U m’u ka layidu dafa

Jehova y’a fɔ Musa ye ko: ‘Yɛlɛ ka na ne fɛ kulu kan. Ne bena n’ ka sariyaw sɛbɛ walaka kabakurulamanw kan k’u d’i ma.’ Musa yɛlɛla kulu kan ani a tora yen fɔɔ tile 40 ni suu 40. Ka Musa to yen, Jehova ye sariya 10 sɛbɛ walaka kabakurulaman fila kan k’u di a ma.

Wagati dɔɔni Musa yɛlɛnin kɔ kulu kan, Israɛldenw y’a miiri ko a bolila k’u to yen. U y’a fɔ Arɔn ye ko: ‘An b’a fɛ kuntigi dɔ k’an ɲɛminɛ. Batofɛn dɔ dilan an ye!’ Arɔn ko: ‘ A’ ye na ni aw ka sanu ye.’ A y’o sanu yeelen k’a kɛ misiden jaa ye. Jama ko: ‘Nin misiden ye an ka Ala ye min y’an bɔ Ezipiti!’ U y’a daminɛ k’a bato ani u ye fɛti kɛ. Yala o tun ye kojugu ye wa? Ɔnhɔn kojugu tun lo sabu jama tun y’u daa di k’u bena Jehova kelenpe dɔrɔn lo bato. Nka sisan, u b’o layidu tiɲɛna.

Jehova y’a ye min be kɛra ani a y’a fɔ Musa ye ko: ‘Jigi ka taga jama yɔrɔ. U ma mɛnni kɛ ne fɛ ani u be ngalon ala dɔ batora.’ Musa jigira ka bɔ kulu kan ni walaka fila nunu ye a bolo.

Musa gwɛrɛtɔ jama na, a y’a mɛn u be dɔnkili lara. O kɔ, a y’a ye u be dɔɔn kɛra ani u be birila ka sanu misiden bato. Musa dimina kosɔbɛ. A ye walaka fila nunu fili u benna ka kari kari. A sinna k’o jaa halaki. O kɔ, a ye Arɔn ɲininga ko: ‘Mun na i y’a to jama y’i bila kojuguba nin na?’ Arɔn y’a jaabi ko: ‘Kana dimi. I b’a lɔn jama nin be cogo min na. U ko u be batofɛn dɔ fɛ. O kama, ne y’u ka sanu don tasuma na, o kɛra misiden jaa ye!’ Arɔn tun man kan k’o kɛ. Musa kɔsegira kulu kan ani a ye Jehova deli ko a ka yafa jama ma.

Minw tun b’a fɛ ka mɛnni kɛ Jehova fɛ, a yafara olu ma. Yala i y’a faamu ko a tun kɔrɔtanin lo Israɛldenw k’a to Musa k’u ɲɛminɛ wa?