafra ka kɛlɛ wagati la (1967-1970). O kɛlɛ kɛra tɔɔrɔ caaman sababu ye ani mɔgɔ caaman sara o sen fɛ Nizeriya saheli fan fɛ. O kɔ, o kɛlɛ jɛnsɛnna kɔrɔn fan fɛ. Balimacɛ dɔ y’a ɲini ka n’ bali ka taga sabu a tun t’a fɛ koo jugu ka n’ sɔrɔ. Nka, n’ y’a fɔ a ye ko: “I ni ce sabu i be i janto n’ na. Nka, ni Jehova b’a fɛ n’ ka baara kɛ a ye o yɔrɔ la, siga t’a la, a bena kɛ ni n’ ye.”

N’ YE N’ JIGI LA JEHOVA KAN KƐLƐYƆRƆ LA

Kɛlɛ tun ye Kano duguba halaki cogo min na, a tun be mɔgɔ dusu kasi yɛrɛ le k’o ye. U tun ye mɔgɔ minw faga o kɛlɛ tuma na, tuma dɔw la, an tun be u suuw ye waajuli kɛtɔ. Kafo caaman tun be yen o dugu la, nka balimaw fanba tun bolila. Weleweledala minw tun tora, u tun ma se mɔgɔ 15 ma. U tun sirannin lo fana ani u jigi tun tigɛnin lo. Nka, u ninsɔn diyara kosɔbɛ tuma min na ne ni dan na piyɔniye duuru wɛrɛw nana. An ka jijali kumaw ye balimaw barika bonya kosɔbɛ. An y’u dɛmɛ ka lajɛnw ni waajuli baara daminɛ kokura. An y’u dɛmɛ fana walisa u ka to k’u ka rapɔɔriw n’u ka zurunaliw komandiw ci tɔnbolo ma.

An dan na piyɔniyew y’a daminɛ ka hawusakan degi. Mɔgɔ caaman y’an lamɛn tuma min na an ye kibaro diiman fɔ u ye u ka kaan na. Diinan min tun ye fanga sɔrɔ Kano dugu la, an ka waajuli baara tun man di o diinandenw ye. O kama, an tun ka ɲi ka kɔrɔsili kɛ kosɔbɛ. Loon dɔ, cɛɛ dɔ ye ne ni n’ ka waajulikɛɲɔgɔn gwɛn ni muru ye. Nka komi an tun be se boli la ka tɛmɛ a kan, a ma se k’an minɛ. O kɛra kunnadiya ye yɛrɛ le! O faratiw bɛɛ n’a ta, an tun be “lafiya la” Jehova sababu la ani dɔ y’a daminɛ ka fara weleweledalaw hakɛ kan (Zab. 4:9). Bi, weleweledala 500 ni kɔ lo be yen kafo 11 kɔnɔ, Kano dugu la.

U TUN B’AN KƐLƐ NIZƐRI

N’ ye kalo damanin dɔrɔn lo kɛ Kano dugu la. O kɔ, saan 1968 utikalo la, u ye ne ni dan na piyɔniye fila wɛrɛw ci ka taga Niamey, Nizɛri faamadugu la, Afiriki tileben fan fɛ. Dɔɔni an senin kɔ, an y’a faamu ko duniɲa kɔnɔ, funteni ka jugu jamana minw na, Nizɛri y’u dɔ ye. An y’a ɲini ka deli funteni na ani ka faransɛkan degi, o min be fɔ o yɔrɔ la. O gwɛlɛyaw bɛɛ n’a ta, an y’an jigi la Jehova kan. An y’a daminɛ ka waajuli kɛ Niamey ni weleweledala damanin dɔrɔn ye minw tun be o yɔrɔ la. Wagati kunkurunin kɔnɔ, mɔgɔ minw tun be se kalan na Niamey dugu la, u fanba ye an ka kalankɛ gafe nin sɔrɔ: La vérité qui conduit à la vie éternelle. Mɔgɔw yɛrɛ tun be na an sɛgɛrɛ walisa an k’o gafe di u ma!

