Yezu be mɔgɔ waa caaman balo

Saan 32 ka Tɛmɛnkan Seli wagati tun man jan. Kalandenw kɔsegira ka bɔ waajuli baara la. U tun sɛgɛnnin lo. O kama, Yezu y’a fɔ u ye k’u ka don kurun kɔnɔ u be taga ɲɔgɔn fɛ Bɛtisayida walisa u ka se ka lafiɲɛ. Nka, kurun setɔ baji daa la, Yezu y’a ye ko mɔgɔ caaman tagara u kɔ fɔɔ o yɔrɔ la. Yezu tun b’a fɛ ka to n’a ka kalandenw dɔrɔn ye. Nka a ye jama bisimila ka ɲɛ. A y’u ka banabagatɔw kɛnɛya ani a y’a daminɛ k’u kalan. Yezu y’u kalan Ala ka Masaya koo la tile kuru bɛɛ la. Suu be ɲini ka ko tuma min na, a ka cidenw tagara a fɔ a ye ko: ‘N’a sɔrɔ kɔngɔ be mɔgɔ nunu na. Sira di u ma u ka taga dumuni ɲini k’a dumu.’

Yezu y’u jaabi ko: ‘U mako t’a la ka taga. A’ ye dumuni di u ma yan.’ Cidenw ko: ‘I b’a fɛ an ka taga buru san u ye le wa?’ Filipu ye ciden dɔ ye. Ale ko: ‘Hali ni wari caaman tun b’an fɛ, an tɛ se ka buru san min bena jama nin labɔ.’

Yezu y’u ɲininga ko: ‘Mun lo be yen k’a dumu?’ Andere ko: ‘Burukun duuru ani jɛgɛ misɛn fila lo be yen. O man ca hali dɔɔni.’ Yezu ko: ‘Aw y’o buru n’o jɛgɛ di n’ ma.’ A ko mɔgɔw ka sigi biin na mɔgɔ biduuru-duuru ani kɛmɛ-kɛmɛ. Yezu ye buru ni jɛgɛ ta, ka filɛri kɛ sankolo la ani ka delili kɛ. O kɔ, a y’o dumuni di a ka cidenw ma ani u y’o tilan tilan mɔgɔw ye. O cɛɛ 5 000 ani musow ni denmisɛnw bɛɛ ye dumuni kɛ fɔɔ ka fa. O kɔ, dumuni min tɔɔ tora, cidenw y’o cɛ walisa foyi kana tiɲɛ. U ye segi 12 bɛɛ fa! Kabako lo dɛ! Tiɲɛn tɛ?

O koo ye jama kabakoya fɔɔ u tun b’a fɛ ka Yezu kɛ u ka masa ye. Nka Yezu tun b’a lɔn ko Jehova bena ale kɛ masa ye tuma min na, o ma se fɔlɔ. O kama, a ye sira di jama ma ani a y’a fɔ a ka cidenw ye k’u ka taga Galile baji faan dɔ nin na. U donna u ka kurun kɔnɔ. Nka Yezu yɛlɛla kulu kan a kelen. Mun na do? A tun b’a fɛ ka wagati ta k’a Faa deli. Hali ni Yezu ka baara tun ka ca, a tun be wagati ta tuma bɛɛ ka delili kɛ.