Timote tun b’a fɛ ka mɔgɔw dɛmɛ

Timote tun ye kanbele ye ani a tun ka di a ye ka mɔgɔw dɛmɛ. A tagara dugu caaman na walisa ka mɔgɔw dɛmɛ. O lo kama, a ye ninsɔndiyaba sɔrɔ a ka ɲɛnamaya la. I b’a fɛ ka Timote ka koo faamu wa?—

Timote bonyana Lisitire dugu la. A tun ka dɔgɔ tuma min na, a mamamuso Loyisi n’a bamuso Unisi y’a daminɛ k’a kalan Jehova koo la. Timote bonyatɔ, a tun b’a fɛ ka mɔgɔw dɛmɛ u ka Jehova lɔn.

Timote tun ye kanbele ye tuma min na, Pol y’a fɔ a ye ko u ka taga ɲɔgɔn fɛ dugu dɔw la ka waajuli kɛ. Timote sɔnna. A tun labilanin lo ka taga mɔgɔw dɛmɛ.

Timote tagara ni Pol ye Tesaloniki dugu la, Masedwanɛ mara la. U ye tagamajan kɛ ani u donna kurun kɔnɔ ka sɔrɔ ka se o yɔrɔ la. U senin o dugu la, u ye mɔgɔ caaman dɛmɛ ka Jehova lɔn. Nka mɔgɔ dɔw dimina u kɔrɔ ani u y’a ɲini ka koo jugu kɛ Pol ni Timote la. O lo kama, Pol ni Timote bɔra o dugu la ka taga waajuli kɛ yɔrɔ wɛrɛw la.

Kalo damanin o kɔ, Pol y’a ɲini Timote fɛ ko a ka kɔsegi Tesaloniki walisa k’a filɛ balimaw be cogo min na. Timote tun ka kan k’a jaa gwɛlɛya kosɔbɛ walisa ka kɔsegi o dugu jugu nin na! Nka Timote tagara sabu a tun be hami o yɔrɔ balimaw koo la. A kɔsegira ka na Pol fɛ ni kibaro diimanw ye k’a fɔ ko Tesaloniki balimaw cogo ka ɲi.

Timote ye baara kɛ ni Pol ye saan caaman na. Pol ka sɛbɛri dɔ kɔnɔ, a y’a fɔ ko mɔgɔ wɛrɛ tɛ yen i ko Timote a be se ka min ci ka taga kafow dɛmɛ. Timote tun be Jehova kanu ani a tun be mɔgɔw kanu fana.

Yala i be mɔgɔw kanu ani i b’a fɛ k’u dɛmɛ ka Jehova lɔn wa?— N’i y’o kɛ, i bena hɛɛrɛ ni ninsɔndiya sɔrɔ i ka ɲɛnamaya la i ko Timote y’a sɔrɔ cogo min na!