Tuma juman ani mun na i ka kan k’i kuun datugu?

Tuma juman ani mun na kerecɛnmuso ka kan k’a kuun datugu n’a be batoli koo dɔw kɛra? An k’a filɛ hakili senu ye ciden Pol lasun ka min sɛbɛ o koo la. A ye ladili dɔw di minw be se k’an dɛmɛ ka koow latigɛ ka ɲɛ ani ka bonya la Ala kan (1 Korɛntikaw 11:3-16). Pol ye koo saba yira an ka kan k’an janto minw na: 1) koo minw sen fɛ muso ka kan k’a kuun datugu, 2) yɔrɔ minw na a b’o kɛ, ani 3) kuun min kama.

Koo jumanw na? Pol be koo sifa fila kofɔ: delili ani kiraya kuma (Vɛrise 4, 5). Delili ye kuma ye an be min fɔ Jehova ye walisa k’a bato. Bi, n’a fɔra ko kiraya kuma, o ye kalan ye kerecɛn be min kɛ k’a basigi Bibulu kan. Nka, yala Pol ka kumaw kɔrɔ ko muso ka kan k’a kuun datugu tuma o tuma n’a be delili kɛra wala n’a be mɔgɔw kalanna Bibulu ka tiɲɛn kuma na wa? Ayi. Muso be delili kɛra wala a be mɔgɔ kalanna yɔrɔ min na, o lo b’a yira n’a ka kan k’a kuun datugu.

Yɔrɔ jumanw na? Pol ka kumaw b’a yira ko a kaan be yɔrɔ fila lo ma: denbaya kɔnɔ, ani kafo kɔnɔ. A y’a fɔ ko: “Muso fana kuntigi y’a cɛɛ ye . . . Muso o muso be Ala daali, walima n’a be kiraya kɛra, n’a ma fani biri a kuun na, o muso nin b’a kuntigi le dɔgɔya.” (Vɛrise 3, 5). Denbaya kɔnɔ, Jehova ye cɛɛ lo kɛ muso kuntigi ye. Muso ka kan ka sɔn a cɛɛ ka kuntigiya ma n’o tɛ a bena a cɛɛ dɔgɔya n’a be kunkanbaara dɔw dafa Jehova ye minw kalifa a cɛɛ ma. Ɲɛyirali fɛ, n’a ka kan ka bibulukalan kɛ ni mɔgɔ dɔ ye ani a cɛɛ be yen, a b’a yira ko a b’a cɛɛ ka kuntigiya bonya a kɛtɔ k’a kuun datugu. A ka kan k’a kuun datugu hali n’a cɛɛ ma batize, sabu a cɛɛ lo ye denbaya kuntigi ye.a A ka kan k’a kuun datugu fana n’a be delili kɛra wala n’a be mɔgɔ dɔ kalanna a dencɛ fitinin dɔ ɲɛɛ na min batizera. A ma kɛ ko a dencɛ lo ye denbaya kuntigi ye, nka kerecɛnya kafo kɔnɔ, kuntigiya dira cɛɛ batizeninw lo ma.

Pol ka kuma nunu b’a yira ko a kaan be kafo ma fana: “Ni mɔgɔ dɔ b’a fɛ ka sɔsɔli kɛ, o k’a dɔn ko laada wɛrɛ tɛ an fɛ o ko la, a tɛ Ala ka egilisiw fana fɛ.” (Vɛrise 16, ABM ). Kerecɛnya kafo kɔnɔ, kuntigiya dira cɛɛ batizeninw lo ma (1 Timote 2:11-14; Eburuw 13:17). Cɛɛw dɔrɔn lo be kɛ diinan mɔgɔkɔrɔw ni kɔrɔsigi cidenw ye ani cii dira olu lo ma ka Ala ka sagakulu mara (Kɛwaliw 20:28). Nka tuma kelen kelen na, koo dɔw be se k’a to u b’a ɲini kerecɛnmuso fɛ a ka baara dɔ kɛ. Koow sira fɛ, o baara ka kan ka kalifa cɛɛ batizenin dɔ lo ma min be saratiw dafa. Ɲɛyirali fɛ, a be se ka kɛ ko a ka kan ka waajulibaara lajɛn ɲɛminɛ sabu cɛɛ batizenin si tɛ yen min b’o baara saratiw dafa. A be se ka kɛ fana ko a tun ye labɛn kɛ ka bibulukalan kɛ ni mɔgɔ dɔ ye, ani cɛɛ batizenin dɔ be n’a ye. Komi o ɲɔgɔnna baaraw ye kafo ka baara dɔw lo ye, a ka kan k’a kuun datugu walisa k’a yira ko koow sira fɛ, cɛɛw lo tun ka kan k’o baara kɛ.

Faan wɛrɛ fɛ, batoliko caaman na, waajibi tɛ balimamuso k’a kuun datugu. Ɲɛyirali fɛ, waajibi tɛ a k’a kuun datugu n’a be lakalitaw kɛra kafo ka lajɛnw na, n’a be waajuli kɛra soo ni soo n’a cɛɛ wala cɛɛ batizenin wɛrɛ ye, n’a be kalan wala delili kɛra n’a deenw ye minw ma batize fɔlɔ. Balimamuso be se k’a yɛrɛ sɔrɔ cogoya wɛrɛ la. N’a m’a lɔn a ka kan ka min kɛ, a be se ka sɛgɛsɛgɛri kɛ o koo la.b N’a bele m’a lɔn a ka ɲi ka min kɛ, ani n’a dusukun b’a lasun k’a kuun datugu, n’a y’o kɛ, o tɛ basi ye i ko a yirala jaa nin kan cogo min na.

Kuun min kama a b’o kɛ. Vɛrise 10nan (ABM ) b’a yira kuun fila minw kama kerecɛnmuso ka kan k’a kuun datugu. An b’a kalan ko: “O de y’a to [kuntigiya] taamashyɛn ka sɔrɔ muso kun na mɛlɛkɛw kosɔn.” Fɔlɔ, i k’a kɔrɔsi a fɔra ko ‘kuntigiya taamashyɛn.’ Muso kɛtɔ k’a kuun datugu, a b’a yira ko Jehova ye kuntigiya min di cɛɛ batizeninw ma kafo kɔnɔ, ale sɔnna o ma. O la, a b’a yira Jehova Ala la ko a b’a kanu ani ko a be kantigiya kɛ a ye. Kuun filanan be sɔrɔ kuma nunu na: “Mɛlɛkɛw kosɔn.” Muso mana a kuun datugu, o be mun lo kɛ o mɛlɛkɛ barikamanw na?

A ka di mɛlɛkɛw ye k’a kɔrɔsi cogo min na bonya be la Jehova ka kuntigiya kan a ka ɔriganisasiyɔn kɔnɔ, sankolo la wala dugukolo kan. Adamaden dafabaliw be ɲɛyirali min di o koo la, o b’u nafa fana. Ka fara o bɛɛ kan, olu fana ka kan ka Jehova ka labɛnw labato. O ye kɔrɔbɔli ye u fɛ, o min na u dɔw ma kantigiya kɛ galen (Zude 6). Bi, mɛlɛkɛw be se k’a kɔrɔsi koo dɔw la ko kerecɛnmuso dɔ be koo lɔn, a kalannin lo ani a ka cegu ka tɛmɛ cɛɛ batizenin dɔ kan kafo kɔnɔ. O bɛɛ n’a ta, a be sɔn ka kolo o cɛɛ ka kuntigiya ye. Tuma dɔw la, o balimamuso yɛrɛ ye kerecɛn mɔlen ye min bena kɛ Krista cɛntaɲɔgɔn ye. O muso bena lɔyɔrɔ dɔ sɔrɔ, min yɛrɛ ka bon ni mɛlɛkɛw ta ye ani ka kuntigiya kɛ ni Krista ye sankolo la. O muso ka kololi kɛcogo ye ɲɛyirali ɲuman ye mɛlɛkɛw be min kɔrɔsira bi! Tiɲɛn na, nɛɛma dira balimamusow bɛɛ ma k’a yira u ka kantigiya n’u ka kololi fɛ k’u b’u yɛrɛ majigi ka kanminɛli kɛ mɛlɛkɛ kantigiman miliyɔn caaman ɲɛɛ na!