An y’a faamu joona ko Jehova Seerew koo man di faamanw ye. Saan 1969 zuwekalo la, an ye ɲɔgɔn lajɛn walisa ka kafokulu lajɛnba fɔlɔ kɛ o jamana na ani mɔgɔ 20 ɲɔgɔn lo nana. Mɔgɔ fila tun ka ɲi ka batize o lajɛnba la ani an tun kɔrɔtɔnin lo k’o ye. Nka lajɛnba tile fɔlɔ, polisiw nana ko an k’a lalɔ. U ye dan na piyɔniyew ni kafokulu kɔrɔsibaga minɛ ka taga n’u ye polisiso. U y’an ɲininga koo dɔw la ani o kɔ, u ko an ka segi ka na o loon dugusagwɛ. An y’a faamu ko koow tɛna nɔgɔya an ma. O kama, an ye labɛn kɛ walisa batɛmu kalan ka kɛ dɔ ka soo ani o kɔ, an dogora ka batɛmu ɲinilaw batize kɔji dɔ la.

Lɔgɔkun damanin o kɔ, jamana kɔnɔkow minisiri ko ne ni dan na piyɔniye 5 tɔɔw ka bɔ Nizɛri. U ye tile fila di an ma walisa an ka jamana bila ani an yɛrɛ lo tun ka ɲi k’an ka transpɔri sara. An y’o lo kɛ. An sinna ka taga Nizeriya ka tɔnbolo la ani u y’an ci ka taga yɔrɔ wɛrɛw la.

U ye ne ci ka taga Nizeriya dugu dennin dɔ la, min be weele ko Orisunbare. Balimaw jɛnkulu dennin dɔ tun be o yɔrɔ la ani n’ ye ninsɔndiya sɔrɔ ka waajuli ni bibulukalanw kɛ n’u ye. Kalo wɔɔrɔ o kɔ, tɔnbolo ko n’ ka segi ka taga Nizɛri n’ kelen. A daminɛ na, o barila n’ na ani n’ tun sirannin lo. Nka o kɔ, n’ tun kɔrɔtɔnin lo ka Nizɛri balimaw ye tugun!

N’ kɔsegira Niamey dugu la. N’ senin dugusagwɛ, Nizeriya jagokɛla dɔ ye n’ ye ani a y’a lɔn ko n’ ye Jehova Seere ye. A y’a daminɛ ka ɲiningaliw kɛ Bibulu koo la. N’ ye bibulukalan daminɛ n’a ye. O kɔ, a ye sigarɛtimin ni dɔrɔmin kojugu dabila ani ka batize. A diyara n’ ye ka waajuli kɛ ni balimaw ye Nizɛri faan caaman na ani k’a ye ko mɔgɔw be sɔnna tiɲɛn diinan ma saanw tɛmɛtɔ. N’ sera Nizɛri siɲɛ fɔlɔ min na, Jehova Seere 31 lo tun b’o yɔrɔ la ani n’ tun be bɔra yen tuma min na, u hakɛ tun sera mɔgɔ 69 ma.

“AN TƐ BƐRƐ LƆN WAAJULI BAARA KOO LA LAGINƐ”

Saan 1977 desanburukalo la, n’ kɔsegira Nizeriya walisa ka fɔrɔmasɔn dɔ sɔrɔ. O fɔrɔmasɔn mɛɛnna lɔgɔkun saba ani a laban na, tɔnbolo kɔmite ka kɔrdinatɛri Malcolm Vigo y’a ɲini n’ fɛ n’ ka lɛtɛrɛ dɔ kalan ka bɔ Siraleyɔni ka tɔnbolo la. Balimaw tun be piyɔniye cɛgwana dɔ ɲinina min ka kɛnɛ ani a be angilikan ni faransɛkan fɔ. U tun b’a fɛ a ka kɛ kafokulu kɔrɔsibaga ye Laginɛ. Balimacɛ Vigo ko n’ ye fɔrɔmasɔn min sɔrɔ, o bena n’ dɛmɛ k’o kunkanbaara dafa. A sinsinna a kan ko o tɛna kɛ cii nɔgɔman ye ani a ye n’ ladi ko n’ ka miiri koɲuman ka sɔrɔ ka n’ ka desizɔn ta. N’ sinna k’a jaabi ko: “Komi Jehova lo be n’ cira, n’ bena taga.”

