Dawuda ma siran

Ni siranya ye i minɛ, i be mun lo kɛ do?— N’a sɔrɔ i be boli ka taga dɛmɛ ɲini maman wala papa fɛ. Nka mɔgɔ wɛrɛ fana be se k’i dɛmɛ. Ale fanga ka bon ni bɛɛ ta ye. I b’o tigi lɔn wa?— Tiɲɛn lo, Jehova Ala lo. An ka kanbelenin dɔ ka maana lajɛ Bibulu kɔnɔ, a tɔgɔ ko Dawuda. Dawuda tun b’a lɔn ko Jehova bena ale dɛmɛ tuma bɛɛ. O kama a tun tɛ siran.

Kabi Dawuda denɲɛnin tuma na, a wolobagaw y’a kalan, a ye Jehova kanu. O ye Dawuda dɛmɛ a ma siran hali ni koo gwɛlɛ dɔw y’a sɔrɔ. A tun b’a lɔn ko Jehova ye ale teri ye ani ko a bena ale dɛmɛ. Loon dɔ, ka Dawuda to sagaw dɛndɛnin na, jara belebeleba dɔ bɔra k’a daa waga ani ka sagaden dɔ minɛ! I b’a lɔn Dawuda ye min kɛ wa? A y’o jara gwɛn k’a faga. A be komi a y’a faga n’a bolow dama lo ye! O kɔ, urusi wara bɔra a ka sagaw kama. Dawuda ye ale fana faga! E ka miiri la, jɔn lo ye Dawuda dɛmɛ do?— Ɔnhɔn, Jehova lo.

Loon wɛrɛ la, Dawuda y’a yira ko a jaa ka gwɛlɛ kosɔbɛ. Israɛldenw tun be kɛlɛ kɛra ni mɔgɔ dɔw ye minw be weele ko Filisitikaw. Filisitikaw ka sɔrɔdasi dɔ tun ye cɛɛ jamanjanba ye. A tɔgɔ tun ko Goliyati. O cɛɛ jamanjanba tun be Israɛl ka sɔrɔdasiw ni Jehova lɔgɔbɔra. Goliyati ye Israɛl ka sɔrɔdasiw darabɔ ko n’u jaa ka gwɛlɛ, u ka na ale kɛlɛ. Nka Israɛlden si tun tɛ sɔn ka bɔ k’a kɛlɛ sabu u tun be siran kojugu. Dawuda y’o mɛn minkɛ, a y’a fɔ Goliyati ye ko: ‘Ne bena i kɛlɛ! Jehova bena ne dɛmɛ, ani ne bena se i kɔrɔ!’ E ka miiri la, Dawuda jaa tun ka gwɛlɛ wa?— Ɔnhɔn, a jaa tun ka gwɛlɛ kosɔbɛ. I b’a fɛ k’a lɔn a ye min kɛ wa?

Dawuda ye a ka bɛrɛbonnan ni bɛrɛ ɲuman duuru ta ani a tagara o cɛɛ jamanjanba kama. Goliyati ye kanbele Dawuda ye minkɛ, a tora k’a lɔgɔbɔ. Nka Dawuda y’a fɔ a ye ko: ‘I be na ne kama ni murujan ye, nka ne be taga i kama Jehova tɔgɔ la!’ O kɔ, a ye bɛrɛ kelen don a ka bɛrɛbonnan kɔnɔ ka boli ka taga Goliyati fan fɛ. A y’a bon ani bɛrɛ sinna ka taga a teen sɔgɔ! Goliyati bɔra ka ben ka sa! Filisitikaw siranna fɔɔ u bɛɛ bolila ka tunu. Dawuda ɲɔgɔn kɛra cogo di ka se cɛɛ jamanjanba nin kɔrɔ?— Jehova lo y’a dɛmɛ. Jehova fanga ka bon n’o cɛɛ jamanjanba ta ye fɔɔ ka taga ka na!

Dawuda ka koo b’i dɛmɛ ka mun lo faamu?— Jehova fanga ka bon ni bɛɛ ta ye. Jehova do ye i teri ye. Siɲɛ wɛrɛ, ni siranya ye i minɛ, kana ɲinɛ ko Jehova be se k’i dɛmɛ ka jagwɛlɛya sɔrɔ!