Yezu ye kalanba min kɛ kulu kan

Yezu ye ciden 12 sugandi. O kɔ, a jigira ka bɔ kulu kan ka taga jamaba lajɛnna yɔrɔ min na. O mɔgɔw bɔra Galile, Zude, Tiri, Sidɔn, Siri ani Zurudɛn baji faan dɔ fɛ. U nana ni banabagatɔw ani jinatɔw ye. Yezu y’u bɛɛ kɛnɛya. O kɔ, a sigira kulu kan ani a y’a daminɛ ka kuma. A y’a ɲɛfɔ an ka kan ka min kɛ n’an b’a fɛ ka kɛ Ala teri ye. An ka kan k’a lɔn ko an mako be Jehova la ani an ka kan k’a ɲini k’a kanu. Nka an tɛ se ka Ala kanu n’an tɛ mɔgɔw kanu. An ka kan ka koo ɲuman ani koo tilennin kɛ bɛɛ ye, hali an juguw.

Yezu ko: ‘I ma ɲi k’i teriw dɔrɔn lo kanu. I ka ɲi k’i juguw fana kanu ani ka yafa mɔgɔw ma n’i dusu bɛɛ ye. Ni mɔgɔ dɔ dusu man di i kɔrɔ, teliya ka taga yafa deli a fɛ. I b’a fɛ mɔgɔw ka min kɛ i ye, i k’o kɛ u ye.’

Yezu ye ladili ɲumanw fana di mɔgɔw ma bololafɛnw koo la. A ko: ‘A ka fisa i ka kɛ Jehova teri ye sanni ka kɛ ni wari caaman ye. U be se k’i ka wari sonya. Nka teriya min be i ni Jehova cɛ, mɔgɔ si tɛ se k’o sonya. I kana hami dumuni, minni, wala fani koo la. Kɔnɔw filɛ. Ala b’u yɔrɔ filɛ tuma bɛɛ: a b’a kɛ u be dumuni sɔrɔ k’a dumu ka fa. N’i be hami, o tɛna tile kelen fara i sii kan. I hakili to a la ko Jehova b’a lɔn i mako be min na.’

Jama ma deli k’a ye mɔgɔ dɔ kumana i ko Yezu kumana cogo min na. U ka diinan kuntigiw t’u kalan o koow la. Mun lo ye Yezu kɛ karamɔgɔba ye do? A tun ye karamɔgɔba ye sabu a ka kalanw bɛɛ bɔra Jehova lo fɛ.