Yezu b’a yɛrɛ yira

PIYƐRI ni Zan bɔnin kɔ Yezu kaburu daa la, Mariyamu kelen tora yen ani a y’a daminɛ ka kasi. O kɔ, a y’a kuun biri ka filɛri kɛ kaburu kɔnɔ (maana tɛmɛnin ka jaa filɛ). A ye mɛlɛkɛ fila ye yen! U y’a ɲininga ko: “Mun na i be kasira?”

Mariyamu ye u jaabi ko: “Dɔw ye ne Matigi suu ta ka bɔ a layɔrɔ la, ne m’a lɔn u y’a bila yɔrɔ min na.” O kɔ, Mariyamu yɛlɛmana k’a kɔɔ filɛ ka cɛɛ dɔ lɔnin ye. O cɛɛ y’a ɲininga ko: “I be jɔn le yɔrɔ ɲinina?”

Mariyamu y’a miiri ko nankɔtigi lo ani ko n’a sɔrɔ ale lo ye Yezu suu ta. O kama, a y’a fɔ ko: “Ni ele lo y’a ta, e k’a bilayɔrɔ fɔ n ye.” A tun be kumana cɛɛ min fɛ, Yezu yɛrɛ tun lo. A tun ye farikolo dɔ ta Mariyamu ma min lɔn. Nka, tuma min na Yezu ye Mariyamu weele a tɔgɔ fɛ, a y’a lɔn ko Yezu lo. A bolila ka taga a fɔ kalandenw ye ko: ‘Ne ye Matigi ye!’

O loon kelen na, ka kalanden fila to Emayusi dugu sira kan, cɛɛ dɔ nana fara u kan. Kalandenw dusu kasinin tun lo kosɔbɛ Yezu faganin kosɔn. Nka k’u to tagama na, o cɛɛ ye Bibulu yɔrɔ caaman ɲɛfɔ u ye ani u ye jagwɛlɛya sɔrɔ. A laban, u lɔra ko u be dumuni kɛ. Dumuni kɛtuma na, kalandenw ɲɛɛw yɛlɛla, u y’a lɔn ko Yezu tun lo nka a tununa ka bɔ u ɲɛɛ kɔrɔ. O yɔrɔnin bɛɛ, u wulila ka kɔsegi Zeruzalɛmu walisa ka taga o koo lakali cidenw ye.

O wagati kelen na, Yezu y’a yɛrɛ yira Piyɛri fana na. Kalanden tɔɔw y’o kibaro mɛn minkɛ, u ɲagalila. Kalanden fila nunu tagara Zeruzalɛmu k’a lakali cidenw ye cogo min na Yezu y’a yɛrɛ yira olu la fana sira kan. K’u to kuma na, i b’a lɔn kabako min kɛra wa?

Jaa filɛ. Yezu y’a yɛrɛ yira u la boon kɔnɔ hali k’a sɔrɔ daa tun sɔgɔnin lo. O kɛra ninsɔndiyako ni loonba ye kalandenw fɛ dɛ! Tiɲɛn tɛ? Fɔɔ ka na se sisan ma, Yezu y’a yɛrɛ yira a ka kalandenw na siɲɛ joli? I b’o daa lɔn wa? Siɲɛ duuru tɛ wa?

Tuma min na Yezu y’a yɛrɛ yira kalandenw na, ciden Toma tun tɛ yen. O kama kalandenw y’a fɔ a ye ko: ‘An ye Matigi ye!’ Nka Toma ko n’ale yɛrɛ ma Matigi ye a ɲɛɛ na, a tɛ la o la. Tile seegi o kɔ, kalandenw tun lajɛnna tugun soo kɔnɔ, ani daa sɔgɔnin tun lo. O loon na, Toma tun be n’u ye. Yezu barila k’a yɛrɛ yira u la. Sisan Toma lara a la.