Pol ni Timote

Timote tun ye kanbele dɔ ye Lisitire dugu kafo kɔnɔ. A facɛ tun ye Grɛki ye ani a bamuso tun ye Yahutu ye. Timote bamuso Unisi n’a mamamuso Loyisi y’a kalan Jehova koo la kabi a denmisɛn tuma.

Tuma min na Pol tagara waajuli kɛ Lisitire a ka voyazi filanan na, a y’a kɔrɔsi ko Timote be balimaw kanu kosɔbɛ ani a labilanin lo k’u dɛmɛ tuma bɛɛ. Pol y’a ɲini Timote fɛ a ka fara ale kan ka taga waajuli kɛ dugu dɔw la. Dɔɔni dɔɔni, Pol y’a dɛmɛ ka kɛ waajulikɛla ɲuman ye ani ka mɔgɔw kalan kibaro diiman koo la koɲuman.

Pol ni Timote tun mana taga yɔrɔ o yɔrɔ, hakili senu tun b’u ɲɛminɛ. Loon dɔ sufɛ, yelifɛn kɔnɔ, cɛɛ dɔ y’a fɔ Pol ye ko a ka na Masedwanɛ walisa k’u dɛmɛ. O kama, Pol, Timote, Silasi ani Luka tagara yen walisa ka waajuli kɛ ani ka kafow juu sigi.

K’u to Tesaloniki, Masedwanɛ dugu la, cɛɛw ni muso caaman kɛra kerecɛnw ye. Nka, Pol n’a tagamaɲɔgɔnw ɲangoya tun be Yahutu dɔw la. O Yahutuw ye jama lajɛn ani u ye balimaw sama ka taga n’u ye dugu ɲɛmɔgɔw fɛ. U tun b’a fɔra ni kaanba ye ko: ‘Cɛɛ nunu ye Ɔrɔmu gofɛrɛnɛman ka juguw ye!’ Pol ni Timote niin tun be farati la. O kama, u bolila ka taga Bere sufɛ.

A tun ka di Berekaw ye ka kibaro diiman mɛn. Grɛkiw ni Yahutu caaman kɛra kerecɛnw ye. Nka, Yahutu dɔw bɔra Tesaloniki ka na ani u ye dugu bɛɛ ɲagami. O kama, Pol tagara Atɛni. Timote ni Silasi tora Bere walisa ka balimaw jija. Dɔɔni o kɔ, Pol ye Timote ci ka taga Tesaloniki tugun walisa ka balimaw dɛmɛ k’o kɔrɔbɔliba muɲu. Kɔfɛ, Pol ye Timote ci ka taga bɔ kafo caaman wɛrɛ ye walisa k’u jija.

Pol y’a fɔ Timote ye ko: ‘Minw b’a fɛ ka baara kɛ Jehova ye, olu bena kɔrɔbɔli sɔrɔ.’ Mɔgɔw ye Timote tɔɔrɔ ani k’a don kaso la a ka limaniya kosɔn. A ninsɔn diyara ka se k’a yira Jehova la ko a ye kantigi ye.

Pol y’a fɔ Filipikaw ye ko: ‘ N’ be Timote ci aw fɛ. A bena a yira aw la a kɔrɔ ye min ye ka tiɲɛn sira tagama ani a bena waajuli kɛcogo yira aw la.’ Pol tun b’a lɔn ko a be se k’a jigi la Timote kan. U tun ye teriw ye ani u ye baara kɛ ɲɔgɔn fɛ saan caaman kɔnɔ.