Yezu ɲɛnaman lo

I B’A lɔn muso nin ani cɛɛ fila nunu ye mɔgɔ minw ye wa? Muso nin ye Magadala Mariyamu lo ye. Cɛɛ minw be fani gwɛman na, mɛlɛkɛw lo. Mariyamu be filɛri kɛra boon fitinin min kɔnɔ, o ye Yezu suu bilayɔrɔ ye: Kaburu lo. Nka, Yezu suu tɛ yen tugun! Jɔn lo y’a bɔ yen? An k’o lajɛ.

Yezu sanin kɔ, sarakalasebagaw y’a fɔ Pilati ye ko: ‘Ka Yezu to sii la, a tun y’a fɔ ko ale sanin kɔ a bena kunu tile sabanan loon na. O kama i ka cii di ko kaburu daa ka kɔrɔsi. O la, a ka kalandenw kana taga a suu bɔ ani k’a fɔ ko a kununa!’ Pilati y’a fɔ sarakalasebagaw ye ko u ka garadiw bila ka taga kaburu daa kɔrɔsi.

Nka tile sabanan sɔgɔmada joona fɛ, Jehova ka mɛlɛkɛ dɔ barila ka jigi. A ye kabakuru kolonkolon ka bɔ kaburu daa la. Garadiw siranna kosɔbɛ fɔɔ ka kirin. A laban, u sera ka filɛri kɛ kaburu kɔnɔ tuma min na, Yezu suu tun tɛ yen tugun! U dɔw donna dugu kɔnɔ ka taga o koo fɔ sarakalasebagaw ye. I b’a lɔn o sarakalasebaga juguw ye min kɛ wa? U ye wari di garadiw ma walisa u ka ngalon tigɛ ko: ‘K’an to sinɔgɔ la sufɛ, a ka kalandenw nana a suu bɔ ka taga n’a ye.’

O wagati kelen na, Yezu ka kalanden musoman dɔw tagara kaburu daa la. U kabakoyara k’a ye ko kaburu lakolon lo! Mɛlɛkɛ fila dɔw barila k’u yɛrɛ yira u la, u ka faniw tun gwɛnin lo parapara. U y’u ɲininga ko: ‘Mun na aw be Yezu yaala yan? A kununa. A’ ye teliya ka taga o fɔ a ka kalandenw ye.’ Musow y’u seen teliya kosɔbɛ. Nka, cɛɛ dɔ y’u lalɔ sira kan. I b’a lɔn mɔgɔ min lo wa? Yezu lo! A y’a fɔ u ye ko: ‘ A’ ye taga ne kofɔ n ka kalandenw ye.’

Tuma min na musow tagara a fɔ kalandenw ye ko Yezu ɲɛnaman lo ani ko olu y’a ye, kalandenw ma la a la. Piyɛri ni Zan bolila ka taga ko u be o koo sɛgɛsɛgɛ u yɛrɛ ma. U tagara a ye ko kaburu lakolon lo! Piyɛri ni Zan kɔsegira ka Magadala Mariyamu to o yɔrɔ la. O tuma lo la a ye filɛri kɛ kaburu kɔnɔ ani a ye mɛlɛkɛ fila nunu ye.

I b’a lɔn fɛɛn min kɛra Yezu suu la wa? Ala y’a kɛ a tununa. A sara ni farisogo min ye, Ala m’a lakunu n’o fari kelen ye. A ye fari kura di Yezu ma, i ko mɛlɛkɛw ta. Nka, Yezu tun be se ka adamaden cogo ta walisa k’a yira a ka kalandenw na ko ale ɲɛnaman lo. An bena o ye kɔfɛ.