Ala ka Masaya ye mun lo ye?

BIBULU B’A FƆ KO:

“Sankolotigi Ala ben’a kɛ masacɛ wɛrɛ be wili min ka masaya tena nagasi abada.”—Daniyɛli 2:44, Ala ka kuma, ABBF.

“Dencɛ dira an ma. Masaya dir’a ma.” —Ezayi 9:5.

I BE SE KA NAFA MIN SƆRƆ O LA:

• Gofɛrɛnɛman tilennin dɔ lo, min be se ka ele yɛrɛ nafa.—Ezayi 48:17, 18.

• Kɛnɛya dafanin ani hɛɛrɛ duniɲa kura nata kɔnɔ.—Yirali 21:3, 4.

BIBULU BE MIN FƆ, AN BE SE KA LA O LA SƆBƐ LA WA?

An be se ka la o la kuun fila ɲɔgɔn kama:

• Yezu y’a yira Ala ka Masaya bena min kɛ. A y’a ka kalandenw degi ko u ka delili kɛ ko Ala ka Masaya ka na ani Ala sago ka kɛ dugukolo kan (Matiyo 6:9, 10). Yezu ye koo dɔw kɛ k’a yira o bena kɛ cogo min na.

  Ka Yezu to dugukolo kan, a ye kɔngɔtɔw balo, ka banabagatɔw kɛnɛya ani ka suuw lakunu yɛrɛ! (Matiyo 15:29-38; Zan 11:38-44). O cogo la, a y’a yira ka ɲɛ Ala ka Masaya bena min kɛ Ala sagokɛlaw ye. Yezu lo tun bena kɛ Ala ka Masaya kuntigi ye.—Yirali 11:15.

• Duniɲa ka koow cogoya b’a yira ka gwɛ ko Ala ka Masaya bena na yanni dɔɔni. Yezu tun kɔnna k’a fɔ ko sanni Ala ka Masaya ka na ni hɛɛrɛ ye dugukolo kan, marifakɛlɛw, kɔngɔbaw ani dugukoloyɛrɛyɛrɛw tun bena mɔgɔw tɔɔrɔ duniɲa kɔnɔ.—Matiyo 24:3, 7.

  An ɲɛɛ be o koow la bi. O kama, an lanin b’a la ko yanni dɔɔni, Ala ka Masaya bena o gwɛlɛyaw bɛɛ ban.