Kalan sɔrɔ Yezu ka kɔrɔbɔliw muɲu cogo la

Yezu batizenin kɔ dɔrɔn, hakili senu y’a kɛ a tagara Zude kongokolon kɔnɔ. A ka ɲi ka miiri fɛɛn caaman na. Fɛɛn jumanw? A batizenin kɔ, “sankolo dayɛlɛla” a ye (Matiyo 3:16). O la, a ye fɛɛn minw kalan ani a ye fɛɛn minw kɛ sankolo la, a hakili jigira u la. Tiɲɛn na, fɛɛn caaman be yen, a ka ɲi ka miiri minw na.

Yezu ye tile 40 ni suu 40 kɛ kongokolon kɔnɔ. A ma foyi dumu. Kɔngɔ digira a la tuma min na, Sutana Naafigi gwɛrɛla a la walisa k’a kɔrɔbɔ. A ko: “N’i ye Ala Deen ye, a fɔ ko kabakuru nunu ka yɛlɛma ka kɛ buru ye.” (Matiyo 4:3). Komi Yezu y’a lɔn ko a daganin tɛ k’a ka sebagaya kɛ k’a yɛrɛ mako wasa, a ma sɔn k’o kɛ.

Nka, Sutana ma dan o ma. A ye fɛɛrɛ wɛrɛ ɲini walisa ka Yezu kɔrɔbɔ. Ka Yezu to Alabatoso sanfɛ, Sutana y’a kɔrɔbɔ ko a ka pan ka cun dugu ma. Nka, Yezu ma sɔn k’a ka sebagaya yira o cogo kabakoman na. A basigira Ala ka Kuma kan k’a yira ko an man ɲi ka Ala kɔrɔbɔ o cogo la.

O kɔ, a ye Yezu kɔrɔbɔ tugun siɲɛ sabanan na. A ye fɛɛrɛ dɔ kɛ ka “diɲɛ jamanaw bɛɛ n’u ka nɔɔrɔ yira” Yezu la ani k’a fɔ a ye ko: “N’i y’i kunbiri gwan ne kɔrɔ ka ne bato, ne bena nunu bɛɛ d’i ma.” Nka, Yezu banna pewu. A ko: “Taga ka bɔ yan Sutana.” (Matiyo 4:8-10). A m’a to kɔrɔbɔli ka see sɔrɔ a kan sabu a b’a lɔn ko Jehova dɔrɔn lo ka kan ni batoli ye. Tiɲɛn na, a y’a latigɛ ka kantigiya kɛ Ala ye.

Sutana ye kɔrɔbɔli minw la Yezu kan ani Yezu y’u muɲu cogo min na, an be se ka kalan caaman sɔrɔ o la. O kɔrɔbɔliw ye tiɲɛnko lo ye ani u b’a yira ko Sutana tɛ koo jugu tagamasiɲɛ ye i ko dɔw b’a miiri cogo min na. An tɛ se ka Sutana ye, nka a be yen tiɲɛn tiɲɛn na. Maana nin b’a yira an na fana ko duniɲa ka gofɛrɛnɛmanw ye Sutana ta lo ye. Ale lo b’u marala. N’o tɛ, a tun be se k’u di Yezu ma cogo di ani o koo tun bena kɛ kɔrɔbɔli ye Yezu fɛ cogo di?

Ka fara o kan, Sutana tun labɛnnin lo ka duniɲa ka masayaw bɛɛ di Yezu ma n’a y’ale bato siɲɛ kelen dɔrɔn. Sutana be se k’a ɲini k’an kɔrɔbɔ o cogo la fana. N’a sɔrɔ a be se ka sababu ɲuman di an ma ka kɛ nafolotigi ye, ka tɔgɔba sɔrɔ wala ka kɛ kuntigi ye. Nka, a ka ɲi an ka Yezu ladegi: kɔrɔbɔli mana kɛ min o min ye, an ka kantigiya kɛ Ala ye. Nka, an k’a to an hakili la ko Sutana ‘tagara ka Yezu to yen fɔlɔ.’ (Luka 4:13). N’a sɔrɔ a bena o ɲɔgɔn lo kɛ n’an ye fana. O kosɔn, an k’a ɲi k’an yɛrɛ kɔrɔsi tuma bɛɛ.