N’ tagara Siraleyɔni ani ne ni tɔnbolo balimaw ye ɲɔgɔn ye. Tɔnbolo ka kɔmite balimacɛ dɔ y’a fɔ n’ ye ko: “An tɛ bɛrɛ lɔn waajuli baara koo la Laginɛ.” Siraleyɔni ka tɔnbolo lo tun be waajuli baara ɲɛminɛna Laginɛ. Nka, a tun tɛ sera ka kumaɲɔgɔnya kɛ ni o yɔrɔ balimaw ye politiki kɛlɛw kosɔn. Tɔnbolo balimaw y’a ɲini siɲɛ caaman k’u ka lasigiden dɔ ci o jamana na, nka u ma se. O kama, u y’a ɲini n’ fɛ ko n’ ka taga Konakri, Laginɛ faamadugu la ka sira deli faamanw fɛ walisa ka to o yɔrɔ la.

N’ senin Konakri, n’ tagara Nizeriya ka anbasadi la walisa ka anbasadɛri ye. N’ y’a fɔ a ye ko n’ b’a fɛ ka waajuli kɛ Laginɛ. A ye n’ lasɔmi ko n’ kana to yen sabu u ka teli ka n’ minɛ ka don kaso la wala ka koo wɛrɛ kɛ n’ na min ka jugu n’o ye. A y’a fɔ n’ ye ko: “Kɔsegi ka taga waajuli kɛ Nizeriya.” N’ y’a jaabi ko: “N’ cɛsirinin lo ka to yan.” O la, a ye lɛtɛrɛ sɛbɛ k’a ci Laginɛ jamana kɔnɔkow minisiri ma walisa a ka n’ dɛmɛ ani a sɔnna.

Dɔɔni o kɔ, n’ kɔsegira Siraleyɔni ka tɔnbolo la ani n’ ye minisiri ka desizɔn fɔ balimaw ye. U ninsɔndiyara kosɔbɛ sabu n’ tun tagara min kama, Jehova y’a kɛ o ɲɛnabɔra. N’ ye sira sɔrɔ ka to Laginɛ!

Saan 1978 ka taga se saan 1989, n’ ye kafokulu kɔrɔsili baara kɛ Laginɛ ni Siraleyɔni ani n’ kɛra kafokulu kɔrɔsibaga kankɔrɔsigi ye Liberiya. A daminɛ na, n’ tun be bana tuma caaman. Tuma dɔw la, o tun be kɛ yɔrɔ minw na, o tun ka jan ni dugukɔnɔna ye. Nka tuma o tuma, balimaw tun b’u seko kɛ ka taga ni n’ ye dɔgɔtɔrɔso.

Wagati dɔ la, sumaya jugu dɔ ye n’ minɛ ani tumuw tun be n’ kɔnɔ. N’ kɛnɛyanin kɔ, n’ y’a mɛn ko balimaw tun be ɲɔgɔn ɲiningara u tun bena n’ suu don yɔrɔ min na! O faratikow bɛɛ n’a ta, n’ ma deli ka miiri abada ka n’ ka cidenya baara dabila. N’ lanin b’a la halibi ko latangali sɔbɛ min ye mɛɛnta ye, o be bɔ Ala lo yɔrɔ, ale min be se k’an kunu ka bɔ saya la.

NE NI N’ MUSO Y’AN JIGI LA JEHOVA KAN

Saan 1988, n’ ye balimamuso dɔ kunbɛn min tɔgɔ ko Dorcas. A majiginin lo kosɔbɛ, piyɔniye lo ani a be Jehova kanu yɛrɛ le! N’ y’a furu ani a farala n’ kan kafokulu kɔrɔsili baara la. Ne ni Dorcas ye baara gwɛlɛn kɛ an ka cidenya baara la, ani a tun labɛnnin lo ka fɛɛn caaman saraka Jehova ye. Tuma dɔw la, an tun be kilomɛtɛrɛ 25 bɛɛ kɛ tagama na ka bɔ kafo dɔ la ka taga kafo wɛrɛ la, n’an ka minanw ye an kun. Ni kafow yɔrɔ tun ka jan ka tɛmɛ o kan, an tun mana bolifɛn o bolifɛn sɔrɔ, an tun b’o ta walisa k’o voyazi kɛ. Pɔtɔpɔtɔ ni dingɛw tun ka ca sira kan.

Dorcas jaa ka gwɛlɛ kosɔbɛ. Tuma dɔw la, an ye kɔɔ minw tigɛ, u tun fanin lo banbaw la. An ka voyazi dɔ mɛɛnna tile duuru ani an tun ka ɲi ka kɔɔ dɔ tigɛ. Nka komi pɔɔnw tun karila, an donna kurun lo kɔnɔ. Dorcas ko a be bɔ kurun kɔnɔ dɔrɔn, a benna yɔrɔ min na jii tun ka dun. An si tun tɛ jii lɔn ani banbaw tun be o kɔɔ kɔnɔ. Kanbele dɔw cunna jii kɔnɔ ani k’a minɛ ka bɔ n’a ye. O kɛra kunnadiya ye yɛrɛ le! Wagati damanin kɔnɔ, an fila bɛɛ ye sikojuguw kɛ o koo la. Nka, an tora an ka cidenya baara la.

Saan 1992 daminɛ na, a barila an na kosɔbɛ k’a lɔn ko Dorcas kɔnɔman lo. Yala an ka kudayi cidenya baara tun bena lalɔ ten wa? An y’a fɔ an yɛrɛ ye k’o deen ye “Jehova ka nilifɛn lo ye!” O kama, an y’a latigɛ k’an denmuso tɔgɔ la Jahgift (o kɔrɔ, Jehova ka nilifɛn). Saan naani Jahgift wolonin kɔ, a dɔgɔcɛ Eric wolola. U fila bɛɛ kɛra Jehova ka nilifɛnw ye. Jahgift ye baara kɛ wagati damanin kɔnɔ Konakri ka bayɛlɛma biro la ani Eric ye kɔrɔsigi ciden ye.

Dorcas tun ye dan na piyɔniye baara dabila ani a kɛra kudayi piyɔniye ye, hali k’a sɔrɔ a tun b’an deenw lamɔna. Jehova ka dɛmɛ barika la, n’ tora dan na piyɔniye baara la. An deenw kɔrɔbayanin kɔ, Dorcas kɛra dan na piyɔniye ye kokura. Sisan, an fila bɛɛ ye misɔndenw ye Konakri.

LATANGALI SƆBƐ TIGI

Jehova tun mana a fɔ n’ ka taga yɔrɔ o yɔrɔ, n’ tun be taga. Ne ni n’ muso y’a ye siɲɛ caaman na ko Jehova y’an latanga ani k’an duga. An y’an jigi la Jehova kan sanni k’an jigi la bololafɛnw kan minkɛ, an y’an yɛrɛ tanga hami ni gwɛlɛya caaman ma. An ka koo caaman sen fɛ, ne ni Dorcas y’a ye ko latangali sɔbɛ Tigi ye “an Kisibaga Ala” Jehova lo ye (1 Til. Kib. 16:35). N’ lanin b’a la ko mɔgɔ o mɔgɔ mana i jigi la Jehova kan, “Masaba i ka Ala bena i mara.”—1 Sam. 25:29.