Alijana wagati ka surun!

Koo juguman minw be kɛra dugukolo kan bi, u b’a yira ko alijana wagati ka surun. Bibulu tun y ’a fɔ ko an ɲɛɛw tun bena kɛ wagati jugumanbaw la sanni alijana wagati ka se. An be o wagatiw lo la sisan! Bibulu tun y ’a fɔ ko koo minw tun bena kɛ, olu dɔw filɛ nin ye:

Kɛlɛbaw. “Siya na wuli siya kama. Masaya na wuli masaya kama.” (Matiyu 24:7). Nin ciraya kuma dafara. Kabini saan 1914, kɛlɛ misɛn caaman kɛra ka fara duniɲa ka kɛlɛba fila kan. Mɔgɔ miliyɔn caaman sara o seen fɛ.

Banaw, yɔrɔ caaman na. “Yɔrɔ ni yɔrɔ, fiɲɛbanaw” tun bena kɛ yen (Luka 21:11, NW ). Yala o dafara wa? Ɔnhɔn. Kansɛribana, dusukundimi, sɔgɔsɔgɔgwɛ, sumaya, SIDA bana, ani bana wɛrɛw ye mɔgɔ miliyɔn caaman faga.

Domunintanya. Dugukolo kɔ kan, mɔgɔ caaman ka domuni t’u labɔ. Mɔgɔ miliyɔn caaman be sa kɔngɔ bolo saan o saan. Nin fana ye tagamasiyɛn wɛrɛ ye k’a yira ko sooni, alijana bena kɛ yen. Bibulu b’a fɔ ko: “Kɔngɔbaw na kɛ.” —Marka 13:8.

Dugukolo yɛrɛyɛrɛw. “Dugukolo yɛrɛyɛrɛw bena kɛ yɔrɔ ni yɔrɔ.” (Matiyu 24:7, NW ). O fana dafara an ka wagati la. Kabini saan 1914, mɔgɔ miliyɔn kelen ni kɔ sara dugukolo yɛrɛyɛrɛw seen fɛ.

Mɔgɔ juguw. Mɔgɔw tun bena kɛ “nafolo negetɔw ” ani “u yɛrɛw fɛ.” U tun bena kɛ “ɲɛnajɛ fɛ ka tɛmɛ Ala kan.” Denmisɛnw tun bena kɛ “bangebaaw kan bilabaaw” ye (2 Timote 3:1-5). Yala i ma sɔn a la ko o ɲɔgɔnna mɔgɔw ka ca bi wa? U tɛ bonya si la Ala kan, ani minw b’a ɲini ka Ala lɔn, u b’olu ɲɛgwan.

Kojugukɛ. A fana tun bena kɛ ko “sariyabila barika be bonyana ka taa.” (Matiyu 24:12). I be ta’a sɔrɔ i bena sɔn a la ko kojugukɛ juguyara ka tɛmɛ saan tɛmɛnenw ta kan. Yɔrɔ bɛɛ la, sonyali, nanbara, wala makosa be mɔgɔw daa la.

Nin koow bɛɛ b’a yira ko Ala ka Masaya ka surun. Bibulu b’a fɔ ko: “Aw . . . mana o kow kɛtɔ ye, aw k’a dɔn ko Ala ka masaya surunyara.” (Luka 21:31). Ala ka Masaya ye mun ye? O ye Ala ka sankolola gɔfɛrɛnaman ye min bena alijana lase nin dugukolo nin ma. Ala ka Masaya bena sigi hadamadenw ka gɔfɛrɛnamanw nɔɔ na.—Daniɛl 2:44.