Rahab be kolajɛbagaw dogo

Tuma min na Israɛl ka kolajɛbagaw tagara Zeriko dugu la, u jigira muso dɔ ka soo, min tɔgɔ ko Rahab. Zeriko masacɛ bɔra o kala ma, a ye sɔrɔdasiw ci ka taga Rahab fɛ. Rahab ye kolajɛbaga fila nunu dogo sanbon kan ani a ye sira wɛrɛ yira sɔrɔdasiw la. A y’a fɔ kolajɛbagaw ye ko: ‘Ne b’a lɔn ko aw bena dugu nin minɛ sabu Jehova be n’aw ye. O kama ne bena aw dɛmɛ. A’ y’aw daa di ko aw bena ne somɔgɔw kisi.’

Kolajɛbagaw y’u daa di Rahab ma ko: ‘Bɔnɛ tɛna mɔgɔ si sɔrɔ i ka soo.’ U ko: ‘Juru wulenman siri i ka finɛtiri la. O la, i somɔgɔw bena kisi.’

Rahab ye kolajɛbagaw dɛmɛ u bɔra n’a ka finɛtiri ye ka jigi ni juru ye. U tagara dogo kuluw yɔrɔ la fɔɔ tile saba ka sɔrɔ ka kɔsegi Zozuwe fɛ. O kɔ, Israɛldenw ye Zurudɛn baji tigɛ k’u yɛrɛ labɛn ka jamana nin minɛ. Zeriko lo kɛra dugu fɔlɔ ye u ye min minɛ. Jehova y’a fɔ u ye k’u ka tagama ka dugu lamini siɲɛ kelen tile kɔnɔ, fɔɔ tile wɔɔrɔ. Tile wolonfilanan loon na, u tagamana ka dugu lamini siɲɛ wolonfila. Sarakalasebagaw ye u ka buruw fiyɛ, sɔrɔdasiw ye kulekanba bɔ. Dugu lamini kogow benna! Rahab ka soo tun nɔrɔnin lo dugu lamini kogo la, nka ale ma ben. Rahab n’a somɔgɔw kisira sabu u ye u jigi la Jehova kan.