A’ ye kantigiya kɛ ɲɔgɔn ye

Jehova b’a ɲini an fɛ an ka kɛ “kantigi ye.” (Zaburuw 18:26, ABM). A kɔrɔtanin lo kosɔbɛ i ka kɛ kantigi ye furu kɔnɔ sabu lanaya tɛ se ka kɛ kantigiya kɔ. Kanuya do tɛ se ka barika sɔrɔ ni lanaya tɛ yen.

Bi, koo caaman be furuɲɔgɔnw ka kantigiya nagasi. Walisa k’i ka furu tanga, fɔɔ i ka banba ka koo fila kɛ.

1 A TO I KA FURU KA KƐ I ƝƐNAKO FƆLƆ YE

BIBULU BE MIN FƆ: “Aw kana kɛ nalomanw ye, nga hakilitigiw.” (Efɛzikaw 5:15, 16). I ka hakili sɔrɔ k’a faamu ko koo minw kɔrɔtanin lo ka tɛmɛ tɔɔw kan, i ka furu ye u la dɔ ye. A to a ka kɛ i ɲɛnako fɔlɔ ye.

I furuɲɔgɔn mako be min na, Jehova b’a fɛ i k’i hakili sigi o kan. A b’a fɛ fana aw ka “nisɔn diya” ɲɔgɔn fɛ (Waajulikɛla 9:9). A y’a fɔ ka gwɛ ko i man kan abada k’i mako bɔ i furuɲɔgɔn na. Nka, aw fila ka kan ka cogoyaw ɲini walisa ka ɲɔgɔn ladiya (1 Korɛntikaw 10:24). A to i furuɲɔgɔn k’a ye ko nafa be ale la ani ko a koo ka di i ye.

I BE SE KA MIN KƐ:

• I janto k’i ka wagati kɛ n’i furuɲɔgɔn ye tuma o tuma, ani kana ɲɛbɔ mɔgɔ wɛrɛ fɛ

• N’i be miiri, i ka to ka miiri ko “an” sanni ka miiri ko “ne”

2 I DUSUKUN KƆRƆSI

BIBULU BE MIN FƆ: “Mɔgɔ o mɔgɔ ye muso filɛ k’a ɲaa bɔ a fɛ, o tigi ye kakalaya kɛ a dusu la n’o muso ye ka ban.” (Matiyo 5:28). Ni mɔgɔ dɔ tora ka miiri kakalayakow la, a be se ka fɔ ko a tigi b’a furuɲɔgɔn janfara le.

Jehova ko i ka kan k’i “dusukun kɔlɔsi.” (Talenw 4:23; Zeremi 17:9, ABM). Walisa ka se k’o kɛ, fɔɔ i k’i ɲɛɛw kɔrɔsi (Matiyo 5:29, 30). I ka cɛmɔgɔba Zɔbu ladegi. Ale ye layidu ta a ɲɛɛw ye, ko a tɛna ɲɛbɔ muso wɛrɛ fɛ abada (Zɔbu 31:1). I ka lɔ kelen kan ko i tɛna porno filɛ ka ye abada. I jija fana, i kana jarabi fewu mɔgɔ wɛrɛ la n’i furuɲɔgɔn tɛ.

I BE SE KA MIN KƐ:

• A to bɛɛ k’a lɔn ko i masirinin lo i furuɲɔgɔn dɔrɔn lo la.

• I janto i furuɲɔgɔn dusukunnataw la. Jɛnɲɔgɔnya fɛɛn o fɛɛn be se ka kɛ sababu ye k’i furuɲɔgɔn kɔnɔ gwan, i k’o dabila joona joona.