Aw Ka Ɲiningaliw Jaabiliw

◼ Ni balimamuso dɔ be bibulukalan kɛra soda la ani balimacɛ dɔ be n’a ye, yala a ka kan k’a kuun datugu wa?

Ni balimamuso dɔ be bibulukalan kɛra min basiginin lo ka ban ani weleweledala cɛman dɔ be yen, balimamuso ka kan k’a kuun datugu (1 Kor. 11:3-10). Saan 2002, zuwe tile 15nan ka La Tour de Garde ɲɛɛ 27 b’a ɲɛfɔ ko: “Nin ye labɛn ye min kɔnna ka kɛ kalan kama. Mɔgɔ min b’o kalan kɛra, ale lo ye ɲɛminɛbaga ye. O la, a be jati k’o bibulukalan ye kafo ka labɛn dɔ lo ye. Ni balimamuso dɔ lo b’o kalan kɛra ani weleweledala batisenin dɔ be yen min ye cɛɛ ye, balimamuso ka ɲi k’a kuun datugu.” A ka kan k’a kuun datugu hali n’o kalan be kɛra boon kɔnɔ, soda la wala yɔrɔ wɛrɛ la.

Nka, o bibulukalan min be kɛ soda la, n’a ma basigi fɔlɔ do? Waajibi tɛ balimamuso k’a kuun datugu hali ni weleweledala cɛman dɔ be yen ani o viziti kura kuun ye ka bibulukalan kɛcogo ɲɛyira wala ka kalankɛ gafe dɔ kɔnɔkow lajɛ. Bibulukalan minw be kɛ soda la, an k’a lɔn ko u tɛ basigi siɲɛ kelen dɔrɔn. Viziti kura damanin lo be kɛ fɔlɔ fɔɔ ka taga kɛ bibulukalan ye. Ka fara o kan, koo bɛɛ n’a cogoya lo. O kama, weleweledalaw ka ɲi ka hakili sɔrɔ n’u b’a fɛ k’a latigɛ ni balimamuso ka kan k’a kuun datugu.