Dawuda ni Goliyati

Jehova y’a fɔ Samuyɛli ye ko: ‘Taga Zese ka soo. A dencɛ dɔ lo bena kɛ Israɛl masacɛ nata ye.’ Samuyɛli tagara Zese ka soo. A y’a dencɛ fɔlɔ ye tuma min na, a y’a miiri ko: ‘A ka ɲi ka kɛ kanbele nin lo ye.’ Nka Jehova y’a fɔ Samuyɛli ye ko ale tɛ. Jehova ko: ‘Ne be mɔgɔ dusukun le filɛ, ne t’a filɛ a ɲɛda n’a janya dama ma.’

Zese nana n’a dencɛ wɔɔrɔ wɛrɛw ye. Nka Samuyɛli ko: ‘Jehova ma nunu si sugandi. Dencɛ wɛrɛw b’i fɛ wa?’ Zese ko: ‘Dɔ wɛrɛ be yen, ne dencɛ laban, a tɔgɔ ko Dawuda. A be n’ ka sagaw dɛndɛna.’ Dawuda kɔsegira soo tuma min na, Jehova y’a fɔ Samuyɛli ye ko: ‘Nin lo!’ Samuyɛli ye tulu bɔn Dawuda kuun na, k’a mɔ walisa a ka kɛ Israɛl masacɛ ye.

Kɔfɛ, Israɛldenw tun be kɛlɛ la ni Filisitikaw ye. O Filisitikaw ka kɛlɛden dɔ tun ka jan, a tɔgɔ ko Goliyati. Loon o loon, Goliyati tun be Israɛldenw lɔgɔbɔ. A tun be pɛrɛn ko: ‘Aw ye mɔgɔ dɔ bila ka na kɛlɛ kɛ ni ne ye. N’o tigi sera ne kɔrɔ, an bena kɛ aw ka jɔɔnw ye. Nka ni ne sera a kɔrɔ, aw lo bena kɛ an ka jɔɔnw ye.’

Dawuda kɔrɔcɛw tun ye sɔrɔdasiw ye. A nana dumuni di u ma kɛlɛkɛ yɔrɔ la. A ye Goliyati ka kumaw mɛn ani a ko: ‘Ne bena taga a kɛlɛ!’ Masacɛ Sayuli y’a fɔ a ye ko: ‘I ka dɔgɔ kojugu.’ Dawuda y’a jaabi ko: ‘Jehova bena ne dɛmɛ.’

Sayuli ko Dawuda k’ale ka kɛlɛkɛminanw ta. Nka, Dawuda ko: ‘Ne tɛ se k’o minanw don ka kɛlɛ kɛ.’ Dawuda y’a ka bɛrɛbonnan ta ka taga kɔda la. A ye bɛrɛ ɲuman duuru tɔmɔ ka don a ka foroko kɔnɔ. O kɔ, a bolila ka taga Goliyati fan fɛ. O cɛɛ jamanjanba pɛrɛnna ko: ‘Ele deen nin, na yan. Ne bena i kɛ sanfɛ kɔnɔw ni kongo sogow ka dumuni ye.’ Dawuda ma siran. Ale fana pɛrɛnna ko: ‘I be na ne kama ni murujan ni taman ye. Nka ne be na i kama Jehova tɔgɔ la. I tɛ anw lo kɛlɛla dɛ, i be Ala lo kɛlɛla. Mɔgɔ minw be yan, u bɛɛ bena a ye ko Jehova fanga tɛmɛna murujan ni taman kan. A bena aw bɛɛ don an bolo.’

Dawuda ye bɛrɛ don a ka bɛrɛbonnan kɔnɔ ani a ye Goliyati bon n’a fanga bɛɛ ye. Jehova ka dɛmɛ sababu la, bɛrɛ sinna ka taga Goliyati teen sɔgɔ ka don. O cɛɛ jamanjanba benna ka sa. Filisitikaw bolila walisa k’u niin kisi. Yala i jigi be Jehova kan i ko Dawuda y’a kɛ cogo min na wa?