Dumuni sifa kura dɔ

MƆGƆ nunu be mun lo tɔmɔna duguma ten? A bɔnin be sanbɛrɛ ma. A ka misɛn, a pɛtɛnin lo ani a gwɛnin lo. Nka sanbɛrɛ tɛ, dumunifɛn dɔ lo.

Israɛldenw bɔra Misira a ma kalo kelen bɔ fɔlɔ, u be kongokolon kɔnɔ sisan. Komi sɛnɛfɛn bɛrɛ tɛ falen yen, jama ŋunuŋununa ko: ‘N’an tun sara Jehova bolo Misira, o tun ka fisa! O yɔrɔ la kɔni, an tun be dumuni sifa bɛɛ dumu ka fa.’

O kama Jehova y’a fɔ ko: “Ne bena dumuni jigi aw ye ka bɔ sankolo la i n’a fɔ sanji.” A y’o lo kɛ. O dugusagwɛ, tuma min na Israɛldenw ye o fɛɛn gwɛman bɔnnin ye, u ye ɲɔgɔn ɲininga ko: ‘Nin ye mun lo ye?’

Musa y’a fɔ u ye ko: ‘Jehova be fɛɛn min di aw ma ka kɛ aw ka dumuni ye, o lo.’ Jama y’o weele ko MAANƐ. A tun ka timi i ko lidigɛ.

Musa y’a fɔ jama ye ko: ‘Aw kelen kelen be se ka min dumu, aw k’o lo cɛ.’ U y’a kɛ ten sɔgɔma o sɔgɔma. Ni tile tun gwanna, maanɛ tɔɔ min tun be duguma, o tun be yeelen.

Musa y’a fɔ fana ko: ‘Mɔgɔ si kana maanɛ dɔ mara sini kama.’ Nka dɔw ma mɛnni kɛ. I b’a lɔn fɛɛn min kɛra wa? U tun ye maanɛ min cɛ ka mara, o dugusagwɛ tumuw donna a la fɔɔ k’a kasa bɔ!

Nka Jehova y’a fɔ jama ye ko lɔgɔkun tile wɔɔrɔnan loon, u tun be se ka tile fila ta cɛ. Ani Jehova ko u ka dɔ mara o loon dugusagwɛ kama sabu ale tɛna a to dɔ ka ben tile wolonfilanan loon na. U tun mana maanɛ dɔ mara tile wolonfilanan kama, tumuw tun tɛ don a la ani a kasa tun tɛ bɔ! Nin fana tun ye kabako dɔ ye!

Israɛldenw ye saan minw bɛɛ kɛ kongokolon kɔnɔ, Jehova y’u balo ni maanɛ ye.