Gwɛlɛyaw ɲɛnabɔcogo

E n’i furuɲɔgɔn mana aw ka ɲɛnamaya daminɛ ɲɔgɔn fɛ, aw bena gwɛlɛyaw sɔrɔ. Mun na do? Sabu aw miiricogo, aw dusukunnakow ani aw lamɔcogo tɛ kelen ye. Koo wɛrɛw ni barinankow fana be se ka na ni gwɛlɛyaw ye.

Gwɛlɛya minw be i ka furu kɔnɔ, i be se k’a ɲini k’i ɲɛɛ tugu u kan. Nka, Bibulu b’an ladi ko an kana an ɲɛɛ tugu an ka gwɛlɛyaw kan (Matiyo 5:23, 24). N’i be Bibulu ka ladiliw sira tagama, i bena se k’i ka gwɛlɛyaw ɲɛnabɔ cogo fisaman na.

1 A’ YE BARO KƐ AW KA GWƐLƐYA KOO LA

BIBULU BE MIN FƆ: “Kumawaati . . . be yen.” (Waajulikɛla 3:1, 7). I janto ka wagati ta ka baro kɛ n’i furuɲɔgɔn ye aw ka gwɛlɛya koo la. I kɔnɔ gwɛ a ye. A to a k’i dusukunnakow n’i ka miiriyaw lɔn o gwɛlɛya koo la. I ka “tiɲɛ fɔ” i furuɲɔgɔn ye tuma bɛɛ (Efɛzikaw 4:25). Hali n’i kɔnɔ gwannin lo kosɔbɛ, i kana a ɲini ka kɛlɛ kɛ. N’i be i dusu suman k’i furuɲɔgɔn jaabi, aw ka baro tɛna yɛlɛma ka kɛ kɛlɛ ye.—Talenw 15:4; 26:20.

I furuɲɔgɔn be min fɔra, hali n’i ma sɔn o ma, i ka kuma ni dususuman ye. I kana ɲinɛ fewu k’a yira ko i be i furuɲɔgɔn kanu ani ko i b’a bonya (Kɔlɔsikaw 4:6). I jija k’o koo ɲɛnabɔ joona joona ani i kana i daa tigɛ i furuɲɔgɔn na.—Efɛzikaw 4:26.

I BE SE KA MIN KƐ:

• Wagati bɛnnin ɲini ka baro kɛ o gwɛlɛya koo la

• N’i furuɲɔgɔn be kumana, i k’a lamɛn. I janto, i kana kuma tigɛ a daa. Kuma bena se i ma

2 LAMƐNNI KƐ ANI A ƝINI KA FAAMUYALI KƐ

BIBULU BE MIN FƆ: “Kanuya min be badenya la, o sababu la, aw ka ɲɔgɔn minɛ, k’aw tɔɲɔgɔnw jati k’u ka fisa n’aw ye.” (Ɔrɔmukaw 12:10). I be i furuɲɔgɔn lamɛn cogo min na, o kɔrɔtanin lo kosɔbɛ. A ɲini k’a ka miiriya faamu. O kɛ ni kanuya ni majigilenya ye (1 Piyɛri 3:8; Zaki 1:19). Kana i yɛrɛ kɛ lamɛnnikɛla ye k’a sɔrɔ o tɛ. I be min kɛra, n’i be se, o to yen fɔlɔ ani i tulo malɔ kosɔbɛ. N’o tɛ se ka kɛ, a ɲini i furuɲɔgɔn fɛ n’aw be se k’o koo ɲɛnabɔ kɔfɛ. N’i tɛ i furuɲɔgɔn jati i jugu ye, nka n’i b’a jati i kokɛɲɔgɔn ye, i tɛna “kɔn k’i dusu gwan.”—Waajulikɛla 7:9.

I BE SE KA MIN KƐ:

• I furuɲɔgɔn be min fɔra, hali n’o man di i ye, i hakili sigi ka lamɛnni kɛ

• A ɲini k’i furuɲɔgɔn ka kumaw kɔrɔ faamu. A kɛcogow n’a kumakan cogoya kɔrɔsi

3 AW BƐNNA MIN NA, A’ YE BANBA K’O KƐ

BIBULU BE MIN FƆ: “Baara bɛɛ be nafa di, nga kuma gwansan caaman be na ni dɛsɛ ye.” (Talenw 14:23). Ka bɛn kelen ma koo dɔ la, o ka ɲi, nka o dama tɛ bɔri kɛ. Aw fila bɛnna fɛɛrɛ ɲuman min na, aw ka kan k’o kɛ. N’a sɔrɔ o tɛna ɲɛ n’i ma i jija kosɔbɛ. Nka, o jijali tɛna kɛ fuu ye (Talenw 10:4). Ni aw be jɛn ka koow kɛ, aw bena “tɔnɔ” ɲuman sɔrɔ o la.—Waajulikɛla 4:9.

I BE SE KA MIN KƐ:

• A’ y’a latigɛ aw kelen kelen bena koo tigitigi min kɛ walisa k’aw ka gwɛlɛya ɲɛnabɔ

• Tuma kelen kelen, a’ ye jatiminɛ kɛ k’a filɛ aw sera ka min kɛ