Tɔɔrɔ bena ban loon dɔ wa?

BIBULU B’A FƆ KO:

“Ala . . . bena u ɲaji bɛɛ cɛ. Saya kɔni, o te yen tugu. Mɔgɔ tena sa, mɔgɔ tena kasi, mɔgɔ tena tɔɔrɔ tugu.” —Yirali 21:3, 4, Ala ka kuma, ABBF.

I BE SE KA NAFA MIN SƆRƆ O LA:

O b’an jigi sigi ko Ala tɛ gwɛlɛyaw lase an ma.—Zaki 1:13.

O b’an dusu saalo sabu n’an be tɔɔrɔla, an b’a lɔn ko Ala b’an faamu.—Zakari 2:8.

O be jigiya di an ma ko tɔɔrɔkow bɛɛ bena ban.—Zaburuw 37:9-11.

BIBULU BE MIN FƆ, AN BE SE KA LA O LA SƆBƐ LA WA?

An be se ka la o la kuun fila ɲɔgɔn kama:

• Tɔɔrɔ ni tilenbaliyakow ka gwo Ala ye. Galen, mɔgɔw ye Ala sagokɛlaw niin tɔɔrɔ. An k’a filɛ o koo ye min kɛ Jehova Ala la. Bibulu b’a fɔ ko Jehova dusu kasira a ka mɔgɔw kosɔn sabu u juguw “tun b’u sigɛnna.”—Kiritigɛlaw [Cɛfariw] 2:18.

  Minw b’u mɔgɔɲɔgɔnw niin tɔɔrɔ, olu koo ka gwo Ala ye. Ɲɛyirali fɛ, Bibulu b’a fɔ ko minw be ‘mɔgɔ jalakibali faga,’ Ala b’olu kɔniya.—Talenw 6:16, 17.

• Ala b’a janto an kelen kelen bɛɛ la. Adamaden kelen kelen bɛɛ b’a ka “tɔɔrɔ n’a ka sigɛn faamu.” Jehova fana b’o faamu!—2 Tilew Kibaru 6:29, 30.

  A ka Masaya sababu fɛ, Jehova bena bɛɛ ka tɔɔrɔ ban yanni dɔɔni (Matiyo 6:9, 10). Nka sanni o wagati ka se, minw be Ala yɔrɔ ɲini sɔbɛ la, a b’olu dusu saalo.—Kɛwaliw 17:27; 2 Korɛntikaw 1:3, 